Read Tombulu 1 Korintus 12 Bible Online

1 Korintus 12 - Tombulu bible

1 Korintus 12

¹Katuari-katuari, in tarékan tumoro an tatambér ni Roh Lenas wia ni kamu. Kapaazku ni kamu mata'ula un ulit tumoro niitu.

²I ni kamu zéi'kampé' mata'u si Opo Empung, wéwéhan sé tinowoan an ikakiitla i mahsigi' sé opo-opo wowo'.

³Niitumo, ni kamu léwo'zéi' mata'ula i si tou kinawasa ni Roh ni Opo Empung én zéi'kan mamuali ing kumua in téntii, “Si Yesus én toron un epa'.” Wo si tou zéi'kan kinawasa ni Roh ni Opo Empung, si tou itii zéi'kan mamuali ing kumua, “Si Yesus itiimo si Mahpiara.”

⁴ An tatambér ni Roh Lenas wia sé tou é nimahwali-walinaan, taan si Roh Lenas én esa uman si timambéré péléng an tatambér itii.

⁵I mahpaayang wia si Mahpiara é lakez an toro wangunen, taan si pahpaayangan én esa uman, ni Siamo si Mahpiara.

⁶Wo kasii lakez am paayangen, taan si niméhé ung ketez wia si esa wo si esa i makawawa maayang niana én esa uman. Ni Siamo si Opo Empung.

⁷Ung kawangunanta péléng, wia si esa wo si esa ém winéhan un tatambér ni Roh Lenas.

⁸Pahpaan wia si tou, si Roh Lenas én timambér un tulap i mahkua u nuwu' ni Opo Empung. Wo wia si tou walina, si Roh Lenas itii kangkasii si timambér ang kata'uan wo makawawa ing kumua ang kata'uan itii wia sé tou.

⁹Si Roh Lenas timambér wia si tou um pa'émanen totoz enté'. Si Roh Lenas itii kangkasii si timambér wia si tou walina u makawawa i lumé'os sé tou saki.

¹⁰Wo wia si tou, si Roh Lenas timambér i makawawa mangun a makakompo'en. Wo wia si tou walina, si Roh Lenas én timambér u makawawa i mahkua wia sé tou a méikuamé ni Opo Empung wia ni sia. Wia si tou walina, si Roh Lenas itii kangkasii én timambér u makawawa i mata'u un tatambér ém wia si Roh Lenas a méyé kaapa zéi'kan. Wo wia si tou, si Roh Lenas én timambér i makawawa mahnuwu' karia u nunuwu'en un akaz uman si Roh Lenas si mata'u, wo wia si tou walina én tinambéran u makawawa ing kumua ung kalakoan u nunuwu'en itii.

¹¹Péléng an tatambér itii é méiwéhé ni Roh Lenas. Si Roh Lenas itii én esa uman zéi'kan siapa walina. A méitambér wia si esa wo si esa é nimahwali-walinaan mengiit ung kapaaz ni Roh Lenas.

¹² Witu un awak ni tou ém wéwéhan un a'é, u lengen wo am walina, taan un awak itii én esa uman. Zozo' um witu un awak é lakez, taan un awak én esa uman. Téntu kangkasii ni kita i ma'éman, zozo'pé' ni kita é lakez, taan ni kita én esa wia si Kristus.

¹³Ni kita in tou Yahudi kaapa zéi'kan tou Yahudi, ata kaapa zéi'mo ata é nimaéndo esa pahpaan ni kita péléng é sinarani ni Roh Lenas nimaéndo tanu esa awak. Ni kita péléng é nimakailek si Roh Lenas itii kangkasii witu un até.

¹⁴Am witu un awak ni tou én zéi'kan uman un a'é wo u lengen taan lakezpé' am walina.

¹⁵Niitumo sa un a'é kumua, “Ni aku én zéi'kan méikauntep witu un awak, pahpaan ni aku én zéi'kan lengen.” Sa un a'é mahkuamé in téntu, kura kahuman un a'é sa zéi'kan méikauntep witu un awak?

