Read Tombulu Roma 9 Bible Online

Roma 9 - Tombulu bible

Roma 9

¹Un ikuakuma én ulit pahpaan ni aku én anumo ni Kristus, ni aku én zéi'kan mahtowo. Karia ung genang lé'osku um pahahkiten ni Roh Lenas, ni aku éng kumuama u nuwu'ku itii én ulit.

²Un atéku én totoz rumara wo totoz pendis pahpaan sé katuariku tou Israel é soo ma'éman wia si Yesus.

³Ni séra éng katuariku kawanua. Ni aku ém paaz toron un epa' wo pata'san karia ni Kristus in tumulung ni séra.

⁴ Pahpaan ni séra én tou Israel sé pinéléng ni Opo Empung i maéndo oki'-Na, wo ni séra é nimileko ung kawangko'an kawasa-Na. Si Opo Empung é nimangun um pinataazan karia né nimaopo néra wo niméhé un ukum Torat wo ni séra mata'umo kura i mahragés wia si Opo Empung wo ni séra é nimakaileko an taaz ni Opo Empung.

⁵Ni séra é suzu né nimaopota. Si Mesias in tou é nimatoumé wia sé nimaopota wo ni Sia é mahkawasa wana péléng am péléng. Ni Siamo si Opo Empung si léwo'zéi' im pahloozen makaz ing kauré-uré. Amin!

⁶Zozo' sé tou Israel é soo ma'éman si Yesus, ni aku én zéi'kan mahkukuama a méitaaz ni Opo Empung wia sé nimaopo néra én zéi'mo pahpakén; taan zéi'kan péléng sé suzu né tou Israel én tou pinéléng ni Opo Empung.

⁷ Zéi'kan péléng sé suzu ni Abraham é makailek u méitaaz ni Opo Empung wia si Abraham. Pahpaan ni Sia éng kimua wia si Abraham, “Si suzu ni Ishak uman si makuan suzumu.”

⁸Ung kalakoana, zéi'kan péléng sé suzu ni Abraham sé pahkuan oki' ni Opo Empung, taan sé ma'éman uman un taaz méiwéhé ni Opo Empung wia ni séra sé uli-ulit pahkuan oki'-Na.

⁹ Pahpaan si Opo Empung é niméhé un taaz-Na wia si Abraham in téntii, “In ta'un tumondong tanu u loloho'en in tarékan, ni Aku é mawurimé wo si Sara é makailek si lowai.”

¹⁰Wo zéi'kan uman niitu. Si Ribka é nimakaoki'mé sé tuama zua kambar wia si esa ama', si Ishak, si nimaopota.

¹¹Pahpaan i sé koki' itii zéi'kampé' méitoumé wo zéi'kampé' nimangun a lé'os kaapa a léwo'an, si Opo Empung én timotozo sé koki' itii i maéndo apa, wo un tinotoz-Na tumoro um pinéléng-Na én enté'en, zéi'kan mengiit am pahwangunen né koki' zua itii taan mengiit un tatawah ni Opo Empung.

¹² Si Opo Empung éng kimua wia si Ribka, “Si oki'mu tu'a é maéndo ata ni oki'mu taweng,”

¹³ tanu u méipantik witu um pinantik lenas: “Si Yakub[3] én ikararaaté-Ku, taan si Esau én ikazi'zis-Ku.”

¹⁴Sa téntu, apa ni kita éng kumua si Opo Empung é mahsanaweka? Zéi'kan!

¹⁵ Pahpaan si Opo Empung éng kimuamo wia si Musa, “Ni aku é méhé u raraatéang-Ku wia si tou kapaaz-Ku im wéhan u raraatéang-Ku. Wo ni Aku é meripu' umané i mahwéhé wia si tou si kapaaz-Ku im papailekang-Ku i ni Aku é meripu' umané i mahwéhé.”

¹⁶Niitumo, si Opo Empung i niméléng én zéi'kan pahpaan ung kapaaz kaapa am pahwangunen ni tou, taan pahpaan u raraatéan ni Opo Empung.

¹⁷ Pahpaan witu um Pinantik Lenas, si Opo Empung éng kimua wia si Firaun[4], “Ni Aku é niméléng ni ko maéndo kolano i mapailek ung kawasa-Ku mengiité ni ko wo u ngaran-Ku é loozen né wia ung kaayahan.”

