Read Tombulu 1 Korintus 10 Bible Online

1 Korintus 10 - Tombulu bible

1 Korintus 10

¹ Katuari-katuari, ipapagenangkuma sumaup a nimamuali im puuna wia sé nimaopota, i ni séra méiondolé im witi Mesir. In toro niitu ni séra péléng éng kinelungan ni Opo Empung karia a ninahak wo ni séra péléng méikalewet un tasik Rangdang.

²Ni séra é sinarani witu u ninahak wo witu un tasik a maéndo mahkii-kiit si Musa.

³ In toro niitu, ni séra péléng mahkan an ipahwéhémé ni Opo Empung. Niitumo, am pahkanen néra é masuat.

⁴ Wo kasii ni séra péléng mahelep an ipahwéhémé ni Opo Empung. Niitumo, um pahelepen néra é masuat. Un zano pahelepen néra én ipahondolé ni Opo Empung wana ung kentur watu u mahwali-wali karia néra. Ung kentur watu itii é si Kristus.

⁵ Zozo' in téntu, sé lakez im wia ni séra én zéi'kan kapaaz ni Opo Empung. Niitumo, ni séra é méiwaya i nimaté witi kapelasan.

⁶ A nimamuali itii én tanu ang kékéréan i mapagenang wia ni kita, wo kita zéi'kan mapaaz a léwo'an tanu am pinahwanguné né nimaopota,

⁷ wo kita zéi'kan mahongkot wia sé opo-opo, tanu am pahwangunen né woopira sé wia ni séra. Witu um Pinantik Lenas é méipantik in téntii, “Sé tou itii, rimumez mahkan wo mahelep mahwali-wali, a séra rumendaié wo mahpaa-paaz.”

⁸ Ni kita kasii én tia' mahsamek tanu am pahwangunen né woopira im wia ni séra. Pahpaano niitu witu u sana endo sé nimaté én zuana pulu' wo teluna riwu tou.

⁹ Tia' kasii kita mahwa'wa' si Kristus, tanu am pinahwanguné né woopira sé wia ni séra im puuna. Taka-takazan, ni séra nimaté pahpaan ing kiniki né ulé'.

¹⁰ Tia' menembu-nembut tanu am pinahwanguné né woopira im wia ni séra, makaz ni séra winunu' ni malaekat um patéan.

¹¹Péléng a nimamuali wia sé nimaopota itii, nimaéndo tanu ang kékéréan wia ni kita. Péléng niana é méipantik i mapagenang wia ni kita in tarékan, sé menou-nou wana an endo kaakazan ung kaayahan.

¹²Niitumo, séi si mahgenangla um pa'émanenna én enté'mo, ni sia é mile-ilek én taa ikakiit uman i mahwangun a singkéla'.

¹³Ni kamu ém pahwa'wa'en karia am pema'wa'en ang kinanaram im pahpendanen né tou, un toro pengalin niou. Pahpaan si Opo Empung zéi'kan maliuz wana a méitaaz-Na, niitumo zéi'kan iwaya-Na ni kamu im pema'wa'en karia am pema'wa'en an zéi'kan kawawaan niou. Sekez kamu i mahsaru am pema'wa'en, si Opo Empung é méhé lalan wia ni kamu makaz ni kamu makawawa i mahsaru am pema'wa'en itii.

¹⁴Pahpaano niitu, katuari-katuari ikararaatéku, tia' kamu mahongkot wia sé opo-opo!

¹⁵Ni aku é mahnuwu' wia ni kamu tanu i mahnuwu' wia sé tou tulap. Niitumo, pahwéhanla genang a méikuakuma!

¹⁶ Im witu um perjamuan, ni kita é melep un anggor witu um pengengelepan wo kita kumua u makasé wia si Opo Empung, ung kalakoan niitu, ni kita é nimaesa karia ni Kristus witu un zaha'-Na. Wo i ni kita meni'a-ni'aula u roti ing kuman mahwali-wali, ung kalakoan niitu ni kita é nimaesamo witu un awak ni Kristus.

