Read Tombulu Kisah Rasul-rasul 1 Bible Online

Kisah Rasul-rasul 1 - Tombulu bible

Kisah Rasul-rasul 1

¹ Ama' Teofilus si pahsigi'engku, witu ung kitapku kataré, ni aku é nimantik péléng am winangun wo a méipahtuzu' ni Yesus,

²makaz un endo ni Sia i mawénéta nimangé witi kasendukan. Puunala niitu ni Sia é niméhé um perénta mengiité si Roh Lenas wia sé aatu sé pinéléng-Na.

³Wia sé aatu-Na kenu, kumawusa Sia im pinahzézéhamé makaz nimaté, ni Sia nimapailek un tou-Na un tumuzu'mé i ni Sia én uli-ulit menou-nou. Im witu un epatna pulu' endo, ni Sia é menau-naup i nimapaileka un tou-Na wo nimahnuwu'ma wia ni séra tumoro ung Kakolanoan ni Opo Empung.

⁴ Makasamé, si Yesus é mahkan karia néra. In toro niitu, ang kuan-Na wia ni séra, “Tia'mo ipahtutula'u niou u Yerusalem kenu. Ni kamu é mento'mola wia'i ma'ento' si Ama' i lumekep u mémoitaaz-Na wia ni kamu, tanu un tinalinga niouo wia ni Aku.

⁵ Pahpaan im puuna si Yohanes menanarani é mahsarani karia un zano, taan zéi'mo mauréma ni kamu é saranin karia ni Roh Lenas.”

⁶Karegas si Yesus karia né aatu-Na nimaréwok, a séra meligau wia ni Sia, “Tuang, apa in tarékan ni Ko paaz mahwawangun sumaup ung kakolanoan né tou Israel?”

⁷A si Yesus mingkotla wia ni séra, “Un oras wo sawisa niitu i mamuali én zéi'kan totoz ing kata'uan niou, si Ama' uman si wéwéhan kawasa in tumotoz un oras itii.

⁸ Taan si Roh Lenasokan si tumumpamé wia ni kamu wo ni kamu makailek ung kawasa. Tumondong niitu, ni kamu sé makumua um pina'ilek wo tinalinga niou tumoro ni Aku wo matumuzu' wia sé tou witi wanua tua'na Yerusalem, witi péléng an tana' Yudea wo Samaria makaz witi pondol ung kaayahan.”

⁹ Makakuala niitu, witu u sinaru néra, si Yesus mawénéta mangé witi kasendukan, a Sia kaapé'ana u ninahak akaz Sia zéi'mo pahileken nérama.

¹⁰I ni séra meloho-loho'pé' witi langit, kumompo'mé sé tou zua kimarai kulo' rimendaio witu u rété néra.

¹¹Ang kuan né tou zua itii wia ni séra, “É kamu tou Galilea, kaa kamu meloho-loho'pé' witi langit? Si Yesus é mawénétoma nimangé witi kasendukan. Kuramo Sia i niilek nioua i mawénéta nimangé witi kasendukan téntu kangkasii Sia i mawurimé sumaup.”

¹²Tumondong niitu, merosé sé aatu ni Yesus im witi kentur Zaitun a mawurima sumaup witi Yerusalem, ung kazou'na ém woo esa kilometer.[1]

¹³ I ni séra méikaayomola witi Yerusalem, a séra mangé witi pahento'an néra a menéka witu um porés witu un atas um walé itii. Ni séra é: si Petrus, si Yohanes, si Yakobus, si Andreas, si Filipus, si Tomas, si Bartolomeus, si Matius, si Yakobus oki' ni Alfeus, si Simon tou né sana réwok tou Zelot[2] wo si Yudas oki' ni Yakobus.

¹⁴Ni séra péléng é nimaréwok karia un esa genang i mahmengaléi. Ni séra i mengaléi éng karia né woopira wéwéné, karia ni Maria ina' ni Yesus wo sé katuari ni Yesus.

¹⁵I sana endo, sé katuari esa pa'émanen é nimaréwok. Ung kalakez néra ém woo sana atus wo zuana pulu' tou. A si Petrus rumendaila witu un unez néra ang kumua,

¹⁶“Katuari-katuari, a méikua ni Roh Lenas mengiité si Daud witu um Pinantik Lenas tumoro si Yudas si nimahwalimé sé tou in timion si Yesus é léwo'zéi' mamuali.

¹⁷Im puuna si Yudas itii én esaané wia ni kita wo kapaayangta.”

¹⁸ Si Yudas kenumo si timelesla un tana' karia un zoit méiwaéré i nimangkér si Yesus. Im witu un tana' itiimo ni sia méikazemak wo um pootna nimaweka makaz péléng am witu un untepna é méikaondol.

¹⁹Péléng sé tou witi Yerusalem é mata'u u nimamuali wia si Yudas, pahpaano niitu un tana' itii é nginaranan néra karia u nunuwu'en néra ‘Akeldama’,[3]ung kalakoana én Tana' Zaha'.

²⁰ A si Petrus kumua kasiima, “Witu ung kitap Mazmur é méipantik in téntii, ‘Iwayamola um pahwéha-wéhanna im pene-penesa, wo zéi'kan siapa tou si mahento' witu.’ Wo kasii wéwéhan u méipantik in téntii, ‘Iwayamola um paayangenna in éndona né tou walina.’

²¹Niitumo kita é léwo'zéi' i méléng si tou esa i sumawel si Yudas. Si péléngenta itii ém wia sé tou sé sekezé memali-mali kariata i si Yesus Mahpiara memali-malipé' kariata,

²² rengané ni Sia i sinarani ni Yohanes Menanarani makaz ni Sia i nimawénéta nimangé witi kasendukan timula'uma ni kita. Si tou itii é maéndo kakariata i makumua am pina'ilekta i si Yesus é mémoitoumé sumaup ni Opo Empung.”

²³Makanuwu'la si Petrus, a séra tumuzu'la sé zua tou im wia sé nimaréwok witu. Si esa é si Yusuf si pahtawahen né tou im Barsabas wo kasii pahtawa-tawahen i Yustus wo si esa é si Matias.

²⁴Tumondongla niitu a séra péléng mengaléi wo mahkua, “O Mahpiara, totoz kata'uan-Nu péléng an até né tou. Niitumo, ituzu'mé wia ni kai séi si péléngen-Nu im wia sé zua tou kenu.

²⁵Si tou itiimo si masumawel um paayangen ni Yudas i maéndo aatu ni Yesus. Pahpaan si Yudas é nimatémo wo nimangémo witu un tampa um wangun im wia ni sia.”

²⁶A séra sumawuta lot i mahtata'u séi si mapéléng. Si nimapéléng é si Matias. A sia totozen nérala i maéndo aatu ni Yesus karia né mapulu' wo esa aatu itii.