Read Tombulu Roma 15 Bible Online

Roma 15 - Tombulu bible

Roma 15

¹Ni kita sé enté'mo um pa'émanen é léwo'zéi' in ezen im wana an zéi'kan enté' né tou zéi'kan enté' um pa'émanen néra, tia' ni kita menéro uman u mahpaa-paazta in esa.

²Si esa wo si esa im wia ni kita é léwo'zéi' mahtututu' i menéro u mahpaa-paaz ni kasuat tou i mangun ung kawangunanna, wo kaenté'na um pa'émanen néra.

³ Pahpaan si Kristus kangkasii én zéi'kan uman menéro u mahpaa-paaz witu un tou-Na in esa, taan tanu u méipantik witu um Pinantik Lenas in téntii: “Péléng a séséro'an néra wia si Opo Empung, niana kangkasii én timoro ni Aku.”

⁴Péléng a mémoipantik witu um Pinantik Lenas ém pinantik in tumuzu' ni kita. Pahpaan an tutuzu' kinailekanta witu um Pinantik Lenas, nimangun ni kita in ezen wo enté' un até wo kita wéwéhan um pahéré'an wia si Opo Empung.

⁵Mengalé-ngaléi uman si Opo Empung si mahwéhémé ang kaezenan wo a mahenté' un até kangkasii é méhémé un esa genang wia ni kamu, tanu ung kapaaz ni Kristus Yesus,

⁶makaz ni kamu esa genang wo esa nuwu' i mahlooz wo mahsigi' si Opo Empung, si Ama' ni Yesus Kristus si Mahpiarata.

⁷Niitumo, sungkulela si esa wo sé walina, tanu si Kristus simungkulo ni kamu, i lumooz wo sumigi' si Opo Empung.

⁸Ung kalakoana én téntii: Si Kristus é nimaéndomo menanawang im wia sé tou Yahudi i mapailek i si Opo Empung én zéi'kan maliuz wana a méitaaz-Na wia sé nimaopota.

⁹ Si Kristus kangkasii nimangun sé tahsasana wanua walina i lumooz wo sumigi' si Opo Empung pahpaan u raraatéan-Na wia ni séra. Méipantik witu um Pinantik Lenas in téntii: “Pahpaano niitu ni aku é malumooz si Opo Empung witu un unez né tahsasana wanua wo kumantar ang kakantaren i lumooz u ngaran-Mu.”

¹⁰ Wo wéwéhan kasii u méipantik witu um Pinantik Lenas in téntii: “É kamu sé tahsasana wanua walina, mahpaa-paazola karia né tou ni Opo Empung.”

¹¹ Wéwéhampé' kasii u méipantik witu um Pinantik Lenas in téntii: “É kamu péléng sé tahsasana wanua walina, loozela si Opo Empung, wo iwayala péléng sé tou i lumooz ni Sia.”

¹² Si nabi Yesaya kangkasii é nimantik witu um Pinantik Lenas in téntii: “Im wia sé suzu ni Isai é méyé si tou si mamerénta wia péléng sé tahsasana wanua, wia ni Sia uman séra niméré'.”

¹³Mengalé-ngaléi uman si Opo Empung, si mahwéhémé am pahéré'an é méhémé malake-lakez wia ni kamu u mahpaa-paaz wo ung kaluasan witu un até pahpaan ni kamu ma'éman wia ni Sia. Wo karia ung kawasa ni Roh Lenas, um pahéré'an niou é malake-lakez wia si Opo Empung.

¹⁴Katuari-katuariku, kata'uangku i ni kamu é mawuta-wutamo karia am wangun wo péléng ang kata'uan wo makawawa i sumésa wia si esa wo si esa.

¹⁵Taan pahpaan ang kamang tatambér ni Opo Empung wia ni aku, makaz ni aku ém wuaya i mapagenang wia ni kamu tumoro am walina a mémoipantikku witu um pinantikku kenu.

¹⁶Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

¹⁷Niitumo, pahpaan ni aku én nimaesamo karia ni Kristus, ni aku mahlolooz un touku tumoro um pahpaayangengku wia si Opo Empung.

