Read Tombulu Kisah Rasul-rasul 10 Bible Online

Kisah Rasul-rasul 10 - Tombulu bible

Kisah Rasul-rasul 10

¹Witi Kaisarea ém wéwéhan si tuama makangaran Kornelius. Ni sia én tonaas né sana atus suraro Romawi nginaranan Italia.

²Ni sia é mahtali-talinga wia si Opo Empung. Ni sia wo sé sana awuna é maindé' si Opo Empung. Lakez a sasawang ipahwéhéna wia sé tou Yahudi, wo kangkasii sekezé é mahmengaléi wia si Opo Empung.

³I sana endo, woo jam katelu im wengindo, oras i mengaléi,[11] si Kornelius ém wéwéhan um pina'ilek. In toro niitu, totoz niileknama si malaekat ni Opo Empung i nimuntepé witu um waléna ang kumua wia ni sia, “Kornelius!”

⁴A si Kornelius merena wia si malaekat itii wo karia in totoz maindé' sia kumuama, “Apa wé, Tuang?” A mingkoté si malaekat itii wia ni sia, “Am pengaléiennu wo a méipahwéhému é sinungkuloma ni Opo Empung, wo ni Sia é megenang ni ko.

⁵In tarékan, iatumoma sé woopira tou mangé witi Yope i mangémé si tou makangaran Simon si pahkuan kangkasii im Petrus.

⁶Ni sia é mahento' witi walé ni Simon si mahpaayang mahweresi ang kulit né binatang, um witi tembir un tasik.”

⁷I si malaekat si nimuwu'ma wia si Kornelius timula'umoma ni sia, an tawahenamé sé zua pahayoanna wo si suraro si mahtali-talinga wia si Opo Empung si sekezé memali-mali kariana.

⁸I ni sia nimakakuamola péléng a nimamuali wia ni séra, a séra iatunama i mangé witi Yope.

⁹Masandomé, i lolamboto, sé tou telu itii é merétémoma u Yope. In toro niitu kangkasii si Petrus é nimenéka witi welah atas um walé[12] a sia mengaléi.

¹⁰Im witu ni sia é maharemo, taan ung kanen néra éng karegaspé' im pahimeken. Kumompo'mé wéwéhan u méipapaileké wia ni sia.

¹¹Ilekennama u langit é nimawukama an tumumpamé un tanu a roko' lempaz. U roko' itii é méitontoné witu un tana' karia un epat tali u méiapus wana an zuhuna u roko' itii.

¹²Im witu u roko' itii ém wéwéhan sé binatang epat a'é, sé binatang mahlangkou wo sé tumétéwél.

¹³An talinganamé u nuwu' kimuamé wia ni sia, “Petrus, rumendaiomé, kerizenola wo seza'enola.”

¹⁴Taan si Petrus é nimingkoté in téntii, “Zéi'kan Opo Empung. Ni aku én zéi'kampé' nimahseza-seza'la sé binatang sinéro' im pahseza'en wo makati'tiren.”[13]

¹⁵An talingan kasiimé u nuwu' kimuamé ing kazua, “Apa ung kinuamo ni Opo Empung in toro seza'en, tia' pahkuanu sinéro' im pahseza'en.”

¹⁶Niia é makatelu i nimamualima, kumawusa niitu u roko' itii é rengan im winénéta sumaup mangé witi langit.

¹⁷Karegas si Petrus megena-genang ung kalakoan u niilekna itii, sé tou sé méiatumé ni Kornelius i menéro um walé pahwéha-wéhan ni Simon é rimendaio witu u loloangan.

¹⁸A séra tumawahla si tou witu a meligau, “Apa si Simon si pahkuan kangkasii im Petrus é mahento' witu um walé kenu?”

¹⁹I si Petrus megena-genangpé' tumoro ung kalakoan u niilekna itii, a si Roh Lenas kumuama wia ni sia, “Wéwéhan sé telu tou menéro ni ko.

²⁰Rumendaiomé wo tumumpamoma wo mangémo karia né tou telu itii. Tia'mo ko mahzua-zua genang pahpaan ni Aku si nimatu ni séra.”

²¹Kaitalingamé niitu, an tumumpama si Petrus. I ni sia nimahilekanola wo sé telu tou itii, a sia kumuala wia ni séra, “Ni akumo si Petrus si pahpenéron niou. Apa wé u niéyé niou?”

²²A séra mingkotla, “Si Kornelius si tonaas né sana atus suraro Romawi, si ulit wo maindé' si Opo Empung wo kata'uan né tou i lé'os uman wia péléng sé tou Yahudi én tinuzu'anomé ni malaekat lenas in tumawah ni ko i mangé witi waléna, wo tumalinga an ikuamu wia ni sia.”

²³A si Petrus mahaléila ni séra i mento'pé'ma witu. Masandomé, si Petrus mimekla a mangé karia né tou telu itii. Wéwéhan kasii sé woopira tou ma'éman witi Yope kimiita ni sia.

²⁴Masandomé, séra ikaayola witi Kaisarea. Im witu si Kornelius é mengento-ngento'mokan ni séra. Sé katuarina wo sé kakariana én tinawahnamomé i maréwoké.

²⁵I si Petrus mahuuntep witu um walé, a si Kornelius mésumungkul ni sia. Ni sia éng kimuruzla witu u sinaru ni Petrus a sumigi' wia ni sia.

²⁶Taan si Kornelius é rinendaié ni Petrus ang kumua, “Rumendaiomé, ni aku én tou uman.”

²⁷Karegas mahsirita karia ni Kornelius, sia muntepa an ilekenama lakezo sé tou nimaréwok.

