Read Tombulu Kisah Rasul-rasul 21 Bible Online

Kisah Rasul-rasul 21 - Tombulu bible

Kisah Rasul-rasul 21

¹I nimatampasanoma karia né tonaas né jamaat witi Efesus, a ni kai rengan i siméngkota nimangé witi katanaan Kos. Masandomé, an ikaayoma witi Rodos. Im witu a suméngkota nimangé witi Patara.

²Witi Patara ni kai méikailekla londéi tua'na u mahaangé witi Fenisia. Ni kai sumakéla witu u londéi tua'na itii a mangé.

³Zéi'kan uré, ileken naima ung katanaan Siprus witu ung kawihi nai, taan u londéi tua'na sinakéan nai é limangkoi umané witu a mangé witi Siria. Ing kamurian, ni kai é méikaayola witi Tirus, pahpaan a méisaké witu u londéi tua'na itii é léwo'zéi' itumpa witu.

⁴Im witu, ni kai é nimangémé wia sé tou ma'éman witu a mento'la karia néra pituna endo ung kauréna. Si Roh Lenas é mapata'u wia sé tou ma'éman witu i sumésa wia si Paulus wo sia tia'mo mahaangé witi Yerusalem.

⁵Taan i simampetoma an endo nai i mahento' witu, a ni kai lumampang. Péléng sé tou ma'éman wo sé mahayo néra wo sé oki' néra é nimahwalima ni kai makaz i nimondolé im witu um wanua tua'na itii. I méikaayomola witi tembir un tasik, ni kai péléng éng kimuruzla a mengaléi.

⁶Kumawusa niitu, kai tumuzu'la wia ni séra a sumakéma witu u londéi tua'na. A séra péléng mawurima wana am walé néra.

⁷Witi Tirus ni kai meméhé-méhéma i siméngkot makaz witi Ptolemais, im witumo ung kinaakazan u sinéngkotan nai. Im witu ni kai mamahilekan karia né katuari esa pa'émanen a mento'ma sana endo karia néra.

⁸ Masandomé a ni kai tumula'umé um wanua tua'na itii an ikaayoma witi Kaisarea. Im witu ni kai é nimahento'mé witu um walé ni Filipus si mahwoka' u Nuwu' Lé'os tumoro si Yesus, si esaané im wia sé pitu tou sé pinéléng im witi Yerusalem.

⁹Si Filipus ém wéwéhan sé raraha epat. Sé rarahana itii én tinambéran ni Opo Empung i mahkua a méikua-Namé.

¹⁰Im woopirana endomo ni kai i mahento' witu, a méyé si nabi makangaran Agabus si witi Yudea a méyé.

¹¹Ni sia é niméyé wia ni kai a méndoma un embet ni Paulus. Tumondongla niitu, karegas i mahapus un a'é wo un lengenna in esa ni sia mahkua, “Si Roh Lenas éng kimua in téntii, ‘Téntiimo si tou makaembet ung kenu in apusen né tou Yahudi witi Yerusalem. Wo ni sia én iayo néra wia sé tou zéi'kan Yahudi.’ ”

¹²Kaitalingamé niitu, ni kai karia né tou ma'éman sé mahento' witi Kaisarea itii é mahaléi, sa toro si Paulus én tia'mo mangé witi Yerusalem.

¹³Taan si Paulus nimingkot umané, “Kaa kamu mahamé', taka-takazan nimangun un atéku i rumara? Ni aku én zéi'kan uman paaz in apusen taan ni aku kangkasii ém paaz i maté witi Yerusalem pahpaan i mahwoka' u ngaran ni Yesus Mahpiara.”

¹⁴Pahpaan si Paulus é soo tumalinga a sésésa nai wia ni sia, niitumo ni kai kimana'la i mahsésa wia ni sia ang kumuala, “Apamo ung kapaaz ni Opo Empung, téntumo u mamualima.”

¹⁵Im woopirana endomo i mahento' witi Kaisarea, ni kai mimekla a mangé witi Yerusalem.

¹⁶Wéwéhan kasii sé woopira tou ma'éman sé witi Kaisarea kimiité ni kai. Ni kai é méipahwali nérama witi walé ni Manason. Ni sia ém witi katanaan Siprus a méyé wo urémo i nimaéndo tou ma'éman. Ni kai é mamento' witi waléna.

¹⁷I ni kai méikaayomola witi Yerusalem, péléng sé katuari esa pa'émanen witu é simungkul ni kai karia i mahpaa-paaz.

¹⁸Masandomé, si Paulus wo ni kai é nimangé mahilekan karia ni Yakobus, im witu kangkasii péléng sé penatua é nimaréwoko.

¹⁹Si Paulus sumigi'la wia ni séra. An ipakasiritanala péléng am winangun ni Opo Empung mengiité um pinaayangna wia sé tou zéi'kan Yahudi.

²⁰Kaitalingamé niitu, a séra mahlooz si Opo Empung. Ang kuan néra wia si Paulus, “Paulus! Kata'uannula i mariwu-riwumo sé tou Yahudi sé ma'émano wia si Yesus, wo ni séra péléng kangkasii én totoz mahkii-kiit un ukum Torat.

²¹Taan ni séra kangkasii én timalingamola tumoro an ipahtuzu'mu wia péléng sé tou Yahudi sé wana a séséngkotan, in zéi'mo toro mahkiit un ukum Torat. Pahpaan ni ko éng kimuamola i ni séra én tia'mo mahsunat sé oki' néra wo tia'mo kasii menou-nou mahkiit ang kinanaramta.

