Read Tombulu Roma 10 Bible Online

Roma 10 - Tombulu bible

Roma 10

¹Katuari-katuari, un totoz pelelo-lelongku wo pengaléiengku wia si Opo Empung, wo sé tou Yahudi én ipiloté im witu un ukuman wana a singkéla'.

²Pahpaan totoz kata'uangku i ni séra én totoz paaz mangun ung kapaaz ni Opo Empung zozo' in zéi'kampé' kata'uan néra kura un ulit i mangun ung kapaaz-Na.

³Ni séra én zéi'kan makatulap kura si Opo Empung i méndo ulit sé tou. Wo ni séra é mahtututu' menéro u lalan néra in esa i maéndo ulit witu u sinaru-Na. Niitumo ni séra é soo ing kumiit u lalan kura si Opo Empung i méndo ulit sé tou.

⁴Si Kristus limekepo péléng am witu un ukum Torat wia ni kita. Niitumo, péléng sé tou ma'éman wia ni Sia é niéndo ulit ni Opo Empung.

⁵ Tumoro u niéndo ulit ni Opo Empung mengiit un ukum Torat, si Musa nimantik in téntii, “Si tou mahkiit péléng un ukum Torat é mamenou-nou pahpaan mahtali-talinga un ukum Torat.”

⁶Taan tumoro u niéndo ulit ni Opo Empung mengiit um pa'émanen wia ni Sia, um Pinantik Lenas éng kimua in téntii, “Tia' mahkua witu un atému: Séi si mangé witi kasendukan i mahwalimé si Kristus in tumumpamé?”

⁷kaapa, “Séi si tumumpama witu um woso um patéan i mahwalimé si Kristus mawénété im wia sé nimaté, i mapata'u wia sé tou kura séra wo toro ipilot im witu un ukuman wana a singkéla'?”

⁸ Taan ung kalakoana tanu u méipantik witu um Pinantik Lenas in téntii: “U Nuwu' ni Opo Empung itii én zéi'kan zou'ma im wia ni kamu, witu u sumahmu wo witu un atému.” Niitu u Nuwu' ni Opo Empung um pahwoka' nai; um pa'émanen né tou.

⁹Pahpaan sa ko makaulit karia u sumahmu in esa i si Yesus é Mahpiara, wo ma'éman witu un atému i si Opo Empung én timou sumaup ni Sia im wia sé nimaté, ni ko én ipilot im witu un ukuman wana a singkéla'.

¹⁰Pahpaan karia un até si tou é ma'éman wo éndon ulit, wo karia u sumah si tou é makaulit i si Yesus é Mahpiara, ni sia én ipilot im witu un ukuman wana a singkéla'.

¹¹ Pahpaan witu um Pinantik Lenas é méipantik in téntii, “Séi uman sé ma'éman ni Sia én zéi'kan papaiza-izang.”

¹²Sé tou Yahudi wo sé tou zéi'kan Yahudi é masuat uman. Pahpaan, si Mahpiara én esa uman, si Mahpiara én anu né tou péléng. Wo ni Sia é meripu' umané i méhémé ung kamang malake-lakez wia péléng sé tou mekisawang wia ni Sia.

¹³ Pahpaan, “Séi uman sé mekisawang wia si Mahpiara én ipilot im witu un ukuman wana a singkéla'.”

¹⁴Taan, kura kahuman sé tou toro mekisawang wia ni Sia sa séra zéi'kampé' ma'éman ni Sia? Kura séra ma'éman ni Sia sa ni Sia én zéi'kampé' pinahtali-talinga nérala? Kura séra in tumalinga tumoro ni Sia sa zéi'kan siapa sé mapata'u tumoro ni Sia?

¹⁵ Wo kura sé tou i mapata'u tumoro ni Sia sa zéi'kan siapa si iatu? Witu um Pinantik Lenas é méipantik in téntii, “O ndoon ka totoz makapaazen i niméyé sé mahalimé u Nuwu' Lé'os ni Opo Empung!”

¹⁶ Taan zéi'kan péléng sé tou é simungkul u Nuwu' Lé'os itii. Pahpaan si nabi Yesaya in esa éng kimua, “Mahpiara, séi si ma'éman an ipahwoka' nai?”

¹⁷Niitumo, sé tou é ma'éman pahpaan timalinga, wo an tinalinga itii é Nuwu' tumoro si Kristus.

¹⁸ Taan ni aku é meligau: Apa sé tou Yahudi én uli-ulit zéi'kampé' timalinga u Nuwu' Lé'os tumoro si Yesus itii? Ni séra én timalingamo niitu. Pahpaan witu um Pinantik Lenas é méipantik in téntii, “Si nimahalimé an ipapata'u é nimapata'umoma wia péléng ung kaayahan, wo u méikua nérama én tinalingamoma makaz witi pondolna ung kaayahan.”

¹⁹ Taan ni aku é meligau sumaup: Apa sé tou Israel zéi'kampé' makatulap u Nuwu' Lé'os itii? Zéi'kan! Pahpaan ing kataré-taré si Musa éng kimuamo u méikua ni Opo Empung, “Ni kamu ém wanguneng-Ku in tuméutéu sé tahsasana wanua walina sé zéi'kan tou-Ku. Wo mangun ni kamu maupi' wia sé tahsasana wanua sé pahgenangen nioula i lemou.”

²⁰ Téntu kangkasii, si nabi Yesaya én totoz wuaya i mahkua, “Sé tahsasana wanua sé im puuna sé zéi'kan menéro ni Aku ém paazo i mahilekan karia-Ku, ni Aku é nimapaileko un tou-Ku wia sé tahsasana wanua sé zéi'kan meligau ni Aku.”

²¹ Taan tumoro sé tou Israel si nabi Yesaya éng kimua, “Sana endo ni Aku nimayo u lengen-Ku wia sé tahsasana wanua sé zéi'kan mahtali-talinga wo kimawal.”