Read Tombulu 2 Korintus 3 Bible Online

2 Korintus 3 - Tombulu bible

2 Korintus 3

¹Kaa kamu ém woo mahgenangla ni kai é mahlooz un tou nai? Kaapa ni kai é léwo'zéi' mahalimé um pinantikan u mahlooz ni kai wia ni kamu, kaapa wéhan niou um pinantikan u mahlooz ni kai, tanu am pahwangunen né tou walina?

²Ni kamumo sