Read Tombulu 1 Korintus 15 Bible Online

1 Korintus 15 - Tombulu bible

1 Korintus 15

¹In tarékan katuari-katuari, ipapagenangkuma sumaup u Nuwu' Lé'os tumoro si Yesus u mémoipahwoka'ku wia ni kamu. U Nuwu' Lé'os itii éng kinailekan niouo wo uli-ulit pa'émanen niou makaz in tarékan.

²Sa u Nuwu' Lé'os méipahwoka'ku itii én uli-ulit pa'émanen niou, ni kamu é méipiloté im witu un ukuman wana a singkéla'. Taan sa u Nuwu' Lé'os itii zéi'kan uli-ulit pa'émanen niou, um pa'émanen niou én zéi'kan siapa torona.

³ Pahpaan un totoz ipahpuu-puuna ung kinailekangku é mémoipapaayokuma wia ni kamu, i si Kristus é nimatémo pahpaan a singkéla' pahwangunenta. Niitu é mémoipantik witu um Pinantik Lenas,

⁴ i ni Sia mémoileweng, wo witu un endo katelu ni Sia é méitoumé sumaup ni Opo Empung mengiit méipantik witu um Pinantik Lenas;

⁵ i ni Sia nimapaileko un tou-Na wia si Petrus, tumondong niitu wia sé mapulu' wo zua pahtuzu'en-Na.

⁶Tumondong niitu, a Sia mapailek un tou-Na wia sé lumakezé né limana atus katuari ma'éman. Lakez im wia ni séra é menou-noupé' makaz in tarékan taan sé woopira im wia ni séra é nimatémoma.

⁷Tumondong niitu, a Sia mapailek un tou-Na wia si Yakobus wo wia péléng sé aatu-Na.

⁸ Wo si totoz kamurian im pinapailekan-Na un tou-Na é ni aku. Ni aku é mengompo' umané i niéndo aatu-Na. Ni aku én tanumokan si taré itoumé zéi'kampé' orasna.

⁹ Ni aku én zéi'kan wangun ing kuan aatu ni Yesus, pahpaan ni aku i makasa é mahzézéha sé jamaat ni Opo Empung. Niitumo, im wia sé aatu ni Yesus, ni akumo si totoz roros.

¹⁰Taan si Opo Empung timambéré ung kamang wia ni aku makaz ni aku in tarékan é niéndo aatu ni Yesus, makaz ung kamang méitambér-Na wia ni aku ém wéwéhan torona. Lumouspé'mé niitu, im wia sé aatu-Na, ni aku si totoz nima'ulit i mahpaayang taan sé aatu walina. Taan am pinaayangku itii, zéi'kan pahpaan ung ketezku in esa, taan pahpaan ung kamang méitambér ni Opo Empung wia ni aku makaz ni aku makawawa i maayang am paayangen itii.

¹¹Niitumo, a méipahtuzu'ku kaapa a méipahtuzu'ma né aatu ni Yesus walina é masuat uman. U Nuwu' Lé'os tumoro si Yesus itiimo u méipahkua naimola wia ni kamu wo karia niitu ni kamu é nima'éman.

¹²Méipahwoka' nai wia sé tou i si Kristus é nimatémo an itoumé sumaup ni Opo Empung im wia sé nimaté. Kura kahuman im wia ni kamu ém wéwéhan sé mahkua sa sé nimatémo én zéi'kan itou sumaup?

¹³Sa ulit zéi'kan siapa tou nimatémo sé méitoumé sumaup, si Kristus kangkasii én zéi'kan méitoumé sumaup ni Opo Empung.

¹⁴Sa si Kristus zéi'kan méitoumé sumaup ni Opo Empung, u Nuwu' Lé'os tumoro ni Sia an ipahwoka' nai wia sé tou én zéi'kan siapa torona, téntu kangkasii um pa'émanen niou én zéi'kan siapa torona.

¹⁵Lumouspé'mé niitu, sa ulit sé tou nimatémo zéi'kan méitoumé sumaup ni Opo Empung, ni kai én timowomola tumoro si Opo Empung pahpaan ni kai é mahkua si Kristus é méitoumé sumaup ni Opo Empung. Sa si Opo Empung zéi'kan timou sumaup si Kristus, tantumo sé tou nimatémo én zéi'kan méitou-Namé sumaup.

¹⁶Sa ulit sé tou nimatémo én zéi'kan itou sumaup ni Opo Empung, si Kristus kangkasii én zéi'kan méitou-Namé sumaup.

¹⁷Sa si Kristus zéi'kan méitoumé sumaup ni Opo Empung, zéi'kan siapa torona um pa'émanen niou wia si Kristus wo a singkéla' niou én zéi'kan zéi'en im wia ni kamu.

¹⁸Sa si Kristus zéi'kan méitoumé sumaup ni Opo Empung, ung kalakoana sé tou ma'éman wia si Kristus i matéma én ukumen pahpaan a singkéla' néra.

¹⁹Sa um pahéré'anta wia si Kristus én akaz uman witu ung katou-touanta wia ung kaayahan kenu, ni kitamo sé totoz makararaatén im wia péléng sé tou.

