Read Tombulu Kisah Rasul-rasul 20 Bible Online

Kisah Rasul-rasul 20 - Tombulu bible

Kisah Rasul-rasul 20

¹Ing kimana'mola u rikoka' witi Efesus, tawahené ni Paulus sé tou ma'éman witu wo nimenté' un até néra. A sia tumuzu'la a mangé witi Makedonia.

²Ni sia é mahliklik am wanua witi tana' Makedonia wo lakez a sésésana wia sé katuari esa pa'émanen witu i maheenté' un até néra. A sia ikaayola witi Yunani.

³In teluna loloho'eno mahento' witu, a sia mahséséngkot mangé witi Siria. Taan in toro niitu sé tou Yahudi nimaesaanola i mahwuwunu' ni sia. Niitumo, ni sia timotozla i mawuri sumaup kimiité witi Makedonia.

⁴Wéwéhan sé woopira tou sé kimiit si Paulus. Ni séra é: si Sopater oki' ni Pirus si witi Berea a méyé, si Aristarkhus wo si Sekundus sé witi Tesalonika a méyé, si Gayus si tou Derbe, si Timotius wo sé tou zua makangaran Tikhikus wo Trofimus sé witi Asia a méyé.

⁵Ni séra é nimapuunama wo nimento' ni kai witi Troas.

⁶Ing kimawusoma un endo mahpésta Roti Zéi'kan Rinagian[24], a ni kai suméngkota timula'uma u Filipi a mangé witi Troas. Limana endo ung kauréna ni kai i siméngkot an ikaayola witi Troas a mahilekala karia néra. Pituna endo ung kauréna ni kai i nimento' witu.

⁷In endo kataré witu un duminggu itii, i ni kai nimaréwok mahwali-wali i memété-météng u roti ing kanen, si Paulus é mahnuwu' wia sé katuari esa pa'émanen witu makaz im wengi uré. Pahpaan ni sia éng gimenang i mangémo i masandomé.

⁸Witi porés um welah atas un tampa kinaréwokan nai é lakez a solo tinutungan.

⁹Wéwéhan si tarétumou makangaran Eutikhus rimumez witu un tétémboan. Pahpaan si Paulus én totoz uré i mahnuwu', si tarétumou itii én totozo i mahtetekel. Ing kamurian a sia katekelanla an ikanawu'mé im witi welah katelu. Ni sia é nimatémo im pinopomé né tou.

¹⁰Taan si Paulus én timumpama. Ni sia éng kimepala wia si tarétumou itii, rumawakla wia ni sia ang kumua, “Tia'mo maindé', ni sia é menou-noupé'.”

¹¹A si Paulus menéka sumaup. Pemété-météngennala u roti ang kuman mahwali-wali. I nimakaapumola, ni sia é nimauré-urépé'ma i nimahnuwu'ma makaz i nimaayahmé. A sia tumula'umé un Troas.

¹²Karegas niitu, sé tou nimahwalima si tarétumou si méikanawu'mé itii nimangé witi waléna wo ni séra péléng én totoz mahpaa-paaz pahpaan ni sia é menou-noupé'.

¹³Tumondong niitu, ni kai nimapuunama i masimaké witu u londéi tua'na a mangé witi Asos. Ni kai nimangé witu i masumungkul si Paulus tanu ung ginenangna, pahpaan ni sia i mangé witu éng kimiité ung katanaan.

¹⁴I ni kai nimahilekanola karia ni Paulus witi Asos, ni sia méipahwali naima i simakéma u londéi tua'na, a ni kai suméngkota mangé witi Metilene.

¹⁵Im witu ni kai meméhé-méhéma i siméngkot. Masandonamé u londéi tua'na sinakéan nai é mahsarumoma witi katanaan Khios. Masandomé ni kai méikaayola witi katanaan Samos, wo im witu un endo tumondongla ni kai méikaayola witi Miletus.

¹⁶Pahpaan si Paulus é merewe-rewek wo sia toro ikaayoma witi Yerusalem in endo wangko' Pentakosta, niitumo ni sia én timotozola in zéi'kan timulima witi Efesus, wo sia zéi'kan tumia' un témpona im witi Asia.

¹⁷Pahpaano niitu, im witi Miletus si Paulus nimatuma tou i matumawah sé penatua né jamaat witi Efesus i méyé witi Miletus.

¹⁸I ni séra méikaayomomé witi Miletus, a si Paulus kumuala wia ni séra, “Kata'uan niouo kura ni aku i menou-nou memali-mali karia niou, rengané in endo kataré ni aku i méikaayomé wia Asia kenu.

¹⁹Karia i roros até ni aku mahpaayang wia si Mahpiara. Ni aku i mahpaayang wia ni Sia, makalakez ém pahlué'an wo kasii makalakez nimasungkulan karia am pema'wa'en wo am pahmualin né tou Yahudi i mahwuwunu' ni aku.

²⁰Taan zozo'pé' in téntu, ni aku én zéi'kan maliuz i mahkua am wéwéhan torona wia ni kamu. Péléng am péléng é méiwoka'kumo wo méituzu'kumo wia ni kamu, niitu im witu u sinaru né tou lakez kaapa wana am walé i nimaréwok.

²¹Ni aku sekezé é mahkua a niilekku wo an tinalingaku wia sé tou Yahudi wo sé tou Yunani, wo a singkéla' néra wia si Opo Empung itula'u nérala wo ma'éman wia si Yesus Mahpiarata.

²²In tarékan, pahpaan i mahkiit um perénta ni Roh Lenas, ni aku é mangé witi Yerusalem wo zéi'kan kata'uangku apa u mamuali wia ni aku im witu.

²³U méipapata'u ni Roh Lenas wia ni aku én akaz uman, i ni aku é maiuntep witi bui wo mazézéha im wana am wanua tua'na angéangku.

²⁴ Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

²⁵In tarékan kata'uangku i ni kamu péléng sé niéyéangkumoma i mahwoka'ma ung Kakolanoan ni Opo Empung én zéi'mo mahile-ilekala kariaku.

²⁶Pahpaano niitu, in endo kenu ni aku éng kumuama wia ni kamu, sa im wia ni kamu wéwéhan sé matéma taan zéi'kampé' ma'éman, niitu én zéi'kan sumala'ku.

²⁷Pahpaan ni aku én zéi'kan kawisa wo zéi'kan mahwoka' péléng ang ginenang ni Opo Empung wia ni kamu.

²⁸Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

²⁹Totoz ing kata'uangku sa kamu itula'ukumoma, sé tou léwo' sé tanumokan sé serigala totoz léwo' é méyé witu un unez niou. Wo ni séra é mahtututu' i mékumayo' sé jamaat sé pahtéizan niou itii.

³⁰Lumousé niitu, im wia ni kamu ém wéwéhan sé woopira tou sé mahtuzu' an tutuzu' zéi'kan ulit. Ni séra é mahtututu' i mahlululu sé tou ma'émano ing kumiit ni séra.

³¹Niitumo ni kamu é léwo'zéi' in tuméga-tégam. Gena-genangen, teluna ta'un ung kauréna endo wo wengi ni aku zéi'kan mazéi' i mahsésa wia ni kamu si esa wo si esa karia im pahlué'an.

³²In tarékan, ni kamu én iayoku wia si Mahpiara in tatéren-Na wo ni kamu zéi'kan mazéi' i ma'éman witu u Nuwu' méitambér-Namé. Ni Sia é mahkawasa i mahenté' um pa'émanen niou wo mahtambéré ung kamang u niimek-Namo in iwéhé wia péléng sé tou linenas-Namo.

³³Ni aku én zéi'kan kawisa niméré' im wéhané né tou am péra' kaapa a mas kaapa ang karai.

³⁴Kata'uan niouo taré i ni aku é mahpaayang karia ung ketezku in esa i mahwuwutul am pemandungengku wo am pemandungen né kawaliku.

³⁵Im wana am péléng ni kamu ém winéhangkumoma ung kékéréan, karia i mahpaayang tanu niitu ni kita én toro sumawang sé tou susa. Ni kita é léwo'zéi' ing gumenang u méikua ni Yesus Mahpiara in téntii, ‘Si tou mahwéhépé' si mahpaa-paaz taan si tou pahwéhan.’ ”

³⁶Makanuwu'la niitu, si Paulus kumuruzla a mengaléi karia néra péléng.

³⁷Ni séra péléng é mahamé' karia i sindekokan wo karia i mahingki'ma wia si Paulus, ni sia ém penio-niomen néra menau-naup.

³⁸Un até néra é lumousé i nimasusama pahpaan si Paulus éng kimuala i ni séra én zéi'mo mahile-ilekala kariana. Kumawusa niitu, a sia ipahwali nérama witi londéi tua'na.