Read Tombulu Kisah Rasul-rasul 22 Bible Online

Kisah Rasul-rasul 22 - Tombulu bible

Kisah Rasul-rasul 22

¹“Sé ama' wo katuari-katuari, talingana, wéwéhan un ipahkukuaku wia ni kamu in tarékan i mahkekelung un touku.”

²I sé tou lakez itii mahtalingama si Paulus i mahnuwu'ma karia u nunuwu'en Ibrani, ni séra éng kapenesna. Ang kuan ni Paulus kasii wia ni séra,

³ “Ni aku én tou Yahudi, nimatou witi Tarsus witi tana' Kilikia, taan nimatu'a wia um wanua tua'na kenu. Si mésterku é si Gamaliel. Ni sia si nimahtuzu' wia ni aku un ukum Torat u méituzu' ni Musa wia sé nimaopota tou Israel. Niitumo ni aku é ma'ulit i mahwangun ang kapaaz ni Opo Empung masuat wo ni kamu péléng in tarékan kenu.

⁴ Im puuna, ni aku é mahzézéha sé tou sé mahkiit an tutuzu' ni Yesus Mahpiara makaz ni séra i nimaté. Pahtionangku sé tuama wo sé wéwéné wo ipahuntepa witi bui.

⁵Si Walian Wangko' wo sé Mahkamah Agama kasii én toro kumuamé, sa péléng an ipahkuaku én ulit. Wo ni séra kasii sé niméhémé um pinantik u niméhé ung kawasa wia ni aku im pahalin wia sé tou Yahudi witi Damsyik. Um pinantik itiimo u nimangun ni aku in toro tumion sé tou sé mahkiit an tutuzu' ni Yesus Mahpiara witi Damsyik a mahwali ni séra witi Yerusalem i maukumen.

⁶Taan i lolamboto i ni aku melelezoma un Damsyik, kumompo'mé ém wéwéhan u sena' witi langit un totoz merahra simena'mé wia ni aku.

⁷A ni aku ikawesahma witu un tana' an talingangkumé u nuwu' kimuamé in téntii, ‘Saulus, Saulus, kaa ni Aku pahzézéhanu?’

⁸A ni aku mingkotla, ‘Tuang, Séi Ko wé?’ A Sia kumuamé, ‘Ni Akumo si Yesus, tou Nazaret si pahzézéhannu itii.’

⁹In toro niitu, sé tou memali-mali kariaku é nimilek kangkasii u sena' itii. Taan u nuwu'-Na u nimuwu'mé wia ni aku én zéi'kan tinalinga néra.

¹⁰An ni aku kumuala, ‘Tuang, apa u léwo'zéi' im wangunengku?’ A Sia kumuamé wia ni aku, ‘Rumendaiomé wo mangémo witi Damsyik. Im wanamokan wo ko makuaan apa u léwo'zéi' im wangunennu.’

¹¹Ni aku én zéi'mo makailek pahpaan u sena' totoz merahra itii. Niitumo sé kawaliku én timionla u lengenku a mahkit ni aku méipahwalima witi Damsyik.

¹²Im witu ém wéwéhan si tou makangaran Ananias. Ni sia uli-ulit mahkiit un ukum Torat, wo kata'uan péléng né tou Yahudi sé mahento' witu in tou lé'os.

¹³Ni sia niméyé witu u rétéku ang kumua in téntii, ‘Saulus, katuariku, ni ko én toromo mahilek sumaup!’ In toro niitukan, ni aku én toromo mahilek sumaup a ni aku merena wia ni sia.

¹⁴A sia kumuamé, ‘Si Opo Empung né nimaopota tou Israel é niméléngo ni ko i mata'u ung kapaaz-Na wo i milek si Yesus si Ulit, wo kasii tumalinga un ikua-Namé.

¹⁵Pahpaan ni ko é léwo'zéi' i makumua wia péléng sé tou a niilek wo an tinalingamu tumoro ni Sia.

