Read Tombulu Roma 11 Bible Online

Roma 11 - Tombulu bible

Roma 11

¹ Niitumo, ni aku é meligau: Apa sé tou Israel sé pinéléng ni Opo Empung é mémoitia'-Na? Zéi'kan! Pahpaan ni aku in esa én tou Israel, suzu ni Abraham, wia sé suzu ni Benyamin a méyé.

²Si Opo Empung én zéi'kan timia' sé tou Israel sé pinéléng-Namo rengané im puuna. Kata'uan niouo u méipantik witu um Pinantik Lenas tumoro si nabi Elia in ipahpa'osna sé tou Israel wia si Opo Empung karia mahkua in téntii,

³ “O Opo Empung, sé nabi-Mu ém winunu'mola né tou Israel. Am peraragésan éng kinemu néramoma. Ni akumokan si menou-noupé', wo ni aku ém pahwuwunu'en néra.”

⁴ Taan kura u méiwingkotla ni Opo Empung wia ni sia? Kuan-Na, “Méitampas-Kumola sé pituna riwu tou i maéndo anu-Ku, sé zéi'kan kawisa mahongkot wo mahsigi' wia si Baal.”

⁵Téntu kangkasii in tarékan, toyo' uman sé tou Israel sé pinéléng ni Opo Empung pahpaan ung kamang tatambér-Na.

⁶Ni séra ém pinéléng ni Opo Empung pahpaan ung kamang tatambér-Na, zéi'kan pahpaan am pahwangunen néra é lé'os. Pahpaan sa si Opo Empung niméléng sé tou mengiit um pahwangunen néra, ni Sia én zéi'kan uli-ulit mapailek ung kamang tatambér-Na.

⁷Niitumo, kura? Sé tou Israel én zéi'kan nimakailek am penéro-néron néra. Sé nimakailek am penéro-néron néra én toyo' uman, ni séra é sé pinéléng ni Opo Empung. Sé walina sé soo wia ni Sia ém winangun-Na un até néra nimaketéh.

⁸ Tanu u méipantik witu um Pinantik Lenas, “Si Opo Empung é mangun ni séra tanu nimatekel, winéhan weren taan zéi'kan makailek wo winéhan lunteng taan zéi'kan makatalinga, makaz in tarékan.”

⁹ Si Daud kangkasii éng kimua, “Mengalé-ngaléi uman am pésta néra é maéndo wetes wo tataan, watu pahkasangkilan wo ukuman wia ni séra.

¹⁰Wo mengalé-ngaléi uman am weren néra é maletokla makaz ni séra zéi'kan makailek, wo mengalé-ngaléi uman ni séra é mawohkola makaz ing kauré-uré.”

¹¹Niitumo, ni aku é lumigau kasiima, “Apa sé tou Yahudi én ikasangkila téntu wo séra makemu?” Zéi'kan! Taan pahpaan a singkéla' néra, sé tou zéi'kan Yahudi é méipiloté im witu un ukuman wana a singkéla', i mangun sé tou Yahudi mahtéutéu pahpaan mahileka niitu.

¹²Pahpaan ang kasumalaan né tou Yahudi nimangunola sé tou wia ung kaayahan nimakailek ung kamang, wo a singkéla' néra nimangunola sé tahsasana wanua walina nimakailek ung kamang, woopé' kasii sa sé tou Yahudi nimawurian sumaup karia ni Opo Empung, tantumo é lumouspé'mé ung kamang iwéhé-Na.

¹³In tarékan, ni aku éng kumuama wia sé tou zéi'kan Yahudi i ni aku én aatu ni Kristus wia sé tou zéi'kan Yahudi. Ni aku mahtututu' um paayangengku toro pahloo-loozengku.

¹⁴Ni aku é mahéré'la sa am pahpaayangengku kenu én toro mangun sé kawanuaku in tuméutéu sé tahsasana wanua walina in ipilot witu un ukuman wana a singkéla', wo karia in téntu sé woopira im wia ni séra én toro sawangangku in ipiloté witu un ukuman wana a singkéla'.

¹⁵Pahpaan sa si Opo Empung soo sumungkul sé tou Yahudi, niia é maéndo lalan wangun né tou walina sé wia ung kaayahan i mawurian sumaup karia-Na. Woopé' kasii sa sé tou Yahudi sé sungkulela ni Opo Empung. Niitu én tanumokan sé tou nimatémo an itoumé sumaup ni Opo Empung im wia sé nimaté.

¹⁶Sa u sana ketor roti kataré-taré mémoiwéhéla wia si Opo Empung, tantumo péléng a roti itii é mémoiwéhéla wia ni Sia, wo sa un ahmut ung kai én anu-Na, tantumo am pangana kangkasii én anu-Na.

¹⁷Sé woopira im wia sé tou Yahudi én tanu am panga kai zaitun ni Opo Empung ang kinetoro. An iéndomé pangana ang kai zaitun wana an talun an ilaput witu ung kai zaitun ni Opo Empung. Ni kamu in tou zéi'kan Yahudi én tanu am panga kai zaitun wana an talun. In tarékan, ni kamu é nimakaileko ung katou-touan wo ung ketez witu un ahmut ung kai méitanem ni Opo Empung.

¹⁸Niitumo, ni kamu sé pahkuan im panga weru pahpaan mémokan ilaput witu ung kai zaitun méitanem ni Opo Empung, tia' mahgenangla i ni kamupé' sé tua'na taan an totoz pangana ung kai méitanem-Na ung kinetoro an itia' itii. Gena-genangen: Zéi'kan um panga u mahwéhé ung katou-touan witu un ahmut taan un ahmut u mahwéhé ung katou-touan witu um panga.