¹⁸Niitumo, si Opo Empung é mapailek u raraatéan-Na wia si tou sa niitu ung kapaaz-Na, wo ni Sia é mangun si tou makawal sa niitu ung kapaaz-Na.

¹⁹In tarékan, tantumo ém wéwéhan im wia ni kamu sé meligau wia ni aku, “Sa téntu, kaa si Opo Empung mapasala'pé' sé tou? Séi sé toro sumaru ung kapaaz ni Opo Empung?”

²⁰ Apamo ko wé wo wuaya i mahéndo-éndoan karia ni Opo Empung? Toro wé ung kuré' tana' kumua wia si nimangun, “Kaa ni aku winangunmumé téntu?”

²¹Si memamangun ung kuré' tana' é mangun ung kuré' tana' itii kiit um paazna. U sana réwok tana' pulut masuat én toro wangunen kuré' peperong wo kuré' pahpakén i mendo-endo.

²²Téntu kangkasii um winangun ni Opo Empung. Ni sia éng gimenang i mapailek un upi'-Na wo mapailek ung kawasa-Na. Taan ni Sia én ezen im wia sé tou tinotoz-Namo i léwo'en pahpaan nimanguno ni Sia in totoz maupi'.

²³Si Opo Empung kangkasii éng gimenang i mapailek ung kawangko'an-Na u malake-lakez, un iwéhé-Na wia ni kita sé kararaaté-Na. Ni kitamo sé méisanapa'-Na i makailek ung kawangko'an-Na.

²⁴Ni kitamo sé tinawah-Na, zéi'kan uman kita in tou Yahudi taan kangkasii sé zéi'kan tou Yahudi,

²⁵ tanu u Nuwu'-Na witu um Pinantik Lenas ni nabi Hosea, “Sé zéi'kan tou-Ku éng kuang-Ku in ‘tou-Ku’ wo sé zéi'kan kararaaté-Ku, éng kuang-Ku ing ‘kararaaté-Ku’.

²⁶ Wo sé wana an tampa kinuaano, ‘Ni kamu én zéi'kan tou-Ku’, im wana ni séra é makuaan, ‘Sé oki' ni Opo Empung si menou-nou.’ ”

²⁷ Si nabi Yesaya éng kimuama karia i rimez tumoro sé tou Israel, “Zozo' ung kalakez né tou Israel én tanumokan an eris witi tasik, taan toyo' uman sé ipilot im witu un ukuman wana a singkéla'.

²⁸Pahpaan lekepo wo zéi'mo mauréma si Mahpiara én tumotozo i mukum sé tou wia ung kaayahan.”

²⁹ Si nabi Yesaya kangkasii éng kimua in téntii, “Si Opo Empung, si Tonaas né witi langit én timula'uma sé suzu wia ni kita. Sa zéi'kan téntu, ni kita péléng ém pinakaléwo'-Namo tanu sé tou witi Sodom, wo ni kita é mamuali tanu sé tou witi Gomora.”

³⁰Sa téntu, ung kalakoan niana péléng én téntii: Sé zéi'kan tou Yahudi zéi'kan mahtututu' i mahtata'u ung kapaaz ni Opo Empung, taan pahpaan ni séra ma'éman ni Sia, ni séra niéndo-Namo ulit.

³¹Taan sé tou Yahudi, zozo' ni séra mahtututu' i mahtali-talinga un ukum Torat wo ni séra éndon ulit witu u sinaru ni Opo Empung, taan ni séra én zéi'kan makawawa.

³²Kaa ni séra zéi'kan makawawa? Pahpaan i ni séra mahtututu' in éndon ulit witu u sinaru ni Opo Empung, zéi'kan pahpaan um pa'émanen néra, taan mengiit uman um pahwangunen néra in esa. Niitu én tanumokan ni séra é méikasangkil wana am watu pahkasangkilan,

³³ tanu u méipantik witu um Pinantik Lenas: “Talingana ang kenu. Im witi kentur Sion, ni Aku én zimeta'momé um watu pahkasangkilan né tou, um watu tua'na[5] um pahkazemakan néra, taan sé ma'éman wia ni Sia én zéi'kan papaiza-izang.”