Read Tombulu Kisah Rasul-rasul 26 Bible Online

Kisah Rasul-rasul 26 - Tombulu bible

Kisah Rasul-rasul 26

¹Ang kuan ni kolano Agripa wia si Paulus, “In tarékan, ni ko én toromo ing kumelung un toumu.” A si Paulus mayata u lengenna ang kumua ang kekelungna,

²“O kolano Agripa, ni aku én totoz mahpaa-paaz pahpaan in endo kenu ni aku én toro kumelung un touku witu u sinaru ni tuang, im wana an ipahtoké né tou Yahudi wia ni aku.

³Un totoz ipahpuu-puuna ém pahpaan si tuang én totoz mata'u ang kinanaram wo am pahzéi-zéi'an né tou Yahudi. Pahpaano niitu, pahaléiengku wia si tuang in ezen tumalingama an ikuaku.

⁴ Péléng sé tou Yahudi é mata'u kura ung katou-touangku rengan ni aku in tarétumoupé', pahpaan rengan ing kataré-taré im witi Tarsus makaz ni aku im witi Yerusalem, ni aku é menou-nou karia né tahsasana wanuaku.

⁵ Ni aku én urémo ing kata'uan néra. Wo sa séra paaz, ni séra én toro kumua ang kata'uan néra i ni aku é menou-nou in tou né sana réwok tou Farisi, sé sana réwok tou sé ipahkua-kua in totoz mahkiit an tinotoz witu um pa'émanen nai.

⁶In tarékan ni aku é léwo'zéi' in isaru wia un tampa penonotozan kenu pahpaan ni aku é niméré' witu un taaz méiwéhé ni Opo Empung wia sé nimaopota.

⁷Sé mapulu' wo zua suzu ni Israel é mengento-ngento' un oras ni Opo Empung i mélumekep a méitaaz-Na itii. Wo karegas i ma'ento' a méitaaz itii, endo wo wengi ni séra én zéi'kan mazéi' i mahragés. O kolano Agripa, pahpaano um pahéré'an itii, sé tou Yahudi é mahtoké ni aku.

⁸Kaa pahgenangen nioula in zéi'kan mamuali si Opo Empung in tumou sumaup sé tou nimatémo?

⁹ Im puuna, ni aku kangkasii é mahgenangla i ni aku é léwo'zéi' mahsaru sé tou sé mahwoka' u ngaran ni Yesus, si tou Nazaret itii.

¹⁰Ni aku kangkasii é nimahwanguné an téntu im witi Yerusalem. I nimakailekomé ung kawasa im wia sé tonaas né walian, ni aku én zéi'kan uman timionla sé tou ma'éman wia si Yesus an iuntepa witi bui, taan ni aku kangkasii é niménéla sa ni séra ukumen im wunu'en.

¹¹Ni aku kangkasii sekezé é mahzézéha ni séra im wana am walé peraragésan né tou Yahudi, wo menutu' ni séra ing kumélong um pa'émanen néra. Wo karia in totoz maupi', ni aku é mahkikiit ni séra, makaz wana am wanua tua'na walina.”

¹² A si Paulus kumua kasii, “Pahpaan ung ginenang itii, ni aku nimangé witi Damsyik karia i nimahalima um pinantik né tonaas né walian sé niméhémé ung kawasa wia ni aku.

¹³O kolano Agripa, karegas mahlampang i lolambot, kumompo'mé ni aku é nimileka u sena' totoz merahra, u lumouspé'mé u merahrana ni endo, um witi langit an tumumpamé. U sena' itii é simena'mé witu u makaliklikku wo né tou sé mahwali-wali kariaku.

¹⁴Ni kai péléng é méikawesahma witu un tana'. Ang katalingaangkumé u nuwu' u mahkuamé wia ni aku karia u nunuwu'en Ibrani, in téntii, ‘Saulus, Saulus kaa Aku pahzézéhannu? Ni ko é masusa sa mahsaru ni Sia si kimawasa wia ni ko.’

¹⁵A ni aku lumigaula, ‘Tuang, séi ko wé?’ A Sia mingkoté, ‘Ni Akumo si Yesus, si pahzézéhannu.

¹⁶Taan in tarékan, tumoozé wo rumendaiomé. Ni Aku é nimapailek un tou-Ku wia ni ko, in tumotoz ni ko maéndo tou si mahpaayang wia ni Aku wo si tou si mahkua tumoro péléng an niilekmu wo an tinalingamu wia ni Aku wo tumoro an ipapailek-Ku wia ni ko in tumondong.

