Read Tombulu Roma 1 Bible Online

Roma 1 - Tombulu bible

Roma 1

¹Um pinantik kenu ém wia ni aku Paulus, ata ni Kristus Yesus, si tinawah ni Opo Empung i maéndo aatu ni Yesus Kristus wo tinotoz i mahwoka' u Nuwu' Lé'os ni Opo Empung.

²U Nuwu' Lé'os itii é méitaaz-Namomé rengan im puuna mengiité sé nabi-Na a mémoipantik witu um Pinantik Lenas.

³U Nuwu' Lé'os itii én tumoro si Oki' ni Opo Empung, si niméyé wia ung kaayahan in tou uman, méitoumé im wia si suzu ni kolano Daud.

⁴Wo karia ung kawasa ni Roh Lenas ni Sia é méitoumomé sumaup im wia sé nimaté un tumuzu'mé i ni Siamo si Yesus Kristus Mahpiarata, si Oki' ni Opo Empung si mahkawasa.

⁵Mengiité ni Sia, ni aku nimakailek ung kamang tatambér i maéndo aatu ni Opo Empung wo ni aku toro mahkit sé tahsasana wanua wo séra ma'éman wo mahtali-talinga si Yesus Kristus.

⁶Ni kamu in tou Roma é méikakaria wia sé tahsasana wanua itii, tinawahmo i maéndo anu ni Yesus Kristus.

⁷Wia ni kamu péléng sé mahento' witi Roma, ni kamu sé ikararaaté ni Opo Empung, tinawah i nimaéndo tou lenas. Mengalé-ngaléi uman ung kamang tatambér-Na wo ung kaluasan witu un até, um wia si Opo Empung, si Ama'ta, wo wia si Yesus Kristus Mahpiara é menaté-natér ni kamu.

⁸Kataré-taré ni aku éng kumuama u makasé wia si Opo Empungku karia u ngaran ni Yesus Kristus pahpaan ni kamu péléng. Pahpaan péléng sé tou, wisa uman ni séra é mahsirita tumoro um pa'émanen niou.

⁹Si Opo Empung si pahpaayangangku karia ung genang lé'os i mahwoka' u Nuwu' Lé'os tumoro si Oki'-Na, kata'uan-Na wana am pengaléiengku i ni kamu sé witi Roma sekezé ém pegena-genangengku.

¹⁰Pengaléiengku, mengalé-ngaléi uman in tarékan witu um paaz ni Opo Empung ni aku én toro ikaangékané wia ni kamu.

¹¹Pahpaan ni aku én totoz lumelo i mahilekan karia niou wo kamu toro wéténgangku un tatambér ni Roh ni Opo Empung um wiamo ni aku, wo um pa'émanen niou éng kaenté'na.

¹²Ung kalakoana, sa ni aku mahwali-wali karia niou, ni kita én toro maheenté'an un até karia um pa'émanenta.

¹³ Katuari-katuari, ung kapaazku éng kata'uan nioua i ni aku én urémo megena-genang i mangé wia ni kamu, taan makaz in tarékan én zéi'kampé' méikaangémé pahpaan sekezé ém wéwéhan a mahraung. Kapaazku am pinaayangku im wia ni kamu ém wéwéhan torona, tanu am pinaayangku am wéwéhan torona im wia sé tou zéi'kan Yahudi witi tampa walina.

¹⁴Wéwéhan um paayangen u léwo'zéi' im paayangengku wia sé tou Yunani wo wia sé tahsasana wanua walina, wia sé tou simikola wo wia sé tou zéi'kan simikola.

¹⁵Pahpaano niitu, ni aku é lumelo i mahwoka' u Nuwu' Lé'os tumoro si Yesus wia ni kamu sé mahento' witi Roma.

¹⁶ Ni aku én zéi'kan maizang i mahwoka' u Nuwu' Lé'os tumoro si Yesus, pahpaan u Nuwu' Lé'os itii éng kawasa ni Opo Empung i milot péléng sé tou sé ma'éman im witu un ukuman wana a singkéla', kataré-taré é sé tou Yahudi wo kasii sé tou zéi'kan Yahudi.

¹⁷ Pahpaan im witu u Nuwu' Lé'os itii, ikatuzu'mé kura si tou i niéndo ulit ni Opo Empung pahpaan i ma'éman wia ni Sia, rengan im puuna makaz ing kauré-uré. Tanu u méipantik witu um Pinantik Lenas in téntii, “Si tou niéndo ulit ni Opo Empung pahpaan um pa'émanenna, é mamenou-nou.”

