Read Tombulu Roma 14 Bible Online

Roma 14 - Tombulu bible

Roma 14

¹ Sungkulela sé tou zéi'kan tahlous enté' um pa'émanenna wo tia' mahzéi-zéi'an karia néra.

²Pahpaan wéwéhan sé katuari totozo enté' um pa'émanen néra wo witu ung genang néra i ni séra én toro kuman péléng ang kakanen. Taan sé tou zéi'kampé' totoz enté' um pa'émanen néra mahgenangla sa ni séra én toro uman kuman a séndé'en.

³Sé mahgenangla in toro kuman péléng ang kakanen én tia' memawa' sé mahkan uman a séndé'en. Pahpaan si Opo Empung é simungkulo ni séra. Téntu kangkasii sé mahkan uman a séndé'en én tia' mapahsasala' sé toro kuman apa uman an toro kanen. Pahpaan si Opo Empung kangkasii é simungkulo ni séra.

⁴Séi ndéén ko wé taka-takazan ni ko mapahsasala' am pahwangunen ni pahayoan né tou walina? Si tuang ni pahayoan itii uman si mata'u sa sia ulit kaapa simala'. Taan ni sia é mamemangu-mangun an ulit pahpaan si Mahpiara é mahsawang ni sia.

⁵Wéwéhan kangkasii sé tou mahgenangla un endo esa é lumouspé'mé an endo walina, wo wéwéhan kangkasii sé tou mahgenangla sa péléng an endo é masuat uman. Tumoro niana, tawimo si esa wo si esa én tumotozola mengiit um pa'émanenna.

⁶Si tou mahsanapa' un endo esa, ni sia é nimangun niitu i sumigi' si Mahpiara. Séi si mahkan apa uman un toro kanen, ni sia é nimangun niitu i sumigi' si Mahpiara, pahpaan ni sia éng kimua u makasé wia si Opo Empung. Wo si zéi'kan mahkan am wayaan uman, ni sia kangkasii é nimangun niitu i sumigi' si Opo Empung, pahpaan ni sia kangkasii éng kimua u makasé wia si Opo Empung.

⁷Pahpaan zéi'kan siapa zozo' in esa im wia ni kita si menou-nou kumiit uman ung ginenangna in esa, wo zéi'kan siapa zozo' in esa si maté kumiit uman ung ginenangna in esa.

⁸Sa kita menou-nou, ni kita é menou-nou wia si Mahpiara, wo sa kita maté, ni kita maté wia si Mahpiara. Niitumo, ni kita i menou-nou kaapa i nimaté, ni kita én anu ni Mahpiara.

⁹Pahpaano niitu si Kristus nimaté wo méitou sumaup ni Opo Empung im wia sé nimaté wo ni Sia maéndo Mahpiara né tou nimaté wo né tou menou-nou.

¹⁰ Taan ni ko, kaa am pahwangunen né katuari esa pa'émanen ém pahtotozennu in ulit kaapa zéi'kan? Kaapa kaa ni ko memawa' sé katuari esa pa'émanen? Pahpaan ni kita péléng én isaru wia si Opo Empung in totozen am pahwangunen ulit kaapa zéi'kan.

¹¹ Pahpaan witu um Pinantik Lenas é méipantik téntii: “ ‘Ni Aku én uli-ulit menou-nou’, kuan ni Opo Empung, ‘péléng sé tou é mongkot wo sumigi' witu u sinaru-Ku, wo péléng sé tou é makaulit ni Aku én Opo Empung.’ ”

¹²Niitumo, ni kita péléng si esa wo si esa é mamingkot am peligauen ni Opo Empung tumoro am pinahwanguntamé.

¹³Niitumo, tia'mo kita mahtototozampé' kasii ulit kaapa zéi'kan am pahwangunen! Taan, tawimo kita mahtututu'la in zéi'kan mangun si katuari esa pa'émanen maéndo zéi'kan enté' kaapa mahwangun a singkéla'.

¹⁴Pahpaan ni aku nimaesamo karia ni Yesus Mahpiara, niitumo totoz ing kata'uangku wo pa'émanengku in zéi'kan siapa ang kakanen a sinéro' ing kanen. Taan sa wéwéhan si mahgenangla niitu é sinéro' ing kanen, niitu ém wia uman ni sia si mahgenang in téntu.

¹⁵Pahpaan sa ni ko nimangunola un até ni katuarimu itii i rumara pahpaan ang kakanen, ni ko én zéi'kan rumaraaté si katuarimu itii. Tia' wo um pahkanennu nimangun si katuarimu ikaléwo', pahpaan si Kristus kangkasii é nimaté in tumubus ni sia.

¹⁶Niitumo, tia' ipahwaya niou um wangun im witu un tou niou ém pahtawuruken né tou walina.

¹⁷Pahpaan ung Kakolanoan ni Opo Empung én zéi'kan tumoro ang kakanen wo am pengengelepen, taan tumoro ung kaulitan, u mahlé'o-lé'osan wo u mahpaa-paaz wia si Roh Lenas.

¹⁸Pahpaan séi uman si pakahpaayangna wia si Kristus én tanu niitu, ni sia é nimangun si Opo Empung mahpaa-paaz wo ni sia é sigi'en né kasuat tou.

¹⁹Niitumo, mahtututu'mola i menéro a mahalimé u mahlé'o-lé'osan wo a mahenté' am pa'émanen né tou esa pa'émanen.

²⁰Tia' léwo'ennu am pahpaayangen ni Opo Empung pahpaan ang kakanen. Péléng ang kakanen én toro kanen. Taan si tou é masumala' sa sia nimangun si tou esa pa'émanen simingkéla' pahpaan um pahkanenna.

²¹Tawimo in zéi'kan mahkan lé'ona kaapa mahelep anggor, kaapa mangun am walina an toro mangun si katuari esa pa'émanen i sumingkéla'.

²²Iwayamola apa um pa'émanennu itii, wangunennula wia ni ko in esa witu u sinaru ni Opo Empung. Si tou zéi'kan mahgenangla i simala' im wana ang ginenangna in ulit, ni sia é mahpaa-paaz.

²³Taan séi si mahzua-zua genang ing kuman, ang kumankala ung kakanen itii, si tou itii ém papahsasala' ni Opo Empung pahpaan um pahwangunenna itii én zéi'kan mengiit um pa'émanenna. Wo apa uman um pahwangunenna sa zéi'kan ma'éman, niitu é singkéla'.