Read Tombulu Roma 7 Bible Online

Roma 7 - Tombulu bible

Roma 7

¹Katuari-katuari! Ni aku é numuwu'ma wia ni kamu sé mata'umo an tinotoz. Zéi'kan kata'uan niou wé an tinotoz itii éng kimawasa si tou i ni sia menou-noupé'?

²Tanu ang kenu: si wéwéné kimawéngo ém pina'esa karia ni mahayona mengiit an tinotoz i si mahayona itii menou-noupé'. Taan sa si mahayona itii matéma, si wéwéné itii é mémoipilot im wana an tinotoz tumoro u mahkawéng.

³Niitumo, si wéwéné itii é mahsameko sa ni sia kumawéngla karia ni tuama walina i si mahayona menou-noupé'. Taan sa si mahayona matéma, si wéwéné itii én zéi'mo kinawasa an tinotoz itii. Niitumo, ni sia én zéi'kan mahsamek sa ni sia kumawéngla karia ni tuama walina.

⁴Téntu kangkasii ni kamu katuari-katuari. Ni kamu én tanu nimatémo im witu un ukum Torat, pahpaan ni kamu ém pina'esamo karia un awak ni Kristus, wo ni kamu maéndomo anu ni Kristus, si méitou sumaup im wia sé nimaté wo ung katou-touanta wéwéhan torona im wia si Opo Empung.

⁵Pahpaan im puuna ni kita i menou-nou é mahkiitpé' um paaz in tou uman, u lelo i mahwangun a léwo'an ung kimawasa witu un awakta. Kata'uanta niitu é singkéla' pahpaan sinéro' un ukum Torat. Pahpaan i mahwangun niitu ni kita makailek um patéan.

⁶Taan in tarékan ni kita é mémoikapiloté im witu un ukum Torat pahpaan ni kita én tanu nimatémo im witu un ukum Torat, a mahata-ata ni kita im puuna. Wo in tarékan witu ung katou-touan weru ni kita é nimaéndo ata ni Roh Lenas.

⁷ Sa téntu, apapé' un ikuakuma? Singkéla' wé un ukum Torat? Zéi'kan! Taan pahpaan un ukum Torat itii ni aku toro mata'u u singkéla'. Pahpaan ni aku kangkasii zéi'kan mata'u apa u lelo i mangun a léwo'an sa zéi'kan méipantik witu ung kitap Torat, “Tia' lumelo an anu né tou walina!”

⁸Taan pahpaan un ukum Torat itii, u singkéla' ém wéwéhan oras i nimangun ni aku i lumelo an zéi'sesa léwo'an. Pahpaan sa zéi'kan siapa un ukum Torat, u singkéla' én zéi'kan siapa kawasa.

⁹Ung katou-touangku im puuna pahgenangengkula é lé'o-lé'os uman in zéi'kampé' mata'u un ukum Torat. Taan i ni aku nimata'umoma un ukum Torat, rengané in toro niitu um paaz i mahwangun a singkéla' é mahkawasamo witu ung katou-touangku,

¹⁰wo ni aku é nimatémo. Pahpaan un ukum Torat u léwo'zéi' mangun ni aku menou-nou makaz ing kauré-uré é nimahwali uman taréma ni aku witu um patéan.

¹¹ Pahpaan karia un ukum Torat, a leloku i sumingkéla' ém wéwéhan orasna in tumowo wo munu' ni aku.

¹²Un ukum Torat wo péléng am perénta witu ém wia si Opo Empung a méyé, ulit wo wangun.

¹³Sa téntu, apa am wangun itii é mahalimé um patéan wia ni aku? Zéi'kan téntu! U singkéla' u nimahalimé um patéan itii. Um wangun itii pinakémé u singkéla' i mahalimé um patéan wia ni aku, wo totoz ing kaile-ilekan u singkéla' é léwo'an. Niitumo, pahpaan am perénta witu ung kitap Torat itii ikatuzu'mé u singkéla' itii én totoz léwo'.

¹⁴Kata'uanta un ukum Torat itii ém wia si Roh ni Opo Empung a méyé. Taan ni aku én tou uman si mahkiit uman ung kapaaz ung kaayahan. Ni aku én tanu méiwangkéro i maéndo ata u singkéla'.

¹⁵ Pahpaan am pahwangunengku én zéi'kan kata'uangku. Zéi'kan ang kapaazku am pahwangunengku taan an ikazi'zisku am pahwangunengku.

¹⁶Sa ni aku mahwangun an zéi'kan kapaazku, énéangku sa am witu ung kitap Torat itii ém wangun.

¹⁷Sa téntu, zéi'mo ni aku si mahwangun niitu taan a singkéla' ang kimawasamo witu un touku u nimangun ni aku i mahwangun niitu.

¹⁸Kata'uangku witu un touku, in tou uman, zéi'kan siapa um wangun. Pahpaan u lelo i mangun am wangun ém wia ni aku taan ni aku én zéi'kan makawawa i mangun niitu.

¹⁹Pahpaan am pahwangunengku zéi'kan am wangun ang kapaazku, taan a léwo'an ang kasooku, niitu am pahwangunengku.

²⁰Niitumo, sa ni aku mahwangun an zéi'kan kapaazku, zéi'kan ni aku si mahwangun niana, taan a lelo i mahwangun a singkéla' ung kimawasamo ni aku.

²¹Niitumo, ung kenumo ung kinanaram nimamuali wia ni aku: maanpé' ni aku paaz mangun a lé'os, taan a léwo'an uman taré am pahwangunengku.

²²Pahpaan um witu un atéku ém paaz an tinotoz ni Opo Empung.

²³Taan am witu un touku ém wéwéhan an tinotoz walina u makahkoro' wo an tinotoz ni Opo Empung ung kapaazku witu ung genangku. Niitu u nimangun ni aku im pahata-atan an tinotoz a singkéla' ang kimawasa un awakku.

²⁴Ni aku én tou totozo méikaléwo'! Séi si toro miloté ni aku im witu un awak kenu u makawali ni aku witu um patéan?

²⁵Taan makasé wia si Opo Empung pahpaan si Yesus Kristus Mahpiarata!

²⁶Ni aku é nimaéndo ata an tinotoz ni Opo Empung karia ung genangku, taan pahpaan in tou uman ni aku éng kinawasapé' i mahwangun a singkéla'.