¹⁸Si Opo Empung é mapailek un upi'-Na im witi kasendukan pahpaan péléng a singkéla' wo a léwo'an né tou, a rimaung sé tou walina i mata'u an tutuzu' ulit tumoro ni Sia.

¹⁹Un totoz kata'uan né tou tumoro si Opo Empung én uli-ulit kata'uan néramo, pahpaan niitu é méipapaileko ni Opo Empung wia ni séra.

²⁰Pahpaan un zéi'kan kailekan tumoro si Opo Empung, toro ileken wo katulapan wana am pahwangunen-Na karia ung kaenté'an wo ung kaempungan-Na makaz ing kauré-uré, rengané ung kaayahan im winangun. Niitumo zéi'kan siapa un toro iwingkot néra ing kumua i ni séra én zéi'kan mata'u si Opo Empung.

²¹ Zozo' ni séra é mata'u si Opo Empung, ni séra én zéi'kan mahlooz wo mahsigi' ni Sia in Opo Empung wo zéi'kan kumua u makasé wia ni Sia. Taan ang ginenang néra é nimawiling uman taré i megena-genang uman an zéi'kan siapa torona, taka-takazan ni séra é nimalemou wo ung genang néra é nimarimbengbeng.

²²Ni séra mahwangu-wangun in tou tulap, taan ni séra é lemou.

²³ Ni séra é simawel ung kawangko'an ni Opo Empung si makaz ing kauré-uré karia né patong opo-opo sé masuat wo sé tou sé zéi'kan makaz ing kauré-uré, sé masuat wo sé tumétéwél, sé masuat wo sé binatang epat a'é kaapa sé masuat wo sé binatang mahlangkou.

²⁴Pahpaano niitu, ni séra é méiwaya ni Opo Empung ing kinawasa a lelo néra a samek wo niitu u nimangun ni séra kinaisamekan karia né kasuat nérakan.

²⁵Ung kaulitan ni Opo Empung é sinawelan néra karia an towo. Ni séra kasii é mahsigi' wo mahongkot wia sé winangun-Na, taan kinaliuzan néramola i ni Sia si nimangun péléng am péléng si léwo'zéi' pahloozen makaz ing kauré-uré. Amin.

²⁶Niitumo ni séra é méiwaya ni Opo Empung ing kinawasa a lelo léwo' un awak néra wana ang kaizangnokané. Taka-takazan sé wéwéné zéi'mo mahwangun an toro uman wangunen né wéwéné wo né tuama, sinawelan néra uman taréla im pahwangunen karia né kawéwéné néra.

²⁷Téntu kangkasii sé tuama, ni séra én zéi'mo mahwangun an toro uman pahwangunen né tuama wo né wéwéné, taan kapasu-pasu'na uman taré lumelo i sumamek karia né katuama néra. Taka-takazan sé tuama é mahsameko karia né katuama néra. Niitumo ni séra é nimakailek un ukuman witu un tou néra mengiit a léwo'an am pinahwangun néramé.

²⁸Pahpaan ni séra én zéi'mo pandung wia si Opo Empung, ni séra é méiwaya-Na i megena-genang uman an zéi'kan toro wangunen. Niitumo ni séra éng kalousna i mahwangun an zéi'kan toro wangunen.

²⁹Ang genang néra é mawuta-wuta an totoz léwo', an zéi'kan wangun, ang kaangkuman wo ang kawuulan, téutéu, mahwunu' sé kasuat tou, mahéndo-éndoan, an tantowo, ang genang léwo' wo mahsirita an zéi'kan wangun tumoro sé tou walina.

³⁰Ni séra kangkasii é mahwuwuul u ngaran né tou walina, mazi'zis si Opo Empung, tasalouen, wera', loozan, tulap i mahwangun a léwo'an, zéi'kan mahtali-talinga sé tu'a,

³¹lemou, nimaliuz a méitaaz, zéi'kan rumaraaté, zéi'kan pandung wia sé tou walina.

³²Zozo' ing kata'uan néra an tinotoz witu un ukum ni Opo Empung, im péléng sé mahwangun niana é makailek un ukuman patéan, taan ni séra én zéi'kan kumana' i mahwangun niana, lumousé niitu sé tou sé mahwangun niana kangkasii é niénéan nérala.