Read Tombulu Roma 2 Bible Online

Roma 2 - Tombulu bible

Roma 2

¹ Niitumo, séi uman ni ko, tia' mapahsasala' sé tou walina pahpaan ni ko in esa én zéi'kan siapa un toro iwingkot ing kumua i ni ko én ulit. Karia i mapahsasala' sé tou walina, ni ko kangkasii é mapahsasala' am pahwangunennu, pahpaan ni ko si mapahsasala' sé tou walina é memangu-mangun kangkasii an téntu.

²Kata'uanta i si Opo Empung uman si ulit i mukum sé tou sé mahwangun an tanu niitu.

³Wo ni ko, si tou mapahsasala' sé tou walina, taan ni ko in esa é memangu-mangun a léwo'an tanu am pahwangunen néra, kaa ko é mahgenangla sa ko én ikapiloté im wana an ukuman ni Opo Empung?

⁴Kaa iperorosmu u raraatéan-Na, ung kaezenan-Na wo ung kalé'osan-Na un totoz wangko' im wia ni ko? Zéi'kan kata'uannu wé ung kalakoan u raraatéan ni Opo Empung u mahkit ni ko in tumula'ula a singkéla'mu?

⁵Pahpaan ung kaketéhan un atému i soo tumula'u a singkéla', niitu u nimangun uman taré un upi' ni Opo Empung éng kalousna im wia ni ko, makaz ni Sia mapailek un ukuman-Na un zéi'kan mahsanaweka wia ni ko witu un endo tinotoz-Namo.

⁶ Si esa wo si esa é makailek um wawaér ni Opo Empung mengiit am pinahwangunnamé.

⁷Si Opo Empung é méhé ung katou-touan makaz ing kauré-uré wia sé tou sé zéi'kan mazéi' mahwangun am wangun i menéro u sisigi'an, u lolooz wo ung katou-touan un zéi'kan maléwo'.

⁸Taan sé tou mahgenang uman un touna in esa wo zéi'kan mahkiit ung kaulitan taan mahkiit uman a léwo'an, ni séra én totoz ikaupi' ni Opo Empung.

⁹Am pengalin wo an zézéha é matumoro si esa wo si esa wia sé tou memangu-mangun a léwo'an, kumataréma wia sé tou Yahudi wo kangkasii wia sé tou zéi'kan Yahudi.

¹⁰Taan u lolooz, u sisigi'an wo ung kaluasan witu un até éng kailekan né memangu-mangun a lé'os, kumataréma wia sé tou Yahudi wo kasii sé tou zéi'kan Yahudi.

¹¹ Pahpaan si Opo Empung én zéi'kan mahpélé-péléng tou.

¹²Péléng sé tou mahsingkéla' sé zéi'kan mata'u un ukum Torat én ukumen zéi'kan mengiit un ukum Torat. Taan péléng sé tou mahsingkéla' sé mata'umo un ukum Torat én ukumen mengiit un ukum Torat.

¹³Pahpaan sé niéndo ulit im witu u sinaru ni Opo Empung én zéi'kan sé timalinga un ukum Torat, taan sé niéndo ulit é sé tou mahwangun un ukum itii.

¹⁴Sé tou zéi'kan Yahudi én zéi'kan makaanu un ukum Torat. Taan sa ni séra, karia um paaz in esa mahkiit un ukum itii, niitu én tumuzu'mé sa un ukum Torat ém witumo un até néra, zozo' ni séra én zéi'kan makaanu un ukum itii.

¹⁵Karia in téntu ni séra én tumuzu'mé sa un ukum Torat ém witumo un até néra. Niitumo ung genang lé'os néra mapata'umé tumoro ang kata'uan néra. Ni séra satorona é méipapahsasala' ang genang néra wo satorona niéndo ulit ang genang néra.

¹⁶Niitu én ikatuzu'mokané witu un endo i si Opo Empung, mengiité si Kristus Yesus, i matumotoz ulit kaapa zéi'kan péléng a méikawuni witu un até né tou, mengiit u Nuwu' Lé'os tumoro si Yesus u mémoipapata'uku wia sé tou.

¹⁷Taan, sa ni ko mahkua in tou Yahudi wo niméré' uman witu un ukum Torat wo nimaesa karia ni Opo Empung, nimangun ni ko mahlooz un toumu,

¹⁸wo mata'u ang kapaaz ni Opo Empung wo tinuzu'mo mengiit un ukum Torat, toro méléng wisa um wangun wo wisa un zéi'kan wangun,

¹⁹mahgenangla in totoz mata'u in tumuzu' sé tou tumoro an tutuzu' kaulitan, tanumokan i mahkit sé tou letok wo tanumokan maéndo sena' wia sé tou witu u rimbengbeng,

²⁰mahgenang kasiila i mahtuzu' sé tou zéi'kampé' mata'u un ulit wo mahtuzu' sé tou mahasa-asarpé' sé koki', pahpaan mata'umo un ukum Torat, mahgenangla péléng ang kata'uan wo an tutuzu' kaulitan éng kata'uannumo,

²¹taka-takazan sé tou walina ém pahtuzu'ennu, kaa un toumu in esa én zéi'kan pahtuzu'ennu? Pahtuzu'ennu sé tou, “Tia' mahremu',” kaa ko in esa é mahremu'?

²²Ni ko é mahkua, “Tia' mahsamek,” kaa ko in esa é mahsamek? Ikazi'zismu sé opo-opo, kaa ko in esa é mahremu'mé am witi tampa né opo-opo?

²³Ni ko é mahloo-looz un toumu i mata'u un ukum Torat, taan kaa ni ko in esa é mahséro' wia si Opo Empung karia in zéi'kan mahkiit un ukum Torat?

²⁴ Tanu u méipantik witu un ukum Torat in téntii: “Pahpaano ni kamu in tou Yahudi, u ngaran ni Opo Empung ém pahséro'an im wia sé tahsasana wanua walina.”

²⁵U sunat ém wéwéhan torona sa kita in tou Yahudi mahkiit un ukum Torat. Taan, sa zéi'kan mahkiit un ukum Torat, im witu u sinaru ni Opo Empung ni kita én tanumokan sé tou zéi'kan Yahudi wo um pahsunaten én zéi'kan siapa torona.

²⁶Niitumo, sa sé tou zéi'kan Yahudi sé zéi'kan sinunat é mahtali-talinga un ukum Torat, niitu én tumuzu'mé i ni séra é masuat karia né tou sinunato.

²⁷Wo sé tou zéi'kan sinunat taan mahwangun a méipantik witu un ukum Torat, ni séramo sé matumotoz ulit kaapa zéi'kan am pahwangunen niou, sé makaanu un ukum Torat wo sinunat taan zéi'kan mahwangun un ukum Torat itii.

²⁸Pahpaan si uli-ulit tou Yahudi én zéi'kan pahpaan sé tu'ana én tou Yahudi, wo un uli-ulit sinunat én zéi'kan pahpaan un awakna ém wéwéhano um walulang i sinunat.

²⁹ Taan si uli-ulit tou Yahudi é si uli-ulit tou Yahudi witu un aténa, wo si uli-ulit sinunat é si tou witu un aténa ém pahpaayangano ni Roh ni Opo Empung, zéi'kan uman méipantik witu um pahpantikan. U lolooz wia si tou tanu ni sia én zéi'kan wia si kasuat tou a méyé, taan wia si Opo Empung a méyé.