¹⁷Ni ko én ipilotku im wana an zézéha pahwangunen né tou Yahudi wo né tou zéi'kan Yahudi. Ni ko én iatuku i mangé wia ni séra,

¹⁸i mangun am weren néra mawula', wo ni séra zéi'mo menou-nou witu ung karimbengbengan taan menou-nou witu un ayah. Wo menou-nou zéi'mo kinawasa ni tonaas né sétang taan mahkiito um paaz ni Opo Empung. Wo pahpaan um pa'émanen néra wia ni Aku, ni séra é makailek un ampungan wana a singkéla' néra. Wo ni séra kasii é makailek um wéwéténgan im wana an tinotozo in iwéhé ni Opo Empung wia sé tou sé linenas-Na.’

¹⁹Pahpaano niitu, o kolano Agripa, ni aku én zéi'kan kawisa wo zéi'kan mahwangun a méiperéntamé ni Yesus mengiité um pina'ilekku.

²⁰ Ing kataré-taré, ni aku é mahwoka' wia sé tou witi Damsyik, witi Yerusalem wo wana péléng am wanua witi tana' Yudea, i ni séra é léwo'zéi' tumula'ula a singkéla' néra wo mawuri sumaup wia si Opo Empung. Wo kasii mahwangun uman am pemamangunen né tou sé timula'umola a singkéla' néra.

²¹Pahpaan niitumo, ni aku én tinionan né tou Yahudi im witi Walé ni Opo Empung wo mahwuwunu' ni aku.

²²Taan pahpaan in tinulung ni Opo Empung, ni aku é menou-noupé' makaz in tarékan wo mahkua wia sé tou a niilekku wo an tinalingaku, ni séra in tou pahsigi-sigi'en kaapa tou kanaramen. Péléng a méipahwoka'ku itii é masuat wo a mémoipahwoka'mé ni Musa wo né nabi im puuna.

²³Ni séra mahwoka' i si Mesias é léwo'zéi' mazézéha, wo ni Siamo si kataré-taré méitoumé sumaup ni Opo Empung im wia sé nimaté. Wo ni Sia si makumua wia sé tou Yahudi wo sé tou zéi'kan Yahudi tumoro u Nuwu' Lé'os un tanumokan sena' wia ni séra.”

²⁴Karegas si Paulus mahnuwu' i mahkelung un touna, a si Festus kuméréta, “Paulus, ni ko ém pahléla'eno! Ni ko ém pahléla'eno pahpaan ung kata'uannu én tahlouso lakez.”

²⁵Taan si Paulus é nimingkotla, “Festus si totoz pahsigi'engku, ni aku ndootuu én zéi'kan pahléla'en! Taan ni aku é mahkua umana an ulit wo ung genangku é lé'o-lé'os uman.

²⁶Niitu én totoz ing kata'uan ni kolano Agripa, pahpaano niitu ni aku én zéi'kan maindé' i makaulit mahkua wia ni sia. Totoz kata'uangku in zéi'kan siapa zozo' in esa wana a méikuaku un zéi'kan kata'uan ni kolano, pahpaan niitu péléng én zéi'kan nimamuali wana an tampa méikawuni.

²⁷Kolano Agripa, apa ko ma'éman wia sé nabi? Kata'uangku i ni ko é ma'éman wia ni séra.”

²⁸Ang kuan ni kolano Agripa wia si Paulus, “Woanokan an ni aku wangunennula maéndo tou Sarani!”

²⁹Ang kuan ni Paulus wia ni sia, “Ni aku é mengaléi wia si Opo Empung wo ni ko karia péléng sé tou wia un tampa kenu wo sé timalinga a méikuakuma, niitu i rewek kaapa i mauré-uré é masuat kariaku. Taan, tantu katuu én zéi'kan rinanté tanu ni aku in tarékan.”

³⁰A si kolano Agripa, si gubernur Festus, si Bernike, wo péléng sé tou rimumez karia néra é rengan rimendaié.

³¹Karegas séra i mahlampang i mondol, ni séra é mahkua wia si esa wo wia sé walina, “Si tou itii én zéi'kan nimangunla a léwo'an un toro makawali ni sia in ukumen i maté kaapa im buin.”

³²Ang kuan ni kolano Agripa wia si gubernur Festus, “Un ulitna, si tou itii én toromo ipilot, sa sia zéi'kan nimahaléila um pahéndo-éndoanna itii i matotozen ni Kaisar.”