Read Tombulu 1 Korintus 13 Bible Online

1 Korintus 13 - Tombulu bible

1 Korintus 13

¹Zozo' ni aku toro mahnuwu' karia a nunuwu'en né tou wo a nunuwu'en né malaekat, taan sa ni aku zéi'kan rumaraaté sé tou walina, ni aku én tanu uman an zanina an tambor wo an téténgkoren um wayaan uman téngkoren, zéi'kan siapa torona.

² Wo kasii zozo' ni aku tinambéran u makawawa i mahkua wia sé tou a méikuamé ni Opo Empung wia ni aku, wo zozo' ni aku makawawa i makatulap péléng ang ginenang-Na un zéi'kampé' kata'uan né tou walina. Zozo' ni aku i mata'u péléng am péléng wo zozo' um pa'émanengku én enté' makaz ung kentur én toro iatuku mérama im witu, taan sa ni aku zéi'kan rumaraaté sé tou walina, ni aku én zéi'kan siapa torona.

³Zozo' péléng an anuku ipeméténgkula wia sé tou zéi'kan siapa apa, wo zozo' un awakku iwéhéla i la'ungen, taan sa ni aku zéi'kan rumaraaté sé tou walina, péléng niana én zéi'kan siapa torona.

⁴Si tou rumaraaté sé tou walina én téntii: ni sia én ezen, ni sia é lé'os uman, ni sia én zéi'kan téutéu, ni sia én zéi'kan mahlooz un touna wo zéi'kan loozan.

⁵Ni sia én zéi'kan mahwangun an zéi'kan mata'u un adat wo zéi'kan mahgenang uman un touna in esa. Ni sia én zéi'kan uupi'en wo zéi'kan megena-genang ang kasumalaan né tou walina.

⁶Kasoona i milekla si tou mahsanaweka taan mahpaa-paaz i mahilek si tou mahwangun an ulit.

⁷Ni sia én ezen i mahsaru péléng am péléng, ma'éman péléng am péléng, mahéré' wana péléng am péléng, ezen mengali péléng am péléng.

⁸U rumaraaté itii én zéi'kan mazéi'. Taan un tatambér u makawawa i mahkua wia sé tou a méikuamé ni Opo Empung é mazéi'. Téntu kangkasii un tatambér u makawawa i mahnuwu' karia a nunuwu'en un akaz uman si Roh Lenas si mata'u ung kalakoan niitu é mazéi'. Wo un tatambér i lakez ang kata'uan é mazéi'.

⁹Pahpaan ang kata'uanta wo u makawawa i mahkua wia sé tou a méikuamé ni Opo Empung én zéi'kampé' malekep.

¹⁰Tumondong é méyé un orasna i si Opo Empung mangun ang kata'uan i malekep, wo ang kata'uan zéi'kampé' lekep é mazéi'.

¹¹Ni aku ing koki'pé', um pakahnuwu'ku én tanu sé koki', um pakahpendanku tanu sé koki' wo um pakahgena-genangku én tanu sé koki'. In tarékan, ni aku én tu'amo, méitula'ukumola an tanu sé koki'.

¹²In tarékan, zéi'kampé' tahlous katulapanta un tumoro si Opo Empung, niitu é masuat wo ni kita mahilek un touta witu u lélénoan kewur. Taan sa kita nimasaruano karia-Na taré totoz katulapanta un tumoro ni Sia. In tarékan péléng an tumoro ni Sia én zéi'kampé' tahlous kata'uangku, taan niitu én totoz makata'uangku, tanu ni Sia in totoz mata'u ni aku.

¹³In tarékan, un telu kenu u léwo'zéi' sekezé ém pahwangunenta: ma'éman wia ni Sia, mahéré' uman wia ni Sia wo u raraatéan. Witu un telu itii, un totoz wangko' é raraatéan.