Read Tombulu Kisah Rasul-rasul 16 Bible Online

Kisah Rasul-rasul 16 - Tombulu bible

Kisah Rasul-rasul 16

¹A si Paulus mangé kasii witi Derbe wo Listra. Im witu, wéwéhan si mahkiit si Yesus makangaran Timotius. Si ina'na én tou Yahudi si ma'émano wia si Yesus wo si ama'na én tou Yunani.

²Si Timotius éng kata'uan né katuari esa pa'émanen witi Listra wo Ikonium in tou lé'os.

³Kapaaz ni Paulus, si Timotius é lumampang kariana. Pahpaan péléng sé tou Yahudi sé witi tana' itii é mata'u i si ama'na én tou Yunani, niitumo ni sia é méipekisunatla ni Paulus.

⁴Im wana am pahlampangan néra i mahliklik am wanua tua'na, si Paulus wo si Silas é mahkua an tinotozla né aatu ni Yesus wo né penatua witi Yerusalem. Ni séra mahkua niitu wo sé jamaat toro mahkiit an tinotoz itii.

⁵Karia in téntu, um pa'émanen né jamaat éng kaenté'namo. Wo sekez in endo, sé tou ma'éman éng kalakeznamo.

⁶Si Paulus wo sé kakariana é limangkoi umané un tana' Frigia wo tana' Galatia, pahpaan si Roh Lenas siméro'la ni séra i mahwoka' u Nuwu' Lé'os tumoro si Yesus wia sé tou witi Asia.

⁷I ni séra méikaayola witi Misia, ni séra mahuuntep witi tana' Bitinia, taan ni séra én zéi'kan niénéan ni Roh ni Yesus i mangé wana.

⁸Niitumo ni séra é limangkoi umané u Misia an ikaayola witi Troas.

⁹I nimawengimola, wéwéhan u méipapailek ni Mahpiara wia si Paulus. Ni sia nimilek si tou Makedonia rimendai wo mekitulung wia ni sia, kuana, “Méyépé' wia'i wo tulungené kai.”

¹⁰I si Paulus nimilekola niitu, ni kai[18] rengan i nimimekla i mangé witi Makedonia. Pahpaan mengiité um pina'ilek ni Paulus itii, ni kai én timotozla i si Opo Empung én timawah ni kai i mangé mahwoka' u Nuwu' Lé'os tumoro si Yesus wia sé tou witi Makedonia.

¹¹Ni kai timula'umé un Troas a suméngkota witi Samotrake. Masandomé, a ni kai mangé witi Neapolis um witi tana' Makedonia.

¹²Im witi Neapolis a ni kai lumampang mangé witi Filipi. Um wanua tua'na itii én totoz ipahpuu-puuna im witi tana' Makedonia, wo kasii um wanua tua'na itii éng kinawasa né pemerénta Romawi. Im witu ni kai é nimento'mé woopirana endo.

¹³In endo Sabat, ni kai nimondolé limangkoié u loloangan wanua tua'na. Ni kai nimahkiité un tembir u so'so'an an ikailekla un tampa pahpengaléian né tou Yahudi, pahpaan pahgenangen naila im witu ém wéwéhan un tampa itii. Im witu ni kai rimumezla a sumirita karia né wéwéné sé nimaréwok witu.

¹⁴Si esaané im wia sé wéwéné itii é makangaran Lidia. Ni sia ém witi wanua tua'na Tiatira a méyé, memamangkér a roko' tina' wo meraragés wia si Opo Empung. Si Mahpiara é nimangun ni sia nimatulap makaz ni sia én totoz mahwéhé genang wana an ipahkua ni Paulus.

¹⁵Si wéwéné itii wo sé sana awuna é sinaranila. A sia tumawahmé ni kai, kuana, “Sa pahgenangen nioula ni aku én uli-ulit ma'éman wia si Mahpiara, méyémo mamento' witi waléku.” Ni sia én totoz menutu' ni kai makaz ung kapaazna kiniitan naila.

¹⁶I sana endo, ni kai é nimangé sumaup witi walé pahpengaléian né tou Yahudi itii, ni kai nimasungkulan karia ni wéwéné pahata-atan. Si wéwéné itii éng kinawasa ni roh menénémbo makaz ni sia én toro kumua apa u mamuali in tumondong. Karia ni sia mahtémboma u mamuali wia sé tou mahéyéma wia ni sia, lakez an zoit pahkailekan né tuangna.

¹⁷Ni sia mahipusé wia si Paulus wo ni kai karia i mahkérét, “Sé tou kenumo sé ata ni Opo Empung Si Totoz Rakék. Ni séra é mahwoka' wia ni kita kura wo toro ipilot im witu un ukuman wana a singkéla'.”

¹⁸Woo pirana endomo si wéwéné itii i mengasa-ngasar téntu. I si Paulus seso'mo a sia luméngéhma muri ang kumua wia si roh si simelaz wia si wéwéné itii, “Karia u ngaran ni Yesus Kristus, mondolé ko im wia si wéwéné itii.” In toro niitukan si roh itii éng kimii-kiit i nimondolé.

¹⁹Ing kinata'uanla né tuang ni wéwéné itii i ni séra én zéi'mo mata'u makailek zoit mengiité si wéwéné itii, a si Paulus wo si Silas tionan nérala, ang kéhongené méipahwalima witi unez um pahkaréwokan né tou in isaru wia sé mahkawasa witu um wanua tua'na itii.

²⁰I ni séra zua méipahwali néramoma wia sé mahkawasa witu um wanua tua'na itii, a séra kumua, “Sé zua tou Yahudi kenu é mahrikoka' wia um wanua tua'nata kenu.

²¹Ni séra kangkasii é mahtuzu' ang kinanaram néra an zéi'kan toro énéanta kaapa kiitenta in tou Roma.”

²²Tumalingamé niitu, sé tou lakez witu kangkasii éng kimaria ni séra i mahsaru si Paulus wo si Silas. A sé mahkawasa um wanua tua'na itii matuma tou i masimangsangé ang kinarai néra zua wo simaluk ni séra.

²³Ni séra zua ém pinakalakezan nérala i sinaluk. A séra iuntepa witi bui. Si tonaas né menénéiz um bui ém pineréntama in tuméizla lé'os wia ni séra zua.

²⁴Mengiit um perénta itii, ni séra zua é méiuntepa ni tonaas né menénéiz um bui witi tampa totoz untep wo an a'é néra zua é rinopit karia ang kai roropit.

²⁵Im woo wengi uré, si Paulus wo si Silas mahmengaléi wo mahkantar a lolooz wia si Opo Empung. Sé tou walina sé binui é mahtalinga ni séra zua.

²⁶Kumompo'mé é mahéhzo'mo totoz repet makaz an to'tolan um bui itii én ogémokan. In toro niitukan, péléng am pepenet é nimawukama wo a méiranté wia péléng sé binui é nimawukama.

²⁷I si tonaas né menénéiz um bui nimawongkémé, ilekennama am pepenet am bui ém péléngo nimawuka. A sawutennamé um pisouna i mapahwuwunu', pahpaan ni sia mahgenangla i sé tou binui é nimakatingkasoma.

²⁸Taan si Paulus éng kiméréta wia si tonaas né menénéiz um bui itii, “Tia'mo mapahwuwunu', ni kai péléng ém wia'ipé'.”

²⁹Tumalingamé niitu, si tonaas itii é nimatuma tou i mahalimé obor. A sia kumara'ma a muntepa witu untep um bui, wo kariamo i mahgerger sia kumuruzla witu u sinaru ni Paulus wo ni Silas.

³⁰A séra zua iondolnamé im witu um bui, ang kumuama, “É tuang, apa u léwo'zéi' im wangunengku wo ni aku toro ipilot im witu un ukuman wana a singkéla'?”

³¹A séra mingkotla, “Ma'émanola wia si Yesus Kristus Mahpiara wo ni ko karia péléng sé mahento' witi walému, ipilot im witu un ukuman wana a singkéla'.”

³²A séra zua mahwoka' u Nuwu' ni Yesus Mahpiara wia ni sia wo péléng sé tou witu um waléna.

³³Im wengi uré itiikan, si tonaas né menénéiz um bui itii nimahwalima ni séra zua am péhé'annala am péla' néra. In toro niitukan, si tonaas itii wo sé sana awuna niméhéla un tou néra i sinarani.

³⁴A séra zua ipahwalinama witi waléna a mimekla ung kanen néra. Ni sia én totoz mahpaa-paaz pahpaan ni sia wo péléng sé mahento' witu um waléna é nima'éman wia si Opo Empung.

³⁵Masandomé im woondo, sé mahkawasa witu um wanua tua'na itii matuma sé tou néra i nimangé wia si tonaas né menénéiz um bui itii i makumua, “Ipilotola sé zua itii!”

³⁶A si tonaas itii kumua wia si Paulus u méikuamé itii, in téntii, “Sé mahkawasa um wanua tua'na kenu é nimatumé i milot ni kamu zua. Niitumo in tarékan, ni kamu é mondoloma im wia'i wo mile-ilek im witi lalan!”

³⁷Taan si Paulus éng kimua umanla wia sé tou itii, “Zozo' in zéi'kampé' tinotoz am winangun nai in ulit kaapa zéi'kan, sé mahkawasa wia um wanua tua'na kenu é nimatumola tou i simaluk ni kai in tou Roma, witu u sinaru né tou lakez. Tumondong niitu, ni kai kasii é méiuntep nérala witi bui. Wo in tarékan, ni kai én ipilot néra karia in ipahwuni-wuni? Tantumo ni kai é soo! Iatumomé sé mahkawasa itii i méyé wia'i i mémilot ni kai.”

³⁸Sé tou méiatumé itii é makimua wia sé mahkawasa um wanua tua'na, péléng a méikuamé ni Paulus. Kaitalingamé i si Paulus wo si Silas én tou Roma, sé mahkawasa itii én totoz maindé'.

³⁹A sé mahkawasa itii méyé wia si Paulus wo si Silas i mahaléi ampung. A sé aatu itii ipahwali nérama i méiondola a mahaléi wia ni séra zua in tumula'uma um wanua tua'na itii.

⁴⁰Ni séra zua mondola im witi bui itii, a mangé witi walé ni Lidia. Im witu ni séra zua é nimahilekan karia né tou esa pa'émanen wo nimenté' un até néra. Tumondong niitu, a sé zua aatu itii mangé.