¹⁹Taan ni kamu in tou zéi'kan Yahudi ém woo wéwéhan sé mahkua, “Éné, taan am panga itii éng kinetor wo ni aku toro ilaput witu ung kai méitanem ni Opo Empung itii.”

²⁰Niitu én ulit téntu! Taan gena-genangen ang kenu, ni séra sé tanumokan um panga itii éng kinetora pahpaan ni séra én zéi'kan ma'éman, taan ni kamu in tou zéi'kan Yahudi toro nimaesa karia ung kai itii pahpaan i ma'éman. Niitumo, ni kamu én tia' mahlooz un tou niou, taan tawimo ni kamu i maindé'la.

²¹Pahpaan sa si Opo Empung zéi'kan mene'sel in tumia' sé tou Yahudi sé tanumokan pangana ang kai méitanem-Na, tia' ni kamu mahgenangla i ni Sia é mene'sel in tumia' ni kamu.

²²Niitumo, wéhanla genang kura ung kalé'osan ni Opo Empung wo sa Sia mukum én zéi'kan mahléléong. Ni Sia é uli-ulit mukum sé tou Yahudi zéi'kan ma'éman, taan ni Sia é mangun a lé'os wia ni ko, asal uman ni ko én zéi'kan mazéi' i menou-nou im witu u lé'os-Na. Sa zéi'kan téntu, ni Sia kangkasii én tumia' ni ko.

²³Taan sé tou Yahudi én tanu um panga ilaput sumaup im witu ung kai ni Opo Empung sa séra kumana'la in zéi'kan ma'éman. Pahpaan si Opo Empung si wéwéhan kawasa i lumaput sumaup ni séra witu ung kai itii.

²⁴Ni kamu in zéi'kan tou Yahudi én tanumokan am panga kai zaitun wana an talun, ang kinetoro an ilaputla witu ung kai zaitun méitanem witi uma ni Opo Empung, un zéi'kan masuat karia ung kai zaitun kinetorané niitu. Woopé' kasii sé tou Yahudi, ni séra sé totoz panga im witu ung kai itii, niitumo si Opo Empung é merorot umana i lumaputa sumaup am panga itii im witu ung kai zaitun néra in esa.

²⁵Katuari-katuari, tia' kamu mahgenangla i ni kamu é mata'umo péléng am péléng. Kapaazku ni kamu é mata'uma un ipahwuni-wunipé' kenu: lakez im wia sé tou Israel én tampezéi' taan niitu é mamuali uman akaz sé tou zéi'kan Yahudi sé ma'éman si Opo Empung lekepo.

²⁶ In toro niitumo, péléng sé tou Israel én ipilot im witu un ukuman wana a singkéla', tanu u méipantik witu um Pinantik Lenas, “Si milot ni kamu im witu un ukuman wana a singkéla' é méyé, ni Sia ém witi Sion wo méyé. Péléng a singkéla' né suzu ni Yakub én zéi'en-Na.

²⁷ Wo kenumo um pinataazan-Ku karia néra in oras ni Aku zuméi' a singkéla' néra.”

²⁸Pahpaan sé tou Yahudi é soo ma'éman u Nuwu' Lé'os tumoro si Yesus, niitumo ni séra é nimaéndo kakoro' ni Opo Empung. Taan niitu u nimaéndo lalan né tou zéi'kan Yahudi in ipilot im witu un ukuman wana a singkéla'. Zozo' in téntu, sé tou Yahudi én ikararaaté ni Opo Empung pahpaan un taaz-Na wia sé nimaopo néra.

²⁹Pahpaan si Opo Empung én zéi'kan mamuali in zuméi' an tatambér wo an tatawah-Na.

³⁰Tanu ni kamu in tou zéi'kan Yahudi im puuna én zéi'kan mahtali-talinga si Opo Empung taan pinapailekano u raraatéan-Na pahpaan sé tou Yahudi zéi'kan ma'éman wia ni Sia.

³¹Téntu kangkasii sé tou Yahudi, in tarékan ni séra én zéi'kan mahtali-talinga wia ni Sia, wo pahpaan u raraatéan-Na ung kinailekan niouo in tou zéi'kan Yahudi, ni séra kangkasii é makailek u raraatéan-Na.

³²Pahpaan péléng sé tou é mémoiwaya-Na ing kinawasa un zéi'kan mahtali-talinga wo Sia toro mapailek u raraatéan-Na wia péléng sé tou.

³³ O ndoon si Opo Empung, ni Sia én totoz wa'ilan, totoz tulap wo totoz lakez ang kata'uan-Na! Zéi'kan siapa si makawawa i mahtata'u an tinotoz-Namo, wo péléng am pahpaayangen-Na én zéi'kan katulapan!

³⁴ Tanu u méipantik witu um Pinantik Lenas, “Séi si mata'u ang ginenang ni Opo Empung? Séi si makawawa i sumésa wia ni Sia?

³⁵ Kaapa séi si nimahwéhé-wéhéla apa uman wia ni Sia wo niitu én totoz im waéren-Na?”

³⁶ Pahpaan péléng am péléng ém winangun-Na, wo wia ni Sia a méyé, wo wia ni Sia uman. U looz wo sigi' ém wia ni Sia uman makaz ing kauré-uré. Amin.