Read Tombulu Roma 13 Bible Online

Roma 13 - Tombulu bible

Roma 13

¹Péléng sé tou é léwo'zéi' i mahtali-talingala wia sé pemerénta, pahpaan zéi'kan siapa pemerénta sé zéi'kan wia si Opo Empung a méyé wo péléng sé pemerénta én tinotoz ni Opo Empung.

²Niitumo, séi si mahsaru sé pemerénta, ni sia kangkasii é mahsaru an tinotoz ni Opo Empung, wo séi si mahwangun an téntu é mahalimé un ukuman wia ni sia.

³Pahpaan, sa si tou nimangun u lé'os, ni sia én tia'mo maindé' wia sé pemerénta, taan maindé'la sa nimangunola a léwo'an. Paaz ko wé i menou-nou zéi'kan maindé' wia sé pemerénta? Mahwangunola a lé'os wo ni kamu makailek u lolooz né pemerénta.

⁴Pahpaan sé pemerénta é menanawang ni Opo Empung i maayang tumoro ang kawangunan niou. Taan sa ko mahwangun a léwo'an, ni ko én totoz maindé'la ni séra pahpaan ni séra ém wéwéhan kawasa i mukum ni ko. Sé pemerénta én ata ni Opo Empung i mapailek un upi'-Na wia sé tou mahwangun a léwo'an.

⁵Niitumo ni kita é léwo'zéi' mahtali-talingala sé pemerénta. Ni kita i mahtali-talinga sé pemerénta én zéi'kan uman pahpaan i maindé' ukumen, taan pahpaan mahtali-talinga ung genang lé'osta.

⁶Niitumo ni kamu léwo'zéi' i mahwaérla am pajak wia sé pemerénta. Pahpaan sé pemerénta é mahpaayang am paayangen méiwéhé ni Opo Empung wia ni séra.

⁷ Pahwaérela wia péléng sé tou a léwo'zéi' im waérennu. Am pajak ém waérela wia sé menanagi am pajak wo waérela am walina an totoz im waérennu wia sé pemerénta. Pahongkotala sé tou wangun im pahongko-ongkotan wo pahsigi'ela sé tou wangun im pahsigi-sigi'en.

⁸Tia' mahutang apa uman wia si séi uman. Taan ni kita é léwo'zéi' i mahraa-raatéan si esa wo sé walina, niitu én utang zéi'kan kawaéran. Pahpaan si tou rumaraaté sé tou walina, ni sia é nimangunola un ukum Torat.

⁹ Pahpaan witu un ukum Torat é méipantik in téntii, “Tia' mahsamek, tia' mahwunu' tou, tia' mahremu', tia' malelo an anu né tou walina,” wo am perénta walina ém pinakasamo witu um Pinantik Lenas in téntii, “Iraraatéla si kasuat tou tanu ni ko i rumaraaté un toumu in esa!”

¹⁰U raraatéan én zéi'kan mahwangun a léwo'an wia si kasuat tou, pahpaan u raraatéan é masuat wo u mahwangun péléng un ukum Torat.

¹¹Niia u léwo'zéi' im wangunen niou pahpaan ni kamu mata'umo a mahmuali in tarékan, i ni kamu sé timekel én orasnamo in tumooz. Pahpaan un oras si Yesus Mahpiarata i mawurimé sumaup, i milot ni kita im witu ung kaayahan léwo' kenu é lelezo, lumelezpé'mé i ni kita taré ma'émanla im puuna.

¹²Un orasta i menou-nou wia ung kaayahan én tawimo maapu masuat wo um wengi i maendomo. Un endo si Mahpiara i méyé én zéi'mo uré. Niitumo, kumana'mola i mahwangun a léwo'an tanu am pemangu-mangunen né tou menou-nou wana ang karimbengbengan. Tanu sé suraro nimimeko ang kokoro' i masumaru sé kakoro', ni kita kangkasii é léwo'zéi' i mahwangunla an toro sumawang ni kita i sumaru a léwo'an.

¹³Méyémo kita menou-nou karia im wangun tanu am pahwangunen né tou in endo. Tia' memésta-mésta uman wo mapahtetewelen, tia' mahsamek wo mahkiit uman a lelo léwo' un awak. Tia' mahéndo-éndoan wo mahtétéutéuan si esa wo si esa.

¹⁴Taan méyémo kita maéndo tanu si Yesus Kristus Mahpiara, wo pahilekené né tou am pahwangunenta. Karia in téntu, ni séra én tanu nimilek ni Sia witu un touta. Wo tia'mo megena-genang uman ing kumiit a lelo léwo' un awakmu in esa.