²²Niitumo, kuramo in tarékan? Pahpaan tantumo éng katalingaan nérama i ni ko é niméyémo wia'i.

²³ Niitumo, wangunenola an ikua naima kenu: Im wia ni kai ém wéwéhan sé epat tou sé kimua un taaz wia si Opo Empung.

²⁴Ipahwalimuma séra epat wo maweresila un tou[25] niou mengiit ang kinanaramta wo pakawaérennula an iwaér i lumo'gas am wuuk néra. Karia in téntu, péléng sé tou é mata'u im péléng an tinalinga néra tumoro ni ko én zéi'kan ulit, pahpaan ni ko é mahkiitpé' un ukum Torat.

²⁵ Taan tumoro sé tou walina sé zéi'kan Yahudi sé ma'émano, ni kai é niméhémoma am pinantik tumoro an tinotoz naila. An tinotoz itii én téntii: ni séra én zéi'kan toro mahkan ang kakanen mémoiragés wia sé opo-opo, zéi'kan toro mahseza' a lé'ona né binatang nimaté ing kinezangan wo un zaha'. Ni séra kasii én zéi'kan toro mahsamek.”

²⁶Masandomé, si Paulus karia né epat tou itii nimahwalima mameresi un tou néra mengiit ung kinanaram néra. A séra muntepa witi Walé ni Opo Empung i makumua sa makaz sawisa ung kinanaram néra i meresi un tou itii. Wo sa niitu simampetola, ni séra si esa wo si esa é méhé a raragés wia si Opo Empung.

²⁷I simampetoma um pituna endo un oras i mahweresi un tou, sé tou Yahudi witi Asia a méyé é nimileka si Paulus im witu u lésaz um Walé ni Opo Empung. An akeren nérala sé tou witu a sia tionan nérala

²⁸karia i mahkérét, “É, tou Israel, sawangané kai! Kelasiamo si tou si mahtuzu' wia péléng sé tou an tutuzu' a mahsaru sé tou Israel, un ukum Torat wo um Walé ni Opo Empung kenu wana péléng an tampa niangéannamé! In tarékan, ni sia kangkasii é nimahwalimé sé tou Yunani wia um Walé ni Opo Empung wo nimangun un tampa lenas kenu makati'tiren!”

²⁹ Ni séra mahkua in téntu pahpaan ni séra nimilek si Trofimus tou Efesus é memali-mali wo si Paulus witi Yerusalem. Wo pahgenangen nérala i si Paulus é nimahwalima ni sia i nimuntepa witu um Walé ni Opo Empung.

³⁰Niitumo péléng sé tou witi Yerusalem é nimaringka' a séra maréwoké witu. A sia tionan nérala ang kéhongené méiondolé im witu um Walé ni Opo Empung. In toro niitukan péléng a loloangan um Walé ni Opo Empung ém pineneté.

³¹Karegas séra i mahwuwunu' si Paulus, am wéwéhan si tou makimua wia si tonaas né sana riwu suraro né Romawi sa im witi Yerusalem é ringka'mo.

³²Niitumo, si tonaas né sana riwu suraro itii é rengan i nimahwalima sé surarona wo sé tonaas né sana atus suraro, i mangé witi Walé ni Opo Empung u nimaringka'mo itii. I sé tou lakez nimileka si tonaas né suraro itii wo sé surarona, a sé tou lakez itii kumana'la i mahsondo' si Paulus.

³³I méikaayomola witu, si tonaas né suraro itii é rimétéma wia si Paulus, a sia tionannala. An iatunama sé surarona i mamapus ni sia karia u ranté zua, a meligau sa séi sia wo apa um nimualinamola.

³⁴Taan an ipahwingkoté né tou im wia sé tou lakez itii én zéi'kan masuat, wéwéhan sé mahkérété in téntii wo wéwéhan sé mahkérété in téntu. Pahpaan i rikoka'mo téntu, si tonaas né suraro én zéi'kan nimata'uma apa un ulitna u mahmuali. Pahpaano niitu, méiatunama sé surarona i mahwalima si Paulus mangé witi pahento'an mahwali-wali né suraro.

³⁵I ni séra méikaayomola witu un ahzan, si Paulus ém pinopomokané né suraro pahpaan sé tou lakez é mahrangumo.

³⁶Péléng sé tou itii é mahmurimé wia ni sia karia i mahkérét, “Wunu'enola sia!”

³⁷I si Paulus ipahuuntep néramo witi pahento'an mahwali-wali né suraro, ni sia meligau wia si tonaas né sana riwu suraro itii, “Toro ni aku i sumiritama kariamu?” A mingkotla si tonaas né suraro itii, “Mata'u ndéén u nunuwu'en Yunani ko?

³⁸Sa téntu, ni ko ndéén én zéi'kan si tou Mesir si im weru kenu nimahsaruma sé pemerénta an tumingkasa nimahwalima sé epatna riwu tou sé mahali-ali ang kokoro' nimangé witi kapelasan?”

³⁹A mingkotla si Paulus, “Ni aku én tou Yahudi, witi Tarsus a méyé, um wanua tua'na totoz ipahkua-kua witi Kilikia. Pahaléiengku wo ni aku toro numuwu'ma wia sé tou lakez itii.”

⁴⁰I ni sia niénéanola i numuwu', a sia rumendaila witu un ahzan a mayata u lengenna wia sé tou lakez itii. I sé tou lakez nimapenesoma, a sia rengan i mahnuwu' wia ni séra karia u nunuwu'en Ibrani, kuana,