²⁰Un ulitna, si Kristus é méitoumé sumaup ni Opo Empung im wia sé nimaté. Ni Sia si kataré méitoumé sumaup im wia sé nimaté, niitumo ni Sia én tanu um wua'na kataré im wana an tinanem.

²¹Pahpaan a singkéla' winangun ni esa, makaz péléng sé tou é maté. Téntu kangkasii pahpaan si esa i méitoumé sumaup, makaz sé tou nimaté én itou sumaup.

²²Pahpaan nimaesa karia ni Adam, péléng sé tou é mamaté, téntu kangkasii, pahpaan nimaesa karia ni Kristus, péléng sé tou én itou sumaup ni Opo Empung.

²³Péléng sé tou nimaté én itou sumaup ni Opo Empung mengiit un orasna. Si kataré-taré é si Kristus, pahpaan ni Sia én tanu um wua'na kataré im wana an tinanem. Tumondong niitu é sé tou ni Kristus, i ni Sia méyé sumaup wia ung kaayahan.

²⁴In toro niitu ung kaayahan é mazéi'. Péléng sé mahperénta, péléng sé mahkawasa wo péléng ang ketez wia ung kaayahan kenu é léwo'en ni Yesus. Kumawusa niitu, ung kawasa-Na ing Kolano én iayo-Na wia si Opo Empung, si Ama'-Na.

²⁵Pahpaan puunala ung kaayahan i mazéi', si Kristus é léwo'zéi' merénta ing Kolano makaz si Opo Empung kumala péléng sé kakoro'-Na. Sé kakoro'-Na itii én iwéhé-Na witu u léléék ni Kristus.

²⁶Si kakoro' ing kamurian si zinéi' ni Opo Empung é si patéan.

²⁷ Pahpaan witu um Pinantik Lenas é méipantik in téntii, “Pinakakalamo ni Opo Empung wo niana péléng ém witumo ung kawasa ni Kristus.” Niitu un tumuzu'mé wia ni kita sa péléng sé kinalamo éng kinawasamo ni Kristus. Taan si zéi'kan kinawasa-Na é si Opo Empung, pahpaan si Opo Empung si nimangun niana péléng makaz ing kinawasa ni Kristus.

²⁸Taan sa péléng witumo ung kawasa ni Kristus, ni Sia in Oki' ni Opo Empung ém witu ung kawasa ni Opo Empung, si kimala niana péléng. Karia in téntu uli-ulit si Opo Empung si mahperénta niana péléng.

²⁹Im wia ni kamu ém wéwéhan sé mahkua, si tou nimatémo én zéi'kan itou sumaup. Sa ulit téntu, apa un torona sé tou sinarani i sumawel sé tou nimatémo? Sa sé tou nimatémo zéi'kan méitoumé sumaup ni Opo Empung, zéi'kan siapa torona sé tou sinarani i sumawel sé tou nimatémo.

³⁰Téntu kangkasii ni kai, zéi'kan siapa torona ni kai i sekez in endo é nimasaruan karia um patéan.

³¹Katuari-katuari, ikuakuma wia ni kamu, sekez in endo ni aku é nimasaruan karia um patéan. Niia én ikuakuma in uli-ulit tanumokan ni aku in uli-ulit mahpaa-paaz pahpaan ni kamu ma'émano si Kristus Yesus, Mahpiarata.

³² Sa ikiit uman ung genang né tou, apa un torona ni aku i ma'ulit tanumokan i mahsaru sé meneza' tou wia um wanua Efesus kenu, sa sé tou nimatémo én zéi'kan itoumé sumaup? Tawimo kita mangun tanu um pahkuan né tou in téntii: “Mémo kita kuman wo mahpaa-paaz, pahpaan sando kita é matémo.”

³³Tia' kamu ikalulu: mahkari-karia wana an zéi'kan wangun é luméwo' ang kinanaram wangun.

³⁴Niitumo in tarékan, pakagena-genangela lé'os wo tia' kamu memangu-mangunpé' a singkéla'. Pahpaan im wia ni kamu ém wéwéhampé' sé zéi'kan mata'u si Opo Empung. Niitu én ikuakuma wia ni kamu wo kamu maizang.

³⁵Taan wéwéhan woo sé meligau in téntii, “Kura si tou nimatémo in itou sumaup? Kura un awakna i méitoumomé sumaup?”

³⁶Si tou meligau in téntu é si tou lemou. Am watuna tatanemen méikerozmula én zéi'kan sumuzu wo tumou sa am watuna tatanemen itii zéi'kan tinawunan, niitu é masut um watuna tatanemen itii é matépé'la wo taré tumoumé.

³⁷Un ikeroz niou én zéi'kan u rendaina mahtou, taan um watuna uman. Tanu um watuna ung gandum kaapa am watuna walina.

³⁸Am watuna itii in tumoumé u rendaina é mahwali-walinaan. Si niméhé a mahwali-walinaan itii é si Opo Empung, mengiit ung kapaaz-Na.

³⁹Un awak né menou-nou é nimahwali-walinaan. Un awak né tou én zéi'kan masuat wo un awak né binatang, wo un awak né tumétéwél é nimahwalinaan wo un awak né seza'.

