Read Tombulu Roma 4 Bible Online

Roma 4 - Tombulu bible

Roma 4

¹Niitumo, apa u maikuata tumoro a nimamuali wia si Abraham, si ama' né nimaopota?

²Pahpaan sa si Abraham é niéndo ulit pahpaan am pahwangunenna, ni sia ém wéwéhan un toro ipahloo-loozna taan zéi'kan mahloo-looz witu u sinaru ni Opo Empung.

³ Witu um Pinantik Lenas é méipantik in téntii, “Si Abraham é ma'éman si Opo Empung, niitumo ni sia é niéndo-Na ulit.”

⁴Si tou nimaayango, um wawaér wia ni sia én zéi'kan méitambér umané taan niitu én anuna.

⁵Taan wéwéhan si tou zéi'kan niméré' witu um pinaayangna, taan ni sia é ma'éman i si Opo Empung si niméndo ulit sé tou zéi'kan pandung ni Sia. Pahpaan um pa'émanenna itii ni sia niéndo-Na ulit.

⁶Si Daud kangkasii éng kimua i mahpaa-paaz sé tou niéndo ulit ni Opo Empung zéi'kan pahpaan am pahwangunenna.

⁷Si Daud kimua in téntii: “Mahpaa-paazla si tou niampungan ang kasumalaanna, wo sé zinéi' a siningkéla'na;

⁸mahpaa-paazla si tou a siningkéla'na én zéi'kan méirékén ni Mahpiara wia ni sia.”

⁹Apa u mahpaa-paaz kenu ém wia uman sé tou sinunat kaapa karia né tou zéi'kan sinunat? Pahpaan u mémoikua nai i si Abraham é ma'éman si Opo Empung, niitumo ni sia é niéndo-Na ulit.

¹⁰Kawisa si Abraham niéndo ulit ni Opo Empung? Apa puunala ni sia i sinunat kaapa i sinunato? Ni sia é niéndo ulit puunala sia i sinunat, zéi'kan i sinunato.

¹¹ Si Abraham é sinunat in urémo ma'éman wia si Opo Empung wo u sunat itii é meterai i ni sia niéndo-Namo ulit in zéi'kampé' sinunat. Niitumo ni sia é niéndo ama' né tou ma'éman zozo' sé tou ma'éman itii zéi'kampé' sinunat wo ni séra niéndo ulit ni Opo Empung.

¹²Ni sia kasii é niéndo ama' né tou sinunat, sé zéi'kan uman sinunat, taan kangkasii pahpaan ni séra menou-nou karia i ma'éman wia si Opo Empung tanu um pa'émanen ni Abraham, si ama' né nimaopota, puunala sia i sinunat.

¹³ Si Opo Empung é niméhé un taaz wia si Abraham karia né suzuna i ni séra é makailek ung kaayahan. Ni Sia én timaaza un téntu, zéi'kan pahpaan si Abraham mahkiit un ukum Torat, taan niéndo ulit pahpaan um pa'émanenna wia si Opo Empung.

¹⁴ Sa sé tou mahkiit un ukum Torat uman sé makailek un taaz ni Opo Empung, sé tou ma'éman si Opo Empung én zéi'kan siapa torona, wo un taaz itii én zéi'en.

¹⁵Pahpaan ang kasumalaan wana an ukum Torat é mahalimé un upi' ni Opo Empung, taan sa zéi'kan siapa an ukum Torat, tantumo én zéi'kan siapa sé sumala'.

¹⁶ Niitumo, pahpaan um pa'émanen wia si Opo Empung a makailek un taaz-Na. Un taaz itii é makailekan pahpaan ung kamang méitambéré ni Opo Empung. Niitu é makailekan péléng né suzu ni Abraham, zéi'kan uman sé tou mahkiit un ukum Torat, taan kasii wia sé tou ma'éman tanu um pa'émanen ni Abraham, si ama'ta péléng sé ma'émano.

¹⁷ Tanu u méikua ni Opo Empung u méipantik witu um Pinantik Lenas, “Ni ko én tinotoz i maéndo ama' né tahsasana wanua lakez.” Ni sia én ama'ta im witu u sinaru ni Opo Empung. Un taaz itii é méiwéhéla ni Opo Empung wia si Abraham wo totoz pa'émanenna un taaz ni Opo Empung, si timou sumaup sé nimaté. Ni Sia kasii si numuwu' umana é mangun an zéi'kan siapa é mawia.

¹⁸ Zozo' ing kata'uan ni Abraham i ni sia én zéi'mo mahéré'la i makailek oki', taan ni sia mahéré' uman wo kasii ma'éman wia si Opo Empung i ni sia é maéndo ama' né tahsasana wanua mengiit u méipantik witu um Pinantik Lenas, “Sé suzumu én totoz malakez.”

¹⁹ Zozo' ing kata'uannamo sa un touna éng katu'anamo pahpaan ung katou-touanna é sana atus ta'uno wo si Sara kangkasii ém pesel, taan um pa'émanenna én zéi'kan mahina'ma.

²⁰Ni sia én totoz ma'éman wo zéi'kan mahzua-zua genang im witu u méitaaz ni Opo Empung. Lumouspé'tarémé niitu, um pa'émanenna éng kaenté'na wo ni sia mahlooz wo mahsigi' si Opo Empung.

²¹Totoz pa'émanen ni Abraham i si Opo Empung én toro mangun u mémoitaaz-Na.

²²Si Abraham é ma'éman si Opo Empung, niitumo ni sia é niéndo-Na ulit.

²³U méipantik, “Niéndo ulit ni Opo Empung,” zéi'kan uman méipantik wia si Abraham,

²⁴taan niitu kangkasii é méipantik wia ni kita pahpaan ni kita kangkasii é niéndo ulit ni Opo Empung. Ni kita é niéndo-Na ulit pahpaan ni kita ma'éman ni Sia, si timoumé sumaup si Yesus Mahpiarata im wia sé nimaté.

²⁵ Ni Sia é méiayo im wunu'en pahpaan a singkéla'ta. Ni Sia é méitou sumaup ni Opo Empung wo kita niéndo ulit ni Opo Empung.