Read Tombulu Kisah Rasul-rasul 4 Bible Online

Kisah Rasul-rasul 4 - Tombulu bible

Kisah Rasul-rasul 4

¹Karegas si Petrus wo si Yohanes mahnuwu' wia sé tou lakez, a méyé sé walian, si tonaas né mahtéiz um Walé ni Opo Empung wo sé tou wia sé sana réwok tou Saduki.[5]

²Sé tou itii én totoz maupi' pahpaan si Petrus wo si Yohanes é mahtuzu' wia sé tou lakez wo mahwoka' i sé tou nimatémo én itou sumaup tanu si Yesus i méitoumé sumaup ni Opo Empung.

³Niitumo si Petrus wo si Yohanes én tinionan nérala an iuntepa witi bui makaz i nimasandomé im woondo pahpaan in toro niitu ém wengimo.

⁴Taan im wia sé tou timalinga an tutuzu' itii é lakez sé nima'éman, taka-takazan sé tou ma'émano, sé tuama é nimaéndomoma woo limana riwu tou.

⁵Masandomé, sé tonaas né tou Yahudi, sé pahtutu'an né tou Yahudi wo sé tou tulap un Torat é nimeruz witi Yerusalem.

⁶Si Walian Wangko' Hanas wo si Kayafas, si Yohanes, si Aleksander wo sé walina sé méikauntep sana awu ni Walian Wangko' é niméyé witi pengengeruzan itii.

⁷A si Petrus wo si Yohanes iwali néramé witu um paheruzan né Mahkama Agama im pahtata'un um winangun néra. Tumondong niitu a séra meligau in téntii, “Séi si niméhé ung kawasa wia ni kamu? Kaapa karia u ngaran ni séi kamu i mahwangun péléng niana?”

⁸A si Petrus si kinawasa ni Roh Lenas mingkotla in téntii, “É kamu in tonaas wo pahtutu'an né tou Yahudi,

⁹sa in tarékan ni kai é léwo'zéi' im pahligauan niou pahpaan ni kai i nimangun u lé'os wia si tou lailai, wo kasii léwo'zéi' ing kumuama karia ung kawasa ni séi si tou itii liné'osa,

¹⁰ni kamu wo péléng sé tou Israel é léwo'zéi' i mata'ula, i si tou lailai makarendai witu u sinaru niou kenu é nimalé'osa karia ung kawasa u ngaran ni Yesus Kristus, si tou Nazaret si sinalip niouola itii taan méitoumomé sumaup ni Opo Empung im wia sé nimaté.

¹¹ Si Yesus itii é, ‘Um watu mémoitia' né memamangun am walé taan ni Sia é nimaéndomola watu to'tolan.’

¹²Akaz uman si Yesus si toro milot sé tou im witu un ukuman wana a singkéla', zéi'kan siapa ngaran walina. Pahpaan im wia ung kaayahan kenu, zéi'kan siapa ngaran walina si winéhan ni Opo Empung ung kawasa i milot sé tou im witu un ukuman wana a singkéla' néra.”

¹³Sé tou méikauntep witu u Mahkama Agama é mengusi-ngusingsing i nimilekla si Petrus wo si Yohanes zéi'kan maindé' i mahwingkoté wo ni séra kasii é mata'u i ni séra zua én tou kanaramen wo zéi'kan simikola.[6] Kinata'uan néra kasiila i ni séra zua é mahkii-kiit si Yesus.

¹⁴Taan ni séra én zéi'kan mata'u kumua ing kura, pahpaan nimilekla si tou lailai woan itii é rimendaio witu u rété né aatu zua itii.

¹⁵Kumawusa niitu, si Petrus wo si Yohanes é méipekiondol néramé im witu um paheruzan itii, a séra rengan i meruz.

¹⁶Ni séra mahliligauan, “Apa u léwo'zéi' im wangunenta wia ni séra zua? Pahpaan péléng sé tou wia Yerusalem é mata'umo i ni séra é nimangunola u makakompo'en un zéi'kan mata'u iwuni wo ni kita én zéi'kan mata'u kumélong niitu.

¹⁷Taan wo u makakompo'en winangun nérama itii zéi'kan kalousna in ikawoka'ma, tawimo kita menérola lalan i ma'indé' wo suméro' ni séra. Wangunentama téntu wo séra zéi'mo mahnuwu' wia sé tou tumoro u ngaran itii.”

¹⁸Kumawusa niitu, tawahen néramé si Petrus wo si Yohanes i muntepé sumaup witu um pengengeruzan itii, a séro'en nérala in zéi'kan toro mahkua kaapa mahtuzu' wia sé tou karia u ngaran ni Yesus.

¹⁹Taan si Petrus wo si Yohanes é nimingkotla in téntii, “Totozen niouola in esa wisa un ulit im witu u sinaru ni Opo Empung: mahtali-talinga wia ni kamu kaapa mahtali-talinga wia si Opo Empung.

²⁰Pahpaan zéi'kan mamuali a niilek wo an tinalinga naimo, zéi'kan ikua nai wia sé tou.”

²¹Tumalingamé niitu, sé tonaas né tou Yahudi éng kalousna i ma'indé' si Petrus wo si Yohanes. Taan sé zua aatu itii é méipilot néramé pahpaan ni séra zéi'kan méikailekla ung kawalian i mukum ni séra, wo kangkasii maindé' én taa sé tou lakez maupi'. Pahapaan sé tou lakez itii é mahlooz u ngaran ni Opo Empung i si tou lailai itii liné'osa.

²²Pahpaan ung katou-touan ni tou lailai woan itii é limangkoio epatna pulu' ta'un, wo in tarékan é lé'oso.

²³I si Petrus wo si Yohanes mémoiondolé im witi pengengeruzan itii, a séra mawurima wia sé kakaria néra. An isirita nérala zua a méikuamé né tonaas né walian wo né pahtutu'an né tou Yahudi wia ni séra.

²⁴ In tinalingala né kakaria néra niana péléng, a séra mengaléi mahwali-wali in téntii, “O Opo Empung, ni Komo si nimangun u langit wo ung kaayahan, un tasik wo péléng am witu.

²⁵ Im puuna, si Roh Lenas éng kimua mengiité si nimaopo nai Daud in téntii, ‘Kaa sé tou é maupi'? Wo kaa sé tou é megena-genang an zéi'kan siapa torona?

²⁶Sé kolano wia ung kaayahan én timégamo wo sé mahkawasa é nimaréwoko, i sumaru si Opo Empung wo si Kristus si méitaaz-Na.’

²⁷ Pahpaan un ulitna wia um wanua tua'na kenu é nimaréwoko si Herodes, si Pontius Pilatus, wo sé tahsasana wanua karia né suzu né Israel i sumaru si Yesus, si Ata-Mu Lenas, si Pinéléng-Mu.

²⁸Um winangun néra én tinotoz-Mumo rengané im puuna. Péléng niana é nimamuali pahpaan ung kawasa wo um paaz-Mu.

²⁹Wo in tarékan o Opo Empung, ilekené am pahmualin néra i ma'indé' ni kai sé ata-Mu wo wangunené ni kai in zéi'kan maindé' i mahwoka' u Nuwu'-Mu.

³⁰Iayomé u lengen-Mu i lumé'os sé tou saki wo ipapaileké a makakompo'en wo an zéi'kan kakuaan mengiité u ngaran ni Yesus, si Ata-Mu Lenas.”

³¹Karegas i mengaléi, un tampa kinaréwokan néra é mahogémo. Ni séra péléng éng kinawasamo ni Roh Lenas, a séra mahwoka' u Nuwu' ni Opo Empung karia in zéi'kan siapa un ikaindé'.

³² Péléng sé tou ma'éman én esa genang wo nimaesaan, wo zéi'kan siapa zozo' in esa si mahkua im péléng an anuna én anuna in esa, taan péléng an anuna én anu néra péléng.

³³Karia ung kawasa totoz wangko', sé aatu ni Yesus mahkua a niilek néra tumoro si Yesus si méitoumomé sumaup ni Opo Empung. Wo ni séra péléng kasii é menou-nou karia in tinambéran ung kamang totoz lakez.

³⁴Pahpaan zéi'kan siapa zozo' in esa im wia ni séra sé zéi'kan nimawutul am pemandungenna. Pahpaan péléng sé tou makauma kaapa makawalé é nimangkér an anu néra itii, wo an zoit kinailekan néramé itii ém pinahali nérama,

³⁵an iwéhéla wia sé aatu ni Yesus. Wo péléng an zoit itii é méipeméténgla né aatu ni Yesus wia si esa wo si esa mengiit am pemandungen néra.

³⁶Si Yusuf si pahkuan né aatu ni Yesus im ‘Barnabas’ ung kalakoana é mahenté' un até né tou wo ni sia kangkasii é suzu ni Lewi si nimatou witi Siprus é nimangun kangkasii un téntu.

³⁷Ni sia nimangkér un umana wo nimahalima un zoit itii an iwéhénala wia sé aatu ni Yesus.