Read Tombulu Kisah Rasul-rasul 8 Bible Online

Kisah Rasul-rasul 8 - Tombulu bible

Kisah Rasul-rasul 8

¹I ni séra nimunu' si Stefanus, si Saulus kangkasii é niméné umanla. In toro niitukan, sé jamaat witi Yerusalem rengan im pahzézéhan. Ni séra péléng én timingkas méikasera wana péléng an tana' Yudea wo Samaria, akazokan sé aatu ni Yesus sé méikatezama witi Yerusalem.

²Wo im witu kangkasii ém wéwéhan sé tou sé mahtali-talinga wia si Opo Empung. Ni séra malimewengé un awak ni Stefanus wo ni sia én ipahamé' néra karia i mahkérét.

³ Taan si Saulus é mahtututu' i mahzézéi' sé jamaat itii. Sé tuama wo sé wéwéné ém pahkéhongennamé wo ipahondolé im wana am walé wo séra ipahayonama in iuntep witi bui.

⁴Sé jamaat méikaserama pahpaan im pahzézéhan itii é mahliklik péléng un tana' itii karia i mahwoka' u Nuwu' Lé'os tumoro si Yesus.

⁵Si esaané im wia ni séra si makangaran Filipus é nimangé witi wanua tua'na esa witi tana' Samaria. Im wana ni sia mahwoka' wia sé tou tumoro si Mesias.

⁶I sé tou lakez mahtalingama an ipahkua ni Filipus wo mahileka a makakompo'en pahwangunenna, péléng sé tou itii én totoz mahwéhé genang wana an ipahkuana.

⁷Pahpaan im wia sé tou lakez sé sinelazan é mahondolé sé sétang karia i mengéré-ngérét. Wo kasii lakez sé lailai wo sé kénto' é liné'osnama.

⁸Niitumo, sé tou witi wanua tua'na itii én totoz mahpaa-paaz.

⁹Im witi wanua tua'na itii ém wéwéhan si makangaran Simon. Ni sia én urémo i mahriara wo mahwangun sé tou Samaria i mengusi-ngusingsing wo ni sia mahwangu-wangun in tou ipahpuu-puuna.

¹⁰Péleng sé tou, sé ipahpuu-puuna kaapa zéi'kan, mahkii-kiit ni sia wo mahkua, “Si tou kenu ém wéwéhan ung kawasa ni Opo Empung, um pahkuan ing Kawasa Wangko'.”

¹¹Ni séra é mahkii-kiit ni sia, pahpaan ni sia én urémo i memangu-mangun ni séra i mengusi-ngusingsing karia a riara pahwangunenna.

¹²Taan in tarékan ni séra é ma'émano wia si Filipus. Pahpaan ni sia é mahwoka' tumoro ung Kakolanoan ni Opo Empung wo tumoro si Yesus Kristus. Wo ni séra kasii, tuama wo wéwéné é sinarani.

¹³Si Simon kangkasii é nima'émanla a saranila. Kumawusa niitu, ni sia é mahkii-kiit si Filipus wo ni sia mengusi-ngusingsing i mahileka a makakompo'en wo an zéi'mo kakuaan am pahwangunen ni Filipus.

¹⁴I sé aatu ni Yesus sé witi Yerusalem timalingala i lakezo sé tou witi tana' Samaria sé ma'émano u Nuwu' ni Opo Empung, an iatu nérama si Petrus wo si Yohanes mangé witu.

¹⁵I méikaayomola witu, sé zua aatu ni Yesus itii é mengaléi, wo sé tou Samaria sé ma'émano én toro makailek si Roh Lenas.

¹⁶Ni séra é mengaléi téntu pahpaan im wia sé tou Samaria itii, zozo' in esa én zéi'kampé' siapa si nimakailek si Roh Lenas. Pahapaan ni séra én taré sinarani witu u ngaran ni Yesus si Mahpiara.

¹⁷Tumondong niitu, si Petrus wo si Yohanes é zimeta'la a lengen néra wia sé tou Samaria itii a séra makailekla si Roh Lenas.

¹⁸I nimilekla sé aatu ni Yesus in zimeta'ma u lengen néra wia sé tou itii, a sé tou itii makailekla si Roh Lenas, si Simon meriara itii é mahwéwéhé zoit wia ni séra,

¹⁹karia i mahkua, “Iwéhémé wia ni aku ung kawasa itii wo sa ni aku zumeta'ma u lengenku wia si tou, si tou itii én toro makailek si Roh Lenas.”

²⁰Taan kuan ni Petrus wia ni sia, “Ikaléwo'la ni ko wo an zoitmu itii. Pahgenangenula, ni ko én toro uman tumeles un tatambér ni Opo Empung karia an zoit.

²¹Ni ko én zéi'kan siapa katoroan im wana am pahpaayangen nai. Pahpaan un atému én zéi'kan ulit im witu u sinaru ni Opo Empung.

