Read Tombulu Kisah Rasul-rasul 13 Bible Online

Kisah Rasul-rasul 13 - Tombulu bible

Kisah Rasul-rasul 13

¹In toro niitu, im wia sé jamaat witi Antiokhia ém wéwéhan sé woopira nabi wo méster. Ni séra é si Barnabas, si Simeon pahkuan in Zemdem, si Lukius tou Kirene, si Menahem si rengané ing koki' ém piniara karia ni kolano Herodes, wo kasii si Saulus.

²I sana endo, i ni séra mahpuasa wo mahragés wia si Mahpiara, a si Roh Lenas numuwu'mé, “I sanapa'mé wia ni Aku si Barnabas wo si Saulus i maayang um papaayangen un tinotoz-Kumo in iwéhé wia ni séra zua.”

³Kumawusa ni séra i mahpuasa wo mahmengaléi, séra zumeta'la u lengen wia ni séra zua, a séra zua iatu nérama i mangé.

⁴Pahpaan méiatu ni Roh Lenas, a si Barnabas wo si Saulus mangé witi Seleukia, im witumokan a séra suméngkota witi katanaan Siprus.

⁵I méikaayomola witi Salamis, ni séra zua é mahwoka' u Nuwu' ni Opo Empung wana am walé peraragésan né tou Yahudi. In toro niitu si Yohanes é méipahwali néramé i sumawang ni séra.

⁶Tumondong niitu, ni séra é mahliklik wana péléng an tampa witu ung katanaan itii makaz witi Pafos. Im witu ni séra é nimasungkulan karia ni tou Yahudi, si makangaran Bar-Yesus. Si tou itii é meriara wo nabi towo.

⁷Ni sia éng kalo ni gubernur ung katanaan itii, si makangaran Sergius Paulus. Si gubernur itii én totoz tulap. Ni sia én timawahmé si Barnabas wo si Saulus pahpaan ni sia ém paaz in tumalinga u nuwu' ni Opo Empung.

⁸Taan si Bar-Yesus si witu u nunuwu'en Yunani pahkuan Elimas si meriara itii é mahapé-apé' wia si Barnabas wo si Saulus. Pahtututu'enna si gubernur wo sia zéi'kan ma'éman wia si Yesus.

⁹Taan si Saulus si pahkuan kangkasii im Paulus si kinawasa ni Roh Lenas é nimerena wia ni sia,

¹⁰ang kumua, “É oki' ni tonaas né sétang! Ni ko é mawuta-wuta a léwo'an wo an towo. Ni ko éng kakoro' ang kaulitan. Makaz sawisa u lalan terén ni Opo Empung im pahséa'mu?

¹¹In tarékan, ilekenola, si Opo Empung é mukum ni ko. Ni ko é maletok. Woo pirana endo ni ko én zéi'kan mahile-ilekla u sena' ni endo.” In toro niitukan, si tou itii mahpendanla um werenna én tanu a liniklik u semu wo ung karimbengbengan. Karia i mahringka-ringkap ni sia mahpenéro tou i mahkit ni sia.

¹²I si gubernur nimilekla u nimamuali itii, ni sia é nima'éman wia si Yesus. Ni sia é mengusi-ngusingsing im wana an tutuzu' tumoro si Mahpiara.

¹³A si Paulus wo sé kakariana tumula'umé um Pafos a suméngkota witi Perga um witi Pamfilia. Taan ni séra é méitula'umé ni Yohanes witu a sia mawurima witi Yerusalem.

¹⁴Wo im witi Perga, si Paulus wo sé kakariana é meméhé-méhé i limampang makaz witi Antiokhia propinsi Pisidia. In endo Sabat ni séra nimuntepa a rumumezla witi walé peraragésan né tou Yahudi.

¹⁵I nimakabacamola ung kitap Torat wo um pinantik né nabi, sé tonaas um walé peraragésan é nimatuma tou i meligau wia si Paulus wo si Barnabas in téntii, “Katuari-katuari, sa kamu wéwéhan un ipahkukua i maheenté' um pa'émanen né tou kenu, ikuamoma!”

¹⁶A rumendaié si Paulus, mayata u lengenna ang kumuama wia ni séra, “É katuari-katuari tou Israel wo ni kamu sé maindé' si Opo Empung, talingana!

¹⁷ Si Opo Empung si pahongko-ongkotan né tou Israel é niméléngo sé nimaopota wo nimangun ni séra nimalakez, i ni séra witi tana' Mesir in tou limepuh uman. Karia ung kawasa-Na ni séra é méiondol-Namé im witi tana' Mesir.