¹⁶Wo in tarékan, kaa ko mahzua-zuapé' genang? Rumendaiomé wo iwéhémola un toumu i saranin wo mengaléiola wia si Mahpiara, wo a singkéla'mu zéi'en-Na.’

¹⁷A ni aku mawurima sumaup witi Yerusalem. Karegas ni aku i mengaléi witi Walé ni Opo Empung si rohku éng kinawasa ni Roh ni Opo Empung.

¹⁸An ilekengkuma si Tuang si kimuamé téntii wia ni aku, ‘Mahrewekola, itula'umoma u Yerusalem, pahpaan un ipahkuamu tumoro ni Aku éng kasoo néra.’

¹⁹A ni aku mingkotla, ‘Tuang, kata'uan néra i ni akumo si mengunguntep wana am walé peraragésan né tou Yahudi i mahtion sé tou ma'éman wia ni Ko in iuntep witi bui wo mahsaluk ni séra.

²⁰ Téntu kangkasii i si Stefanus si mahkua a niilekna wo tinalingana tumoro ni Ko im winunu'. Ni aku ém witu wo um winangun néra itii é niénéangku. Wo ni aku kangkasii si timéiz wana ang karai néra i ni séra nimunu' ni sia.’

²¹Taan kuan ni Tuang wia ni aku, ‘Mangémo, pahpaan ni ko én iatu-Ku i mangé witi tampa zou'ma im wia'i wia sé tou zéi'kan Yahudi.’ ”

²²Sé tou lakez itii én tumalinga an ipahkua ni Paulus makaz witu un taré ikuanama itii. A séra rengan i mahkérét, “Wunu'enola si tou kenu! Ni sia én zéi'kan wangun i menou-nou!”

²³Ni séra zéi'kan mazéi' i mengéré-ngérét wo melombo-lombo' ang karai tonton néra, wo kasii mahparas an awu pahpaan sé totozo i maupi'.

²⁴Niitumo, si tonaas né sana riwu suraro é nimeréntama sé surarona i mahwalima si Paulus witi pahento'an mahwali-wali né suraro. Im witu, si tonaas né suraro kasii é nimeréntama i mahtata'u wo sumaluk ni sia. Ni séra nimangun un téntu i mahtata'u apa ung kinawalian né tou lakez itii i mengéré-ngérét téntu wia ni sia.

²⁵Taan i si Paulus méilélaz nérala i saluken, a sia kumuama wia si tonaas né sana atus suraro si mahpaayang witu, “Toro wé i sumaluk si tou Romawi sa sia zéi'kampé' tinotoz am winangunna in ulit kaapa zéi'kan?”

²⁶Kaitalingamé niitu, si tonaas né sana atus suraro itii é rengan i matimuzu' wia si tonaas néra. Kuana, “Pakagena-genangela lé'os um wangunen ni ama' wia si tou itii. Ni sia én tou Romawi.”

²⁷A si tonaas né sana riwu suraro itii mangé wia si Paulus a lumigau wia ni sia, “Amoké ikuamumé. Ulit wé i ni ko én tou Romawi?” A mingkotla si Paulus, “Ulit.”

²⁸Ang kuan ni tonaas né suraro itii, “I ni aku nimaéndola tou Romawi, mahal u méiwaérkula!” A mingkotla si Paulus, “Taan ni aku, rengan i nimatoumé én tou Romawimo.”

²⁹A sé suraro mahsasaluk ni sia rengan i nima'katé wo si tonaas né suraro itii kangkasii é maindé' i nimata'ula si Paulus si méipekiapusnala én tou Romawi.

³⁰Si tonaas né sana riwu suraro én totoz paaz i mahtata'u, apa un ulitna ung kinawalian né tou Yahudi i mahtoké si Paulus. Pahpaano niitu, masandomé a sia matuma i mangémé si Paulus witi bui a meréntama sé tonaas né walian wo sé tou walina sé méikauntep witu u Mahkamah Agama i maréwoké. Am pahwalinama si Paulus maisaru wia ni séra.