¹⁷Zozo' ni kita lakez wo u roti én esa uman, ni kita sé kiman u roti itii é nimaéndomola esa awak.[9]

¹⁸ Téntu kangkasii sé tou Israel im puuna. Ni séra i niméhé a raragés, ni séra é nimakailek um wéténgna im wana a méiragés wia si Opo Empung witu un tampa pahragésan. Pahpaan ni séra ing kiman wana a méiragés itii ni séra é nimaesa karia ni Opo Empung.

¹⁹Ni aku ing kimuama téntu zéi'kan i mahkukuama sé opo-opo wo a méiragés wia sé opo-opo ém wéwéhan torona. Zéi'kan!

²⁰ Ni aku éng kimua in téntu, pahpaan a méiragés néra itii, zéi'kan méiragés wia si Opo Empung, taan méiragés wia sé roh léwo'. Kasooku sa kamu maesa karia né roh léwo'.

²¹Ni kamu én zéi'kan toro melep witu un eelepan ni Mahpiara wo kasii witu un eelepan né roh léwo'. Ni kamu kasii zéi'kan toro kuman witu um perjamuan ni Mahpiara wo kasii witu um perjamuan né roh léwo'.

²² Kaa kamu mangun si Mahpiara tuméutéu ni kamu? Kaa kamu woo mahgenangla i ni kamupé' sé enté' taan si Mahpiara?

²³ Katuari-katuari, wéwéhan im wia ni kamu sé mahkua, “Péléng am péléng én toro wangunenta.” Niitu én ulit, taan zéi'kan péléng am péléng ém wéwéhan torona. Niitumo zozo' “Péléng am péléng én toro wangunenta”, taan zéi'kan péléng am péléng é mahenté' ung katou-touan né tou.

²⁴Ni kamu én tia' mahtututu' i menéro ang kawangunan niou, taan mahtututu'la i menéro ang kawangunan né tou walina.

²⁵Péléng a lé'ona ipahwangkér witi pahwangkéran a lé'ona én toro kanen niou. Tia'mo pahtata'un niou niitu mémoiragés wia sé opo-opo kaapa zéi'kan, wo niitu zéi'kan maéndo singkéla' witu ung genang lé'os niou.

²⁶ Pahpaan ung kaayahan wo péléng am witu én anu ni Mahpiara.

²⁷Sa wéwéhan si tou zéi'kampé' ma'éman tumawah ni kamu ing kuman wo sa ni sia é niénéan niouola, kanenola ang kakanen iwéhénamé wia ni kamu. Tia'mo pahtata'un niou wisa ang kakanen itii a méyé, wo niitu zéi'kan maéndo singkéla' witu ung genang lé'os niou.

²⁸Taan sa wéwéhan si tou kumuala wia ni kamu, “Ang kakanen itii é mémoiragés wia sé opo-opo.” Niitu én tia'mo kanen niou. Pahpaan mahgenang si tou kimua niitu wo ung genang lé'osna.

²⁹Um paza'ingkula itii, zéi'kan ung genang lé'os niou um wutez taan ung genang lé'os ni tou itii. Wéwéhan woo si mahkua, “Ni aku én zéi'kan ata, kaa rékén um pahwangunengku én totoz ipahkiit ung genang lé'os né tou walina?

³⁰Sa ni aku kimuamola u makasé wia si Mahpiara an aku kuman ung kakanen itii, kaa wéwéhan tou mahtawuruk ni aku pahpaan ing kiman wo kimua makasé wia si Mahpiara?”

³¹Niitumo, sa kamu kuman kaapa melep kaapa mangunla am walina, wangunen nioula niana péléng i sumigi' wo lumooz si Opo Empung.

³²Tia' ung katou-touan niou é nimaéndo watu pahkasangkilan né tou Yahudi kaapa né tou Yunani kaapa né jamaat ni Opo Empung.

³³Tanu ni aku mahtututu' i mahwangun péléng sé tou i mahpaa-paaz im wana péléng am péléng. Niana ém pahwangunengku zéi'kan pahpaan ung kawangunangku, taan ung kawangunan né tou lakez, wo séra toro ipiloté im witu un ukuman wana a singkéla'.