¹⁶Sa u lunteng kasii kumua, “Ni aku én zéi'kan weren, niitumo ni aku én zéi'kan méikauntep witu un awak.” Sa u lunteng mahkuamé in téntu, kura kahuman sa u lunteng zéi'kan méikauntep witu un awak?

¹⁷Sa un awak péléng uman weren, wisa u lunteng i mahtalinga? Sa un awak ém péléng uman lunteng, wisa u ngirung ipahwou?

¹⁸Taan si Opo Empung é niméhémo un tampa wia si esa wo si esa witu un awak mengiit um paaz-Na.

¹⁹Sa péléng am witu un awak é masuat uman, ung kalakoana niitu én zéi'kan awak.

²⁰Un ulitna, am witu un awak é lakez, tanu u lunteng, um weren, u lengen wo am walina, taan un awak én esa uman.

²¹Niitumo, um weren én zéi'kan toro kumua witu u lengen, “Ni aku én zéi'kan memandung ni ko.” Téntu kangkasii un ulu zéi'kan toro ing kumua witu un a'é, “Ni aku én zéi'kan memandung ni ko.”

²²Un ulitna, am witu un awak, um pahkuanta in zéi'kan enté', niitu un totoz pemandungen né tou.

²³Um witu un awak ém wéwéhan un zéi'kan tahlous ipahpuu-puuna, taan niitu taré un ipahpuu-puuna. Wo am witu un awak ém wéwéhan an zéi'kan wangun ipapailek, taan niitu taré un totoz winéhanta genang.

²⁴Niitumo, am witu un awak ém wéwéhan um pahilekenta ém wangun, niitu én zéi'kan pandung im wéhanta genang. Téntu un awakta i niimek ni Opo Empung, niitumo am witu un awak ém wéwéhan un zéi'kan tahlous pahréké-rékén, taan niitu taré un totoz wéhanta genang.

²⁵Karia in téntu un awakta én zéi'kan mahwéwéténg wo péléng a mawalinaan witu un awakta é mahgena-genangan.

²⁶Niitumo, sa un esa witu un awakta é mahpendan zéha, péléng am witu un awakta én zézéha. Sa un esa witu un awakta pahloozen, péléng am witu un awakta é mahpaa-paaz.

²⁷Ni kamu péléng i ma'éman é masuat karia un awak ni Kristus. Pahpaan ni kamu, si esa wo si esa én tanu u lengen, u lunteng, un a'é kaapa um weren im witu un awak ni Kristus.

²⁸ Wo wia ni kamu sé jamaat, sé woopira im wia ni kamu ém pinéléng ni Opo Empung i maéndo: kataré, sé tou niéndo aatu ni Yesus, kazua, sé tou niéndo nabi, katelu, sé tou niéndo méster mahtuzu' an tutuzu' ni Mahpiara, wéwéhan sé tou tinambéran u makawawa i mangun u makakompo'en, wéwéhan sé tou tinambéran u makawawa i lumé'os sé tou saki, wéwéhan sé tou tinambéran u makawawa i mahsawang sé tou walina, wéwéhan sé tou tinambéran u makawawa i maéndo tonaas, wo kasii wéwéhan sé tou tinambéran u makawawa i mahnuwu' karia a nunuwu'en walina un akaz uman si Roh Lenas si mata'u.

²⁹Péléng sé tou im wia sé jamaat én tinambéran taan un tatambér kinailekan néra é mawalinaan, zéi'kan péléng sé tou é niéndo aatu ni Yesus, nabi, méster, makawawa i mahwangun u makakompo'en,

³⁰makawawa i lumé'os sé tou saki, makawawa i mahnuwu' a nunuwu'en si Roh Lenas uman si mata'u, makawawa ing kumua ung kalakoan u nunuwu'en si Roh Lenas uman si mata'u.

³¹Zozo' in téntu, ni kamu mahtututu'la in toro makailek an tatambér totoz wangun. Taan ni aku én tumuzu' wia ni kamu u lalan totoz wangun.