¹⁸ Epatna pulu' ta'un si Opo Empung nimezen wana am pahmualin néra wia ni Sia im witi kapelasan.

¹⁹ Kumawusa si Opo Empung ing kimemuma sé pitu tahsasana wanua sé witi tana' Kanaan, an ipeméténg-Nala un tana' itii wia ni séra i maéndo anu né nimaopota.

²⁰ Niitu péléng nimamuali ém woo epatna atus wo limana pulu' ta'un. Am péléngela ni Opo Empung sé menonotoz in ulit kaapa zéi'kan am pahwangunen né tou, makaz witu un oras ni nabi Samuel.

²¹ In toro niitumo, a séra mahaléila si tou i maéndo kolano néra. A séra wéhanla ni Opo Empung si Saul, oki' ni Kish si wia sé suzu ni Benyamin i maéndo kolano néra. Ni sia nimaéndo kolano néra ung kauréna én epatna pulu' ta'un.

²² I si Saul zinéi'mola ni Opo Empung ing kolano, a Sia méléngla si Daud i sumawel si Saul. Tumoro si Daud, si Opo Empung éng kimua in téntii, ‘Ni Aku é nimakailekola si Daud si oki' ni Isai. Ni sia é mahwangun un até-Ku mahpaa-paaz, wo mamangun péléng ang kapaaz-Ku.’

²³Niitumo, tanu u mémoitaaz ni Opo Empung, ni Sia é méléng si suzu ni Daud i milot sé tou Israel im witu un ukuman wana a singkéla' néra. Ni Siamo si Yesus.

²⁴ Puunala Sia i méyé, si tou makangaran Yohanes é nimapata'umoma wia péléng sé tou Israel in tumula'umola a singkéla' néra wo méhéla un tou néra i saranin.

²⁵ I si Yohanes mahsasampeto um paayangenna, ang kuana wia sé tou, ‘Kuan niou ni aku é séi? Ni aku én zéi'kan ni Sia si pengento-ngento'en niou. Un ulitna ni Sia i méyé én tumondongé ni aku. Maan i muka uman u sapatu-Na, ni aku én zéi'kan wangun.’

²⁶Katuari-katuariku suzu ni Abraham wo ni kamu kasii sé maindé' si Opo Empung. U Nuwu' i ni kita én ipilot im witu un ukuman wana a singkéla' é mémoikua ni Opo Empung wia ni kita.

²⁷Taan sé tou witi Yerusalem wo sé tonaas néra én zéi'kan mata'u si Yesus. Ni Sia én tinotoz nérala im wunu'en, karia in téntu a méikua né nabi am pahbacan sekez in endo Sabat é linekep néramola.

²⁸ Zozo' ni séra zéi'kan méikailek un toro maéndo kawalian i munu' ni Sia, taan ni séra nimenutu'la wia si Pilatus i munu' ni Sia.

²⁹I linekep néramola péléng a méipantik né nabi tumoro ni Sia, a Sia itumpa néramé im witu u salip a Sia maileweng néramé.

³⁰Taan ni Sia é méitoumomé sumaup ni Opo Empung im wia sé nimaté.

³¹Woopirana endo ni Sia i nimapailek un tou-Na wia sé tou sé mahkiita ni Sia rengané witi Galilea makaz witi Yerusalem. Ni séramo sé in tarékan mahkuama a niilek wo an tinalinga néra tumoro ni Sia wia sé tou Israel.

³²Niitumo, in tarékan ni kai zua é mahwoka' u nuwu' lé'os sa u méitaaz ni Opo Empung wia sé nimaopota,

³³ linekep-Namola wia ni kita karia in timoumé sumaup si Yesus im wia sé nimaté. Tanu u méipantik witu ung kitap Mazmur kazua in téntii, ‘Ni Komo si Oki'-Ku! In endo kenu ni Aku é nimaéndomo Ama'-Mu.’

³⁴ Si Opo Empung én timoumomé ni Sia sumaup im wia sé nimaté wo ni Sia én zéi'mo mahpaté-patéla, tanu u méikuamola ni Opo Empung, ‘Ni Aku é méhé wia ni ko un taaz lenas un toro pa'émanen, u méiwéhé-Kumo wia si Daud.’

³⁵ Téntu kangkasii u méipantik witu u Mazmur walina in téntii, ‘Zéi'kan iwaya-Mu un awak ni Tou Linenas-Mu kenu i mawuul.’

