Read Tombulu Kisah Rasul-rasul 11 Bible Online

Kisah Rasul-rasul 11 - Tombulu bible

Kisah Rasul-rasul 11

¹Sé aatu ni Yesus wo sé katuari esa pa'émanen witi Yudea én timalinga i sé tahsasana wanua walina sé zéi'kan tou Yahudi kasii é nimakailekola u nuwu' ni Opo Empung.

²Niitumo, i si Petrus nimawurimomé sumaup witi Yerusalem, sé sana réwok tou Yahudi sé ma'émano si Yesus é mahzéi-zéi'an kariana.

³Kuan néra, “Kaa ko mahangé wana am walé né tou zéi'kan Yahudi sé zéi'kan sinunat wo mahkan karia néra?”

⁴Taan tina'samé ni Petrus i simirita wia ni séra, péléng a nimamuali. Kuana,

⁵“Karegas ni aku mengaléi im witi Yope, kumompo'mé ém wéwéhan u méipapailek wia ni aku. Ilekengkuma u langit é nimawukama an tumumpamé un tanu a roko' lempaz. U roko' itii é méitontoné witu u sinaruku karia un epat tali u méiapus wana an zuhuna u roko' itii.

⁶Im pahnana'ungku am witu u roko' itii, an ilekengkuma sé binatang epat a'é wo sé liontana' wo sé binatang mahlangkou wo sé tumétéwél.

⁷An talingangkumé u nuwu' kimuamé wia ni aku in téntii, ‘Petrus, rumendaiomé, kerizenola wo seza'enola!’

⁸Taan winingkotku umanla, ‘Zéi'kan, Opo Empung. Ni aku én zéi'kampé' nimahseza-seza'la sé binatang sinéro' im pahseza'en wo makati'tiren.’

⁹Taan ni aku kasii én timalingamé u nuwu' um witi kasendukan a méyé ung kimuamé ing kazua, ‘Apa ung kinuamo ni Opo Empung in toro seza'en, tia' pahkuanu sinéro' im pahseza'en!’

¹⁰Niia é nimakatelu i nimamualima. Ing kamurian niitu péléng é nimawénéta sumaup mangé witi langit.

¹¹In toro niitukan ém wéwéhan sé telu tou rimendai witu u loloangan um walé pahento'an nai. Ni séra ém witi Kaisarea a méyé méiatumé i méyé wia ni aku.

¹²A si Roh Lenas kumuala wia ni aku, ‘Mangémo karia néra. Tia'mo mahzua-zua genang pahpaan ni séra in zéi'kan tou Yahudi.’ Kaitalingamé niitu, ni aku wo sé enem katuari esa pa'émanen kenu kangkasii é nimangé witi Kaisarea. Ikaayola witu, a ni kai muntepa witu um walé ni Kornelius.

¹³An isiritala ni Kornelius wia ni kai kura sia i nimilek si malaekat makarendai witi waléna ang kumuala wia ni sia in téntii, ‘Matuma tou mangé witi Yope i mangémé si Simon si pahkuan Petrus.

¹⁴Wéwéhan un ikuana wia ni ko. Wo un ikuana itii é mangun ni ko karia né sana awumu ipilot im witu un ukuman wana a singkéla'.’

¹⁵I ni aku mahnuwu'ma wia ni séra, an tumumpamé si Roh Lenas wia ni séra tanu u nimamuali wia ni kita i makasa.

¹⁶ Ang kagenangangkula u méikua ni Yesus Mahpiara, ‘Si Yohanes Menanarani é mahsarani sé tou karia un zano, taan ni kamu é saranin karia ni Roh Lenas.’

¹⁷Niitumo, sa si Opo Empung timambéré si Roh Lenas wia ni séra sé zéi'kan tou Yahudi, masuat wo si méitambér-Namé wia ni kita in taré ma'émanla wia si Yesus Kristus Mahpiara, kura kahuman ni aku i suméro' ni Sia?”

¹⁸Kaitalingamé niitu, ni séra é méikapenes. Tumondongla niitu a séra mahlooz si Opo Empung karia i mahkua, “Niitumo, maan wia sé tou walina sé zéi'kan Yahudi kangkasii én tinambérano ni Opo Empung un oras in tumula'u a singkéla' wo séra toro makailek ung katou-touan makaz ing kauré-uré.”

¹⁹ Kumawusa si Stefanus im winunu', sé katuari esa pa'émanen ém pahzézéhan, a séra tumingkas méikasera wayaan u niangéan. Wéwéhan sé timingkas witi tana' Fenisia, Siprus wo witi Antiokhia. Sé tou timingkas itii é mahwoka' u Nuwu' Lé'os tumoro si Yesus, taan wia uman sé tou Yahudi.

²⁰Taan im wia sé méikasera itii, wéwéhan sé woopira tou Siprus wo Kirene sé nimangé witi Antiokhia. Im witu, ni séra kasii é nimahwoka'mé u Nuwu' Lé'os tumoro si Yesus Mahpiara wia sé tou zéi'kan Yahudi.

²¹Ung kawasa ni Opo Empung é memali-mali karia néra taka-takazan totoz lakez sé tou nima'éman wo mahkiito si Yesus Mahpiara.

²²U sirita tumoro u nimamuali kenu éng kinatalingaana né jamaat witi Yerusalem. A sé jamaat itii matuma si Barnabas mangé witi Antiokhia.

²³I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

²⁴Pahpaan si Barnabas itii én tou totoz lé'os, ni sia én totoz kinawasa ni Roh Lenas wo totoz ma'éman wia si Mahpiara, niitumo lakez sé tou timalinga ni sia é nima'éman wia si Mahpiara.

²⁵Tumondong niitu, a si Barnabas mangé witi Tarsus i mamenéro si Saulus. I ni sia nimahilekanola wo si Saulus, an ipahwalinama si Saulus mangé witi Antiokhia.

²⁶Ni séra zua é mahento' mahwali-wali karia né jamaat witu, sana ta'un ung kauréna. Im witu ni séra é mahtuzu' tumoro si Yesus wia sé tou lakez. Im witi Antiokhia itiimo ing kataré-taré sé tou ma'éman si Yesus im pahkuan tou Sarani.[14]

²⁷In toro niitu, sé woopira nabi witi Yerusalem é niméyé witi Antiokhia.

²⁸ Si esaané im wia ni séra é makangaran Agabus. I sé tou nimaréwok, si Agabus si kinawasa ni Roh rumendaié ang kumuama, “Un oras ung kaahreman zéi'kan kakuaan é méyé wia ang kaayahan.” Ung kaahreman itii é nimamuali i si Klaudius si Kaisar.

²⁹Tumalingamé niitu, sé tou ma'éman si Yesus én timotozla i ruméwok a sasawang mengiit ung kawawaan ni esa wo ni esa im pahalin wia sé katuari esa pa'émanen sé mahento' witi tana' Yudea.

³⁰Am pakaréwoken nérala a sasawang, an totozen nérala si Barnabas wo si Saulus i mahali niana wia sé penatua witi tana' Yudea.