Read Tombulu Kisah Rasul-rasul 19 Bible Online

Kisah Rasul-rasul 19 - Tombulu bible

Kisah Rasul-rasul 19

¹I si Apolos witipé' Korintus, si Paulus é nimakaliklikola am wanua méikazuhu witi tana' itii an ikaayola witi Efesus. Im witi Efesus, ni sia nimahilekan karia né woopira tou ma'éman wia si Yesus.

²A sia meligau wia ni séra, “I ni kamu nima'émanla wia si Yesus, apa ni kamu é nimakailekola si Roh Lenas?” A sera mingkotla, “Zéi'kampé', maan taré i nimahtali-talingala im wéwéhan si Roh Lenas én zéi'kampé'.”

³A si Paulus lumigaula sumaup wia ni séra, “Sa téntu, karia u sasarani ni séi ni kamu i sinarani?” A séra mingkotla, “Ni kai i sinarani éng karia u sasarani ni Yohanes Menanarani.”

⁴ Ang kuan ni Paulus wia ni séra, “Si Yohanes i mahsarani sé tou én tumuzu'mé i sé tou én timula'umola a singkéla' néra. Ni sia kangkasii éng kimua wia sé tou lakez i ni séra é léwo'zéi' i ma'éman wia si Tou si méyé tumondongé ni sia. Si Tou itii é makangaran Yesus.”

⁵Tumalingamé un téntu, a séra saranila witu u ngaran ni Yesus Mahpiara.

⁶I si Paulus zimeta'la u lengenna witu un atas néra, an tumumpamé si Roh Lenas wia ni séra. A séra rengan i mahnuwu' karia a nunuwu'en a méiwéhémé ni Roh Lenas wo kasii mahkua a méikuamé ni Opo Empung.

⁷Ung kalakez néra péléng ém woo mapulu' wo zua tou.

⁸Teluna loloho'en ung kauréna si Paulus i mengangangé witi walé peraragésan né tou Yahudi. Ni sia ém wuaya i mahnuwu' wo mahzéi-zéi'an karia né tou witu, i mahwawangun ni séra wo ma'éman tumoro ung Kakolanoan ni Opo Empung.

⁹Taan wéwéhan sé woopira tou soo tumalinga wo soo ma'éman. Witu u sinaru né tou lakez, pahséro'an néra uman taré u lalan kura ing kumiit si Mahpiara. Niitumo ni séra é méitula'umé ni Paulus, wo sé tou ma'éman wia si Yesus é méitampasnamé. Sekez in endo ni sia é mahsirita karia néra witi tampa pahtata'uan makangaran Tiranus.

¹⁰Zuana ta'un ung kauréna ni sia memamangun un téntu, taka-takazan péléng sé tou mahento' witi Asia én timalinga u Nuwu' ni Mahpiara, ni séra sé tou Yahudi wo sé tou Yunani.

¹¹Si Opo Empung nimangun a makakompo'en an zéi'kan kakuaan mengiité si Paulus.

¹²Lumouspé'mé niitu, u léso kaapa u roko' am pinahpakémola ni Paulus ém pinahalima né tou an izeta'la wia sé tou saki, nimangun sé tou saki itii nimalé'os wo nimangun sé roh léwo' sé simelaz wia sé tou é nimondolé.

¹³Wéwéhan kasii sé woopira tou Yahudi sé meriara, melili-liklik un tana' itii wo mahwawa-wa'wa' i mahwoho sé sétang simelaz wia sé tou karia u ngaran ni Yesus Mahpiara. Kuan néra wia sé sétang itii, “Karia u ngaran ni Yesus si ipahwoka' ni Paulus, mondolé im wia sé tou kenu!”

¹⁴Sé nimangun niitu é sé pitu tuama oki' ni Skewa. Si Skewa én tonaas né walian né tou Yahudi.

¹⁵Taan si roh léwo' itii é nimingkot umané in téntii, “Kata'uangku séi si Yesus, téntu kangkasii si Paulus éng kata'uangku. Taan ni kamu, séi wé?”

¹⁶A si tou sinelazan ni roh léwo' itii kumonta'ma, zimézéhama ang kumalama ni séra, a séra tumingkasé im witu um walé itii karia im pélaan wo rimonai pahpaan ung karai néra é sinangsangé.

¹⁷U nimamuali itii éng kinata'uana péléng né tou witi Efesus, ni séra in tou Yahudi kaapa in tou Yunani. Niitumo, ni séra péléng éng kinaindé'an a lumooz u ngaran ni Yesus Mahpiara.

¹⁸Lakez im wia sé tou nima'émano itii é niméyé a makaulitla a léwo'an pahmualin néra witu u sinaru né tou lakez.

¹⁹Wo lakez kangkasii im wia ni séra sé meriara, riméwoké ang kitap am pinantikan an tutuzu' i mahriara wo timutungla niitu witu u sinaru né tou lakez. Ang kitap itii sa iwangkéra én toro makaileké woo limana pulu' riwu zoit péra'.[21]

²⁰Karia in téntu, u Nuwu' Lé'os ni Mahpiara éng kalousna in ipahkawoka'ma wo kalousna i mahwangun sé tou i ma'éman.

²¹Kumawusa u nimamuali itii, si Roh nimangun si Paulus timotozla i mangé witi Yerusalem kimiita u Makedonia wo u Akhaya. Kuana, “Sa nimangémomé witi Yerusalem, ni aku kangkasii é léwo'zei' i mangé witi Roma.”