²²Niitumo itula'umola a léwo'an pegena-genangennu itii! Wo mengaléiola wia si Opo Empung wo ko toro ampungan-Namé im wana a léwo'an pegena-genangennu itii.

²³Pahpaan un atému mawuta-wuta un téutéu tanumokan um pa'itna un apezuh wo pahata-atan a léwo'an.”

²⁴Ang kuan ni Simon si meriara itii wia ni séra, “Ipengaléipé'mé ni aku wia si Opo Empung, wo péléng a méikua niouola wia ni aku én zéi'kan mamuali.”

²⁵I si Petrus wo si Yohanes nimakakuamola a niilek wo an tinalinga néra tumoro si Yesus wo nimakawoka'moma u Nuwu' ni Opo Empung, ni séra é nimawurima sumaup witi Yerusalem. Wo im witi pahlampangan néramé i mawurimé, lakez kasii am wanua witi Samaria am pinahwokaan néramé u Nuwu' Lé'os tumoro si Yesus.

²⁶A si malaekat ni Opo Empung numuwu'ma wia si Filipus, “Rumendaiomé wo mangémo mapatimuhma, kumiita u lalan witi Yerusalem u mahperosa mangé witi Gaza.” U lalan itii én totoz pene-penesa.

²⁷Kaitalingamé niitu, si Filipus é rengan i nimangé. Karegas i mahlampang, ilekennama si tou Etiopia si nimangémé witi Yerusalem i marimagésé. Si tou Etiopia[8] itii én tou ipahpuu-puuna wo tonaas né mengingimek an zoit ni kolano wéwéné Kandake. Si Kandake kenu éng kolano wéwéné né tou witi tana' Etiopia.

²⁸In toro niitu si tonaas itii é mawurimo witi Etiopia. Ni sia é rimumez witu ung kerétana wo karegas i mahbaca ung kitap ni nabi Yesaya.

²⁹Ang kuan ni Roh Lenas wia si Filipus, “Mangémo wo marumétéla witu ung keréta itii!”

³⁰Si Filipus éng kimii-kiita i marimétéla, an talinganala si tonaas itii é mahbaca ung kitap ni nabi Yesaya. Ang kuan ni Filipus wia ni sia, “Katulapan ni Tuang um pahbacan itii?”

³¹A mingkotla si tonaas itii, “Kura kahuman ni aku makatulap sa zéi'kan siapa si mapata'u wia ni aku?” A si tonaas itii mahaléila si Filipus i sumakémé wo rumumezé kariana.

³² Um pinantik pahbacan ni tonaas itii, én téntii, ‘Ni Sia én tanu si domba si pinahali witi tampa pahkerizan, ni Sia kasii én tanu si anak ni domba si memene-menes uman im pahguntingan né tou am wuukna.

³³Ni Sia ém pahséro'an, wo pahwangunan a mahsanaweka. Séi sé masumirita tumoro sé suzu-Na? Pahpaan ni Sia én zéi'mo wia ung kaayahan.’

³⁴A si tonaas itii meligau wia si Filipus, “Amoké ikuamé wia ni aku, tumoro si séi u méikuamé ni nabi kenu? Tumoro ni siakan kaapa tumoro si tou walina?”

³⁵A si Filipus rengan i mahnuwu' wia ni sia u Nuwu' Lé'os tumoro si Yesus. Ni sia é rimengana witu um pinantik ni nabi Yesaya un taré binacama.

³⁶I ni séra karegas mahlampang karia ung keréta, a séra ikaayola witu un tampa wéwéhan un zano. Kuan ni tonaas itii wia si Filipus, “Amoké ilekena, um witu ém wéwéhan un zano! Toromo aku i saranin in tarékan?” [

³⁷A mingkotla si Filipus, “Sa si Tuang uli-ulit ma'éman, toro.” A mingkotla si tonaas itii, “Ni aku én uli-ulit ma'éman i si Yesus Kristus itii én Oki' ni Opo Empung.”]

³⁸An ipekiento'la ni tonaas itii ung keréta. Si Filipus wo si tonaas itii tumumpama witu un zano, a sia saranila ni Filipus.

³⁹I ni séra nimondolé im witu un zano, kumompo'mé si Filipus é méipahwalimoma ni Roh ni Opo Empung nimondolé im witu wo si tonaas itii én zéi'mo nimileka ni sia. Si tonaas itii é meméhé-méhé i mahlampang karia i mahpaa-paaz.

⁴⁰Si Filipus ndéén ém witimo tana' Asdod. Ni sia mahkiité un tana' itii wo mahwoka' u Nuwu' Lé'os tumoro si Yesus wia sé tou wana péléng am wanua tua'na, makaz ni sia i méikaayoma witi Kaisarea.