Read Tombulu 1 Korintus 16 Bible Online

1 Korintus 16 - Tombulu bible

1 Korintus 16

¹ In tarékan én tumoro an zoit pahréwoken niou in isawang sé tou linenas ni Opo Empung sé witi Yerusalem. Totoz pahwangunen nioula niana masuat wo a méipahtuzu'ku wia sé jamaat witi Galatia.

²Sekez in duminggu itampas nioula an zoit mengiit ang kinailekan niou wo ilé'osla. Pahwangunen nioula téntu, tia' ni aku i mawanamokala taré kamu ruméwok an zoit.

³Sa ni aku ikaayomoma, ni aku é matu sé tou pinéléng niou mangé witi Yerusalem i mahali an zoit rinéwok niou wo wéhangkumokana um pinantik i mangé wana.

⁴Sa pahgenangen nioula ni aku ém wangun i mangé, maan ni aku é mangé karia néra.

⁵ Ni aku é mangé wia ni kamu witi Korintus, taan ni aku éng kumiité witi Makedonia, pahpaan ni aku éng gimenang i mangémé wana.

⁶Im witi Korintus, uré oki' woo ni aku i mento'mé karia niou, kaapa sa toro éng kauré un oras un zaté. Tumondong niitu ni kamu én toro sumawang ni aku i lumampang mangé wana an angéangku.

⁷Pahpaan in tarékan ni aku é soo in zéi'kan maurémé i mamileké ni kamu. Ni aku mahéré'la sa énéané ni Mahpiara ni aku én toro ikaurémé oki' i mento' karia niou.

⁸ Taan ni aku i mento' witi Efesus é makaz witu un endo wangko' Pentakosta.

⁹Pahpaan lakez un oras ni aku i maayang am papaayangen totoz ipahpuu-puuna, zozo' lakez sé soo ni aku.

¹⁰ Sa mawanala si Timotius, sungkulela sia lumé'o-lé'os wo sia zéi'kan maindé' ing kimaria ni kamu, pahpaan ni sia kangkasii én tanu ni aku, mahpaayang a méiatu ni Mahpiara.

¹¹Niitumo, tia' wo wéwéhan si zéi'kan memandung ni sia! Lumouspé'tarémé niitu sawangala sia wo sia toro meméhé-méhéma i lumampang, zéi'kan siapa a mahraung makaz sia toro ikaayomé sumaup wia ni aku. Pahpaan im wia'i, ni sia ém pa'ento'engku karia né katuari walina.

¹²Tumoro si katuarita Apolos, méipenau-naupkumo i mengimbali wia ni sia, wo sia mahwali karia né tou esa pa'émanen walina i mangémé wia ni kamu. Taan in tarékan ni sia é soopé' i mangé wia ni kamu. Sa wéwéhano un oras lé'os, ni sia é mangé wia ni kamu.

¹³Tuméga-tégam! Totoz menté-enté' witu um pa'émanen niou, enté'-enté'en un tou niou wo tia'mo maindé-indé'!

¹⁴Péléng am pahpaayangen niou, paayangela karia u rumaraaté.

¹⁵ Katuari-katuari, si Stefanus éng kata'uan niouo. Im witi Akhaya, ni sia wo sé sana awuna sé kataré-taré timula'ula a singkéla' néra, a séra ma'éman wia si Yesus. Ni séra é niméhémo un tou néra i mahsawang sé tou ni Opo Empung. Pahaléiengku wia ni kamu,

¹⁶mahtali-talingala wia sé tou sé tanu ni séra. Ni kamu kasii é mahtali-talingala sé tou sé mahpaayang karia néra, sé totoz ma'ulit mahsawang sé tou ma'éman.

¹⁷Ni aku én totoz mahpaa-paaz pahpaan si Stefanas, si Fortunatus wo si Akhaikus i niméyé wia ni aku. Pahpaan ni séra i niméyé é simawel ni kamu im wia'i.

¹⁸Ni séra é nimenté' un atéku wo an até niou. Niitumo, totoz pahsigi'en nioula sé tou tanu ni séra.

¹⁹ Sé jamaat witi Asia é méhéma u sigi' néra wia ni kamu. Si Akwila wo si Priskila wo sé jamaat sé nimaréwok witi walé néra é méhéma u sigi' néra wia ni kamu i ma'éman wia si Mahpiara.

²⁰Péléng sé katuari esa pa'émanen wia'i méhéma u sigi' néra wia ni kamu. Mahsigi-sigi'ala wo mahayoala lengen[11] i mapailek i ni kamu én esa pa'émanen.

²¹Pinantikku ang kenu karia u lengenku: u sigi'ku wia ni kamu, Paulus.

²²Si tou zéi'kan rumaraaté si Mahpiara é makailek un epa'. Maranata, ung kalakoana, “Méyémo o Mahpiara!”

²³Mengalé-ngaléi uman, ung kamang tatambér ni Yesus Mahpiara é menaté-natér ni kamu.

²⁴Ni aku é rumaraaté ni kamu péléng sé nimaesa karia ni Kristus Yesus.