²⁸Ang kuan ni Petrus, “Kata'uan niouo, sé tou Yahudi én totoz sinéro' i mahkari-karia kaapa i mengangangé wana am walé né tou zéi'kan Yahudi. Taan si Opo Empung éng kimuamo wia ni aku, i ni aku én zéi'kan mata'u kumua sé tou zozo' in esa i makati'tiren kaapa zéi'kan mata'u pahkari-karian.

²⁹Niitumo, ni aku niménéla in tinawah nioué méyé wia'i. In tarékan ni aku meligau, kaa ni aku tinawahmé i méyé wia'i?”

³⁰Si Kornelius mingkotla in téntii, “Epatna endo limangkoila, in jam katelu im wengindo woo tanu in tarékan, ni aku éng karegas i mengaléi witu um waléku. Kumompo'mé wéwéhan si tou rimendaila witu u sinaruku, ung karaina é meto-petot.

³¹A sia kumuamé in téntii wia ni aku, ‘Kornelius, am pengaléiennu én tinalingamoma ni Opo Empung wo an ipahwéhému wia sé tou éng ginenang-Namo.

³²Niitumo, ni ko matumoma tou mangé witi Yope i mangémé si Simon si pahkuan Petrus. Ni sia é mahento' witi walé ni Simon si mahpaayang mahweresi ang kulit né binatang, si witi tembir un tasik.’

³³Niitumo ni aku rengan nimatuma tou i matumawah ni ko. Wo ni ko é niméyémo karia i mahpaa-paaz. In tarékan, ni kai péléng é nimaréwoko wia'i witu u sinaru ni Opo Empung in tumalinga u méiperénta ni Opo Empung wia ni ko in ikua wia ni kai péléng.”

³⁴ A si Petrus rengan i mahnuwu', “Un ulitna, kinatulapangkumola i si Opo Empung én zéi'kan meméléng tou.

³⁵Péléng sé tou, wisa uman un tahsasana wanua néra sé maindé' wia ni Sia wo mahwangun an ulit ém pahsungkulen-Na.

³⁶Kata'uan niouo u Nuwu' ni Opo Empung u méipapaayo wia sé tou Israel. Ni Sia éng kimua i sé tou é mawurian sumaup karia ni Opo Empung mengiité si Yesus Kristus, si nimaéndo Mahpiara péléng né tou.

³⁷Wo ni kamu kangkasii é mata'umo, péléng a nimamuali wia péléng un tana' Yudea, rengané witi Galilea, kumawusa si Yohanes i nimahwoka'ma tumoro um pahsaranin.

³⁸Kata'uan niouo tumoro si Yesus tou Nazaret. Ni Sia ém winéhan ni Opo Empung si Roh Lenas wo ung kawasa-Na. A Sia lumampang mahliklik wo mahwangun a lé'os wia sé tou wo mahlé'os péléng sé tou sinelazan ni tonaas né sétang pahpaan si Opo Empung é memali-mali karia-Na.

³⁹Ni kaimo sé nimilek karia um weren nai in esa péléng am winangun ni Yesus witi Yerusalem wo wana péléng am wanua pahento'an né tou Yahudi. Wo ni Sia ém winunu' néramola karia i méisalipla.

⁴⁰Wo im witu un endo katelu, ni Sia é méitou sumaup ni Opo Empung im wia sé nimaté wo si Opo Empung kasii nimangun ni Sia in toro pahileken né tou.

⁴¹Taan zéi'kan péléng sé tou Yahudi toro nimilek ni Sia. Akaz uman sé pinéléngo ni Opo Empung rengan ing kataré-taré sé toro nimilek wo makumua am pina'ilek néra. Ni kaimo sé tou itii sé kimano wo nimelepo karia-Na, kumawusa Sia i méitoumé sumaup ni Opo Empung im wia sé nimaté.

⁴²Ni Sia é nimatumomé ni kai i mahwoka' u Nuwu' Lé'os tumoro ni Sia wia péléng sé tou. Wo ni kai kangkasii é léwo'zéi' ing kumua am pina'ilek wo tinalinga nai, i ni Siamo si Tou pinéléng ni Opo Empung i métumotoz ulit kaapa zéi'kan am pahwangunen né tou, séra i menou-nou kaapa i nimatémo.

⁴³Péléng sé nabi éng kimuamo tumoro ni Sia. Ni séra mahkua im péléng sé tou ma'éman wia ni Sia, a singkéla' néra én ampungan mengiité u ngaran-Na.”

⁴⁴Karegaspé' si Petrus i mahnuwu', an tumumpamé si Roh Lenas ang kumawasama wia péléng sé tou mahtalinga an ipahkuana itii.

⁴⁵Sé tou Yahudi sé ma'émano si Yesus sé kimiité si Petrus é mengusi-ngusingsing pahpaan ni séra nimileka si Roh Lenas é méiwéhé kangkasii wia sé tahsasana wanua walina sé zéi'kan Yahudi.

⁴⁶Pahpaan ni séra é mahtalingamé sé tou itii i mahnuwu' karia a nunuwu'en méiwéhé ni Roh Lenas wia ni séra wo mahlooz si Opo Empung. Ang kuan ni Petrus,

⁴⁷“Pina'ilek niouoma in esa! Ni séra é nimakaileko si Roh Lenas masuat wo si kinailekanta. Niitumo in tarékan, apa ni séra zéi'kan mata'u saranin karia un zano?”

⁴⁸A séra ipekisaranila ni Petrus witu u ngaran ni Yesus Kristus. Tumondong niitu am pahaléien nérala si Petrus i mento'pé'ma karia néra woopirana endo.