⁴⁰Téntu kangkasii, am witi langit wo am wia ung kaayahan. Am witi langit ém wéwéhan ung kawangunana in esa wo am wia ung kaayahan ém wéwéhan ung kawangunana in esa.

⁴¹Ung kawangunan ni endo, ni loloho'en wo né tototi'en én zéi'kan masuat. Ung kawangunan ni tototi'en esa zéi'kan masuat wo ung kawangunan né tototi'en walina.

⁴²Téntu kangkasii u mamuali wia sé tou nimatéma an itoumé sumaup ni Opo Empung. Un awak méileweng é maléwo', taan un awak ni tou méitoumé sumaup ni Opo Empung én zéi'kan maléwo'.

⁴³Un awak ni tou nimatémo an ileweng én awak maléwo'. Taan ni sia in itoumé sumaup ni Opo Empung ém winéhan un awak wangun. U méileweng én awak zéi'kan enté', taan un awak itii in itoumé sumaup ni Opo Empung én enté'.

⁴⁴Un awak méileweng én awak in tou uman. Taan un awak itoumé sumaup én awak winéhan ni Roh ni Opo Empung ung katou-touan. Sa wéwéhan un awak in tou uman téntu kangkasii ém wéwéhan un awak um wia si Roh ni Opo Empung.

⁴⁵ Tanu u méipantik witu um Pinantik Lenas in téntii, “Si Adam é si tou kataré winangun ni Opo Empung a sia wéhan-Na ung katou-touan.” Taan si Adam totoz kamurian é si Kristus. Ni Sia é si Roh si mahwéhé ung katou-touan wia sé tou.

⁴⁶Ung kataré niméyé én awakta in tou uman. In tumondong taré méyé un awak méiwéhémé ni Roh ni Opo Empung.

⁴⁷Si tou kataré winangun ni Opo Empung én tana' am wangunen. Un tana' itii niéndo wia ung kaayahan kenu. Taan si Kristus si Tou kazua, ém witi kasendukan a méyé.

⁴⁸Péléng sé menou-nou wia ung kaayahan kenu, an awak néra é masuat wo un awak ni tou kataré, tana' am wangunen ni Opo Empung. Taan sé menou-nou witi kasendukan, an awak néra é masuat wo ni Sia si witi kasendukan a méyé.

⁴⁹In tarékan un awakta é masuat wo un awak ni tou kataré, tana' am wangunen. Taan un awakta é lamasuat wo un awak-Na si witi kasendukan a méyé.

⁵⁰Katuari-katuari, kenu un ikuaku wia ni kamu: Un awakta in tarékan én zaha' wo lé'ona u maléwo'. Niitumo, ni kita én zéi'kan toro muntep witi Kakolanoan ni Opo Empung ing Kolano. Un awakta u maléwo' én zéi'kan toro muntep witu pahpaan im witu én zéi'kan siapa a maléwo'.

⁵¹ Totoz wéhan nioula genang! Ikuakuma wia ni kamu u méiwunipé' in téntii: zéi'kan péléng sé tou é maté, taan péléng sé tou é mawalinan.

⁵²Niana i mamuali én totoz rewek tanu am pinitpitan umana. Pahpaan in zumanimé um pontuang totoz kamurian, sé nimatémo én itou sumaup ni Opo Empung karia un awak zéi'kan mahléwo-léwo'la. Ni kita i menou-noupé', un awakta é mangé walinan.

⁵³Pahpaan un awakta un toro maléwo' é mangé walinan makaz in zéi'mo maléwo' wo u mamaté kenu é léwo'zéi' sawelan karia un zéi'mo maté.

⁵⁴ Niitumo, un awakta un toro maléwo' é mawalina makaz in zéi'mo maléwo', wo un awak toro maté é mawalina makaz in zéi'mo maté. Niitu un tumuzu'mé u méipantik witu um Pinantik Lenas é nimamualimo. Téntii u méipantik, “Si Opo Empung én ziméi'moma um patéan, kinala-Namoma um patéan.

⁵⁵ É patéan, ni ko éng kinalamoma! É patéan, amoitumo u séséhézmu?”

⁵⁶U séséhéz um patéan é singkéla' ni tou, wo ung kawasa a singkéla' ni tou é un ukum Torat. Ung kalakoan niitu é si tou memua-muali a singkéla' é léwo'zéi' in ukumen pahpaan simingkéla' witu un ukum itii.

⁵⁷Taan ni kita éng kumua u makasé wia si Opo Empung, si niméhé wia ni kita ung kauntungan makaz ni kita méipiloté im witu um ukuman patéan mengiité si Yesus Kristus Mahpiarata.

⁵⁸Niitumo, katuari-katuari ikararaatéku, rumendaila menté-enté', tia' mahzua-zua genang i ma'éman. Mahtututu'la i mahpaayang am paayangen méiwéhé ni Mahpiara wia ni kamu, pahpaan kata'uan niouo im witu u sinaru ni Mahpiara, zéi'kan siapa am pinaayang niou an zéi'kan siapa torona.