³⁶Si Daud i menou-nou é mahwangun péléng ang kapaaz ni Opo Empung. A sia matéla an ilewengla witu ung kasaru né nimaopona. Un awakna é nimawuul.

³⁷Taan si Yesus si méitoumomé sumaup ni Opo Empung im wia sé nimaté, un awakna én zéi'kan nimawuul.

³⁸Niitumo katuari-katuari, kata'uan nioula im pahpaano ni Sia, ni kamu é nimakaileko um wowoka' tumoro un ampungan wana a singkéla' niou. Wo un ukum Torat én zéi'kan mata'u mangun ni kamu niéndo ulit.

³⁹Niitumo séi uman si ma'éman wia si Yesus, ni sia é niéndo ulit.

⁴⁰Pahpaano niitu, ni kamu é léwo'zéi' in tuméga-tégam, wo zéi'kan mamuali wia ni kamu apa a mémoikua né nabi wana am pinantik néra in téntii,

⁴¹ ‘Méhéla genang é kamu in tou meroros sé tou walina. Ni kamu én ikanganga wo maté. Pahpaan oras in tarékan ni Aku é mahpaayang um paayangen zéi'kan pa'émanen niou, zozo' niitu isiritama né tou wia ni kamu.’ ”

⁴²Makakuala niitu, a mondolé si Paulus wo si Barnabas im witu um walé peraragésan itii. Sé tou witu é mahaléi wia ni séra i mawurimé sumaup in endo Sabat tumondong i mékumua sumaup niana.

⁴³Kumawusa séra i rimagés, lakez sé tou Yahudi karia né tou zéi'kan Yahudi sé maindé' wia si Opo Empung mahkiit si Paulus wo si Barnabas. Sé zua aatu itii é mahtuzu' wo mahsésa wia ni séra wo séra zéi'kan mazéi' i menou-nou niméré' witu ung kamang tatambér ni Opo Empung.

⁴⁴Witu un endo Sabat tumondong, tawi péléng sé tou witi wanua tua'na itii é nimaréwok in tumalinga u nuwu' ni Opo Empung.

⁴⁵Taan sé tou Yahudi é mahtéutéu pahpaan nimilekla sé tou lakez itii. Wo péléng an ipahkua ni Paulus ém pahséro'an wo ipahzéi' néra.

⁴⁶Taan karia im wuaya si Paulus wo si Barnabas mahkua wia sé tou itii, “Ulit u Nuwu' ni Opo Empung é léwo'zéi' in ipuuna iwoka' wia ni kamu in tou Yahudi, taan ni kamu é soo ma'éman. Im witu ung genang niou, ni kamu é mahgenangla un tou niou én zéi'kan wangun i makailek ung katou-touan makaz ing kauré-uré. Niitumo in tarékan ni kamu én itula'u nai i mangé wia sé zéi'kan tou Yahudi i mahwoka' u Nuwu' ni Opo Empung itii.

⁴⁷Pahpaan ni kai ém pineréntaan ni Opo Empung ung kenu, ‘Ni Aku én timotozo ni ko i mahkit sé tou zéi'kan Yahudi méyé wia ni Aku, wo ni ko é mangé mapata'u wia péléng sé tou i ni séra én ipilot im witu un ukuman wana a singkéla' néra tanumokan u solo mahsena'ma wia ni séra.’ ”

⁴⁸Tumalingamé niitu, péléng sé tou zéi'kan Yahudi é mahpaa-paaz karia i mahsigi' wo mahlooz u nuwu' ni Opo Empung. Tumondong niitu, péléng sé tou sé tinotozo ni Opo Empung i makailek ung katou-touan makaz ing kauré-uré é nima'éman.

⁴⁹An ikawoka'ma u Nuwu' ni Opo Empung wana péléng un tana' itii.

⁵⁰Taan sé tou Yahudi é mahaker sé wéwéné pahsigi-sigi'en sé maindé' si Opo Empung wo sé tonaas witu um wanua tua'na itii. Ni séra zimézéha si Paulus wo si Barnabas wo nimohomé ni séra zua im witi tana' itii.

⁵¹ A si Paulus wo si Barnabas tumangkarla an awu witu un a'é néra i mapagenang wia sé tou itii i si Opo Empung é mukum ni séra. Kumawusa niitu ni séra zua nimangé witi Ikonium.

⁵²Sé mahkiit-kiit si Yesus sé witi Antiokhia én totoz mahpaa-paaz wo kinawasa ni Roh Lenas.