²²A sia matuma sé zua menanawangna, si Timotius wo si Erastus mahpuunama i mangé witi Makedonia. Taan si Paulus in esa én urékané oki' i nimahento'mé witi Asia.

²³In toro niitu, im witi Efesus é nimarikoka' pahpaan wéwéhan sé tou sé mahsaru an tutuzu' ni Paulus tumoro u lalan kura ing kumiit si Mahpiara.

²⁴U nimamuali itii éng kinatarémé ni Demetrius si memamangun am péra'. Ni sia é memamangun am peperongen péra' kori' an tanu um walé peraragésan wia si pa'opoen wéwéné makangaran Artemis. Lakez an zoit pahkailekan né memamaayangna i mahpaayang niitu.

²⁵Ni sia riméwoké sé mahpaa-paayangna wo sé memamangun am péra' walina, ang kumua wia ni séra, “Katuari-katuari, tantu éng kata'uan niouo sa um pahkailekantamé zoit ém witu um paayangen kenu.

²⁶In tarékan, ni kamu é nimileko wo timalingamo kura si Paulus i mahenou wo mahlululu sé tou lakez, zéi'kan uman wia u Efesus taan kangkasii tawi péléng am witi tana' Asia, karia i mahkua sa am winangun né tou én zéi'kan opo-opo.

²⁷Karia in téntu, zéi'kan uman am pahpaayangenta kenu a séro'an né tou, taan kangkasii um walé peraragésan wia si pa'opoen Artemis, si wangko' itii én zéi'mo siapa torona. Téntu kangkasii, ung kawangko'an ni pa'opoen wéwéné Artemis si pahongkotan péléng né tou wia Asia wo wia ung kaayahan é mazéi'.”

²⁸Kaitalingamé niitu, sé tou itii én totoz maupi', a séra mahkérét, “Loozela si Artemis, si pa'opoen wéwéné né tou Efesus!”

²⁹Péléng am witi wanua tua'na Efesus é nimarikoka'. Sé tou lakez é nimahwalima i matimion si Gayus wo si Aristarkhus an ipahwalima witi tampa peréréwokan né tou lakez. Ni séra zua én tou Makedonia wo kawali ni Paulus.

³⁰In toro niitu, si Paulus ém paaz mahaangé witu un unez né tou lakez itii taan zéi'kan méiwéhémé né tou ma'éman witu.

³¹Sé woopira tonaas witi Asia sé mahkaria wo si Paulus kangkasii é nimatumé tou i mékumua wia ni sia in tia'mo mahuuntep witi tampa peréréwokan né tou lakez itii.

³²Karegas niitu, sé tou nimaréwok witi tampa itii é mengéré-ngérét. Sé walina mahkua in téntii wo sé walina é mahkua in téntu, pahpaan ung kinaréwokan néra itii é rikoka'mo wo lakez sé tou witu én zéi'kan mata'u kaa séra nimaréwoké.

³³A si tou makangaran Aleksander itondoma né tou Yahudi nimangé witi puuna, pahpaan pahgenangen nérala i ni sia si nimangun ni séra nimarikoka'. A sia rengan nimayata u lengenna i mahnunuwu' ing kumelung un touna witu u sinaru né tou lakez itii.

³⁴Taan ing kinata'uan nérala i si Aleksander itii én tou Yahudi,[22] a séra kumérét mahwali-wali, “Loozela si Artemis, si pa'opoen wéwéné né tou Efesus!” Ni séra i mahkérét téntu ém woo zuana jam ung kauréna.

³⁵Ing kamurian, si memamantik né pemerénta um wanua tua'na itii nimangun ni séra nimapenes, ang kumua wia ni séra, “É tou Efesus! Séi si tou wia ung kaayahan kenu, si zéi'kan mata'u sa sé tou wia um wanua tua'na Efesus kenu, sé uli-ulit mahimek um walé peraragésan wia si pa'opoen wéwéné Artemis si totoz wangko', wo si patongna um witi langit[23] an tumumpamé?

³⁶Zéi'kan siapa si tou toro zuméi' niitu. Niitumo ni kamu én tia'mo mahrikoka' wo tia'mo wayaan ung kamualian.

³⁷Pahpaan ni kamu é nimahwalimomé sé tou zua kenu, zozo' ni séra én zéi'kan rimemu'mé im witu um walé peraragésan wia si pa'opoen wéwénéta wo zéi'kan mahséro' u ngaranna.

³⁸Niitumo, sa wéwéhan un ipahtoké ni Demetrius wo né memamaayangna wia si tou, ni séra én toro mahali un ipahtoké néra itii witi tampa pahtotozan in ulit kaapa zéi'kan am pahwangunen né tou, kaapa wia si gubernur. Im witumo ni séra én toro kumua an ipahtoké néra.

³⁹Sa wéwéhan am walina ang kapaaz niou, tawimo ang kapaaz niou itii én isampetla witi pahtotozan né tou mengiit un ukum.

⁴⁰Pahapaan u nimamuali in tarékan én toro mangun ni kita ikaléwo'. Sé mahkawasa né Romawi én toro métumoké i ni kita mahrikoka' é mahsasaru ni séra. Pahpaan zéi'kan siapa un toro ikuata i mahuulit um pahréwo-réwokan zéi'mo kaulitan kenu.”

⁴¹Makakuala un téntu a séra péléng ipekiwurinama.