¹⁸Pahpaan ni aku ém wuaya uman i numuwu' tumoro am pinaayango ni Kristus wia ni aku, i mangun sé tou zéi'kan Yahudi mahtali-talinga wia si Opo Empung. Ni aku é mangun niitu witu um pahnuwu'engku wo um pahwangunengku,

¹⁹karia a makakompo'en wo an zéi'kan kakuaan pahpaan ung kawasa ni Roh ni Opo Empung. U Nuwu' Lé'os tumoro si Yesus Kristus é mémoipahwoka'kumé wia sé tou, rengané im witi Yerusalem makaz witi Ilirikum.

²⁰Un toro ipahloo-loozku i ni aku é nimahwoka'mé u Nuwu' Lé'os itii wana an tampa zéi'kampé' mata'u si Kristus. Ni aku é soo in tumerusokan am paayangengku witi tampa pinahwokaané né tou walina, tanumokan si tou rumendai um walé witu un to'tolan winangun né tou walina.

²¹ Witu um Pinantik Lenas é méipantik in téntii: “Sé tou zéi'kampé' nimakailek am wowoka' tumoro ni Sia, é mamilek ni Sia. Wo sé tou zéi'kampé' nimahtali-talingala am wowoka' tumoro ni Sia, é makatulap niitu.”

²² Niitumo, ni aku zéi'kampé' méikaangémé wia ni kamu pahpaan sekezé ém wéwéhan un mapé'.

²³Taan in tarékan, am paayangengku wia am wanua kenu é mémoisampetkula. Pahpaan ni aku ém pinahta'unano im paaz mangé wia ni kamu,

²⁴mengalé-ngaléi uman, ni aku i mangé witi Spanyol én toro tumulima witu wo mahilekan karia niou im witi Roma wo toro mahpaa-paazla karia niou zozo' in zéi'kan mauréma. Mengalé-ngaléi uman ni aku én toro sawangan nioué i mangé witi Spanyol.

²⁵ Taan in tarékan ni aku éng karegas mahlampanga mangé witi Yerusalem, i mahalima a sasawang wia sé tou ma'éman wana.

²⁶Pahpaan sé tou ma'éman sé witi Makedonia wo Akhaya é nimaesaanola im wéwéhan un iwéhé nérama wia sé tou ma'éman zéi'kan siapa apa sé witi Yerusalem.

²⁷ Karia i mahpaa-paaz ni séra timotozla i mangun un téntu. Taan pahilekengkula ni séra é léwo'zéi' sumawang sé tou zéi'kan siapa apa itii. Pahpaan, sa sé tou Yahudi é niméténgo wia sé tou zéi'kan Yahudi ung kamang in timalinga u Nuwu' Lé'os tumoro si Yesus, tantumo sé tou zéi'kan Yahudi sé ma'éman é léwo'zéi' i sumawang sé tou Yahudi karia i méhéla wia ni séra am pemandungen néra.

²⁸Niitumo, sa ni aku simampetoma wo niméhémoma an zoit sasawang né tahsasana wanua walina itii wia ni séra, taré ni aku mangé witi Spanyol lumangkoié um wanua tua'na niou.

²⁹Wo kata'uangku sa ni aku méyé wia ni kamu, ni aku é mahalima malake-lakez ung kamang ni Kristus wia ni kamu.

³⁰Pahpaan ni aku nima'esamo karia ni Yesus Kristus si Mahpiarata wo karia u raraatéan ni Roh Lenas, ni aku mahaléi wia ni kamu katuari-katuari wo kita enté' i mahmengaléi mahwali-wali tumoro ni aku wia si Opo Empung.

³¹Mengaléila wo si Opo Empung miloté ni aku im wia sé tou zéi'kan ma'éman sé witi Yudea, wo um paayangengku i mahalima a sasawang witi Yerusalem é sungkulen né tou ma'éman wana.

³²Karia in téntu, witu um paaz ni Opo Empung, ni aku é mamahilekan karia niou karia i mahpaa-paaz. Sa kita nimahilekanola, ni aku én toro kumana' karia niou wo un atéku én toro enté'en nioué.

³³Si Opo Empung si mahwéhémé ung kaluasan witu un até é menaté-natér ni kamu péléng! Amin.