Read Tombulu Kisah Rasul-rasul 28 Bible Online

Kisah Rasul-rasul 28 - Tombulu bible

Kisah Rasul-rasul 28

¹I méikaayomoma witi katanaan karia i lé'o-lé'os uman, taré kata'uan naila sa u ngaran ung katanaan itii é Malta.

²Sé tou witu én totoz uman lé'os im wia ni kai. Ni séra én zimiketla, ang kai tawahen nérama i mangé witu, pahpaan in toro niitu un uzan é mahta'samo wo u reges é zatémo.

³I si Paulus nimuruté am panga rintek peramo in iwéhé witu un api, kumompo'mé si ulé' melangu nimondolé pahpaan um pasu'na un api ang kumikima u lengen ni Paulus.

⁴I sé tou mahwitu-witu nimileka si ulé' itii i makaintoi witu u lengen ni Paulus, a séra mahkua wia si esa wo si esa, “Si tou kenu én uli-ulit memumunu' tou. Pahpaan, zozo' ni sia in zéi'kan nimatémé witi tasik, taan ni sia én zéi'kan méiwaya i menou-nou ni wéwéné pa'opoen Zéi'kan Mahsanaweka.”

⁵Taan si ulé' itii é méipikpik umana ni Paulus witu un api wo ni sia én zéi'kan nimakurama.

⁶Sé tou itii mahgenangla i si Paulus é sumegah kaapa kumompo'mokané é mémoikawesahma wo maté. Taan in urémo i mengento-ngento', ileken nérama si Paulus é lé'o-lé'os uman, niitumo ni séra é mahgenangla i ni sia ém pa'opoen.

⁷Zéi'kan zou'ma im witu, wéwéhan un tana' anu ni makangaran Publius si tonaas ung katanaan itii. Ni kai é sinungkulna wo teluna endo ni kai totoz sinuhu'namé.

⁸In toro niitu si ama' ni Publius é meneke-nekelokan pahpaan im pasu' wo zéi'kan kumana' i mengangé-ngangé witi muri. Si Paulus mangé witi tinekelanna a sia mengaléi, karegas niitu u lengenna méizeta'nala wia si ama' itii, a si ama' itii malé'osa.

⁹Kumawusa u nimamualima itii, sé tou saki walina witi katanaan itii é niméyé wia si Paulus, wo séra péléng kangkasii liné'osnama.

¹⁰Sé tou witu én totozo mahsigi' ni kai. I ni kai mangémo, péléng am pemandungen nai ém pinakaimek nérala.

¹¹In teluna loloho'eno im witu, ni kai tumula'umé un tampa itii simakéma witu londéi tua'na um witi Aleksandria a méyé, u simuwa' witi katanaan itii im witu un oras in zaté. U londéi tua'na itii ém wéwéhan sé patong koki' kambar makangaran Dioskuri.[27]

¹²Tumondong niitu, ni kai é simuwa'la witi Sirakusa. Teluna endo kai i nimento' witu.

¹³Im witu a ni kai suméngkot mahkiita ruruh un tasik, an ikaayoma witi Regium. Masandomé a méyé u reges timuh, niitumo u londéi tua'na sinakéan nai é rorot i mahangé wo witu un endo kazua ni kai é méikaayomola witi Putioli.

¹⁴Im witu, ni kai nimahilekan karia né katuari esa pa'émanen wo pahpaan im pinahaléi nérala, ni kai é nimento' karia néra pituna endo. Tumondong niitu a ni kai mangé witi Roma.

¹⁵Sé katuari esa pa'émanen witi Roma én timalingala i ni kai é mangé wana. Niitumo ni kai é sinungkul néra witi tampa makangaran Forum Apius, wo sé walina kasii é simungkul ni kai witi Tres Taberne. I si Paulus nimilekla ni séra, ni sia mahkua u makasé wia si Opo Empung a maenté'mé un aténa.

¹⁶I ni kai mémoikaayoma witi Roma, si Paulus é niénéala ni tonaas né sana atus suraro i mento' witu um walé esa, karia in tinéizan ni suraro esa.

¹⁷Teluna endo tumondongla niitu, si Paulus timawahmé sé tou Yahudi sé pahkua-kua i mémahilekan kariana. I ni séra nimaréwokomé, a sia kumuala, “Katuari-katuari! Zozo' ni aku zéi'kan nimahwangu-wangunla apa uman u mahsaru sé tahsasana wanuata, wo ang kinanaram né nimaopota, taan ni aku én tinionan néramé im witi Yerusalem an iayola wia sé tou Romawi.

¹⁸I ni aku pinahtata'umola né tou Romawi, ni séra é mahpipilot ni aku pahpaan zéi'kan méikailek a sinala'ku an toro makawali ni aku in ukumen maté.

¹⁹ Taan zéi'kan iwéhé né tou Yahudi sa ni aku ipiloté, niitumo ni aku léwo'zéi' i mahaléi wo um pahéndo-éndoan tumoro ni aku kenu é matotozen ni Kaisar. Winangunku téntu zéi'kan pahpaan ni aku mapahsasala' sé kawanuaku.

²⁰Pahpaano niitu ni aku mahaléi i mémahilekan wo sumirita karia niou. Ni aku i rinanté tanu ang kenu ém pahpaan ni aku mahwoka' tumoro si Kristus si rengan im puuna méitaaz ni Opo Empung in iwéhé wia sé tou Israel, si pengéré-ngéré'enta.”

²¹Taan ni séra éng kimuala wia si Paulus, “Zéi'kan siapa am pinantik am witi Yudea a méyé ang kinailekan naimé un toro tumuzu'mé wia ni kai tumoro ni ko. Wo zéi'kan siapa zozo' in esa si katuarita si witi Yerusalem a méyé i mékimua a léwo'an tumoro ni ko.

²²Taan ni kai ém paaz in tumalinga kura ung ginenangmu tumoro um pa'émanen um pahkiitennu. Pahpaan ni kai én timalingamola i sé tou wisa uman ni séra é mahsaru um pa'émanen um pahkiitennu itii.”

²³A séra tumotozla un endo i mahilekan sumaup karia ni Paulus. I méikaayomola witu un endo tinotoz itii, totoz lakez sé tou niméyé witi pahwéha-wéhan ni Paulus. Rengan im woondo makaz im wengindo, si Paulus mahtuzu' wo mahsirita wia ni séra tumoro ung Kakolanoan ni Opo Empung. Wo ni sia kasii mahtututu' i mangun sé tou itii ma'éman tumoro si Yesus mengiité un ukum ni Musa wo ang kitap né nabi.

²⁴Wéwéhan sé ma'éman wana a méikuama ni Paulus, taan wéwéhan sé soo ma'éman.

²⁵Pahpaan im wia ni séra én zéi'kampé' maéndoan, a séra rengan mondolé im witu. Karegas séra mahondolé im witu, si Paulus kumuama ung kenu wia ni séra, “Totozo ulit u nuwu' méikuamé ni Roh Lenas wia sé nimaopota mengiité si nabi Yesaya,

²⁶‘Mangémo wia sé tou Israel wo ikuala wia ni séra: Ni kamu é mahtalinga wo mahtalinga, taan ni kamu zéi'kan makatulap. Ni kamu é mahilek wo mahilek, taan ni kamu zéi'kan makatulap.

²⁷ Pahpaan an até né tahsasana wanua kenu éng kimetéhmo, a lunteng néra ém wutezo in tumalinga, wo am weren néra é méipezeng, wo ni séra zéi'kan milek karia am weren néra, wo zéi'kan tumalinga karia a lunteng néra, wo makatulap karia an até néra, a séra méyé wia ni Aku wo séra lé'oseng-Ku.’ ”

²⁸Tumondong niitu a si Paulus kumua kasiila, “Pahpaano niitu, ni kamu é léwo'zéi' i mata'ula sa u nuwu' tumoro si Opo Empung milot sé tou im witu un ukuman wana a singkéla' én ikua wia sé tou zéi'kan Yahudi wo séra tumalinga niitu.” [

²⁹I si Paulus makakuama niitu, a sé tou Yahudi itii mawurima, taan ang genang néra én zéi'kampé' mahéndoan.]

³⁰Zuana ta'un si Paulus i nimento' witu um walé pahwaérenna im pahento'an. Péléng sé tou mahangémé wia ni sia ém pahsungkulennamé karia u lé'os.

³¹Karia in zéi'kan siapa si ikaindé' wo zéi'kan siapa a mahraung, si Paulus mahwoka' tumoro ung Kakolanoan ni Opo Empung wo tumoro si Yesus Kristus Mahpiara.