Read Tombulu Kisah Rasul-rasul 18 Bible Online

Kisah Rasul-rasul 18 - Tombulu bible

Kisah Rasul-rasul 18

¹A si Paulus tumula'umé u Atena a mangé witi Korintus.

²Im witu ni sia é nimahilekan karia ni tou Yahudi makangaran Akwila si tou Pontus. Si Akwila én taré méyé im witi Italia karia ni Priskila si mahayona. Ni séra niméyé pahpaan si kaisar Klaudius é nimerénta wo péléng sé tou Yahudi é léwo'zéi' mondolé im witi Roma. Si Paulus é matimuli witi walé néra.

³Si Paulus nimento' karia néra pahpaan um pahpaayangenna karia ni Akwila é masuat. Ni séra mahpaayang mahwali-wali i memamangun an ténda.

⁴Sekez in endo Sabat, si Paulus é mengangangé witi walé peraragésan né tou Yahudi, i mahsirita wo menutu' sé tou Yahudi wo sé tou Yunani i ma'éman wia si Yesus.

⁵I si Silas wo si Timotius niméyé im witi Makedonia, péléng un témpo ni Paulus ém pahpakén uman i mahwoka' u Nuwu' Lé'os wo mahkua am pina'ilek wo an tinalingana wia sé tou Yahudi, i si Yesus é si Mesias.

⁶Taan pahpaan sé tou itii é mahsaru wo mahséro' uman taré wia ni sia, niitumo si Paulus timangkarla an awu witu ung kinaraina, i mapagenang wia ni séra i ni séra é simala'mola, ang kumua wia ni séra, “Ni kamu in esa sé nimangun si Opo Empung i mukum ni kamu. Zéi'kan sumala'ku. Rengan in tarékan, ni aku é mangé wia sé tou zéi'kan Yahudi i mahwoka' u Nuwu' Lé'os tumoro si Yesus.”

⁷A si Paulus mondolé im witu um walé peraragésan itii a mangé witi walé ni Titius Yustus, si maindé' wia si Opo Empung. Um waléna é nimatatéran wo um walé peraragésan né tou Yahudi.

⁸Taan si Krispus, si tonaas um walé peraragésan né tou Yahudi witi Korintus wo péléng sé mahento' witu um waléna é nima'éman wia si Yesus Mahpiara. Wo lakez kasii sé tou witi Korintus sé timalinga an ipahwoka' ni Paulus é nima'éman wia si Yesus wo niméhé un tou néra i sinarani.

⁹I sana wengi, si Paulus wéwéhan um pina'ilek. Im witu um pina'ilekna, si Mahpiara éng kimua wia ni sia, “Tia'mo ko maindé'! Tia'mo kumana' i mahwoka' u Nuwu' Lé'os wo tia'mo ko menes uman.

¹⁰Pahpaan ni Aku é memali-mali kariamu wo zéi'kan siapa si toro kumotkot wo zumézéha ni ko, pahpaan sé tou-Ku im wia um wanua tua'na kenu é lakez.”

¹¹Niitumo si Paulus é nimento' witi Korintus ung kauréna é sana ta'un wo enemna loloho'en. Ni sia mahtuzu' u Nuwu' ni Opo Empung wia sé tou witi wanua tua'na itii.

¹²Taan i si Galio nimaéndomoma gubernur witi Akhaya, sé tou Yahudi é nimaesaan i mahsaru si Paulus. Tumondong niitu, ni sia é méipahwali nérama witi penonotozan ulit kaapa zéi'kan am pahwangunen né tou.

¹³Ang kuan néra wia si gubernur witi Akhaya, “Si tou kenu é mahaker sé tou lakez i mahragés wia si Opo Empung taan zéi'kan masuat wo un ukum Torat.”

¹⁴Taan i si Paulus in taré mahnunuwu', si gubernur Galio é rengan ing kimuama wia sé tou Yahudi itii, “É tou Yahudi! Sa si tou kenu ém pahtokéan niou a sumala'na kaapa a léwo'anna, tantumo an ipahtoké niou itii én talingangku.

¹⁵Taan ang kenu, ni kamu é mahéndo-éndoan tumoro un ipahkua kaapa u ngaran kaapa un ukum um pa'émanen pahkiiten niou. Niitumo ni kamumo sé sumampetla um pahéndo-éndoan niou itii, ni aku é soo tumotoz am pahéndo-éndoan tanu niitu.”

¹⁶Tumondong niitu, ni séra iwohomé ni Galio im witi penonotozan itii.

¹⁷A séra péléng matumion si Sostenes si tonaas um walé peraragésan né tou Yahudi. Im witi penonotozan, ni sia ém pahwélwélen néra taan si Galio én zéi'kan pandung.

¹⁸ Si Paulus ém woopirana endopé' i nimahento'mé witi Korintus. A sia tumuzu'la wia sé katuari esa pa'émanen witu, a suméngkota witi Siria karia ni Priskila wo ni Akwila. Im witi Kengkrea si Paulus é limo'gasla um wuukna pahpaan un taazna wia si Opo Empung.

¹⁹A séra ikaayola witi Efesus. Im witu, si Paulus én timula'umé si Priskila wo si Akwila. Si Paulus mengesama i nimuntepa witu um walé peraragésan né tou Yahudi a sumirita karia né tou Yahudi.

²⁰Sé tou Yahudi é nimahaléi wia si Paulus i mento'ma karia néra uré oki', taan zéi'kan kiniitannala.

²¹Ni sia tumuzu'la i mangémo wo kimuama, “Sa kapaaz ni Opo Empung, ni aku é mawurimé sumaup wia'i.” A sia tumula'umé u Efesus.

²²I méikaayomola witi Kaisarea, sia tumumpala a lumampang mangé witi Yerusalem i masumigi' wia sé jamaat witu. A sia mangé witi Antiokhia.

²³Ni sia nimento' witu ém woopirana endo. A sia malumiklik am wanua witi tana' Galatia wo Frigia i mamenté' un até né tou ma'éman witu.

²⁴Karegas niitu, wéwéhan si tou Yahudi makangaran Apolos niméyé witi Efesus. Ni sia én tou Aleksandria. Ni sia é siga' i mahnuwu' wo totoz mata'u um Pinantik Lenas.

²⁵Ni sia én tinuzu'mo tumoro si Yesus Mahpiara. Ni sia ém wuaya i mahnuwu' wo totoz mahterang i mahtuzu' tumoro si Yesus. Taan zozo'pé' in téntu, ung kata'uanna én akaz uman u sarani ni Yohanes Menanarani.

²⁶Karia im wuaya ni sia rengan i mahtuzu' witi walé peraragésan né tou Yahudi. In tinalingala ni Priskila wo ni Akwila a sia ipahwali nérama mangé witi walé néra. Im witu ni séra én uli-ulit timuzu'la wia ni sia u lalan kura ing kumiit si Opo Empung.

²⁷Pahpaan si Apolos éng gimenang i lumeweta mangé witi Akhaya, sé katuari esa pa'émanen witi Efesus é niméhéma um pinantik wia sé tou ma'éman witu, wo séra sumungkul ni sia. I ni sia méikaayola witi Akhaya, ni sia én totoz uli-ulit mahsawang sé tou ma'éman pahpaan ung kamang tatambér ni Opo Empung.

²⁸Pahpaan ni sia én totoz wuaya i mahzéi-zéi'an karia né tou Yahudi witu u sinaru né tou lakez. Méipapailekna am pinantik witu um Pinantik Lenas an tumuzu'mé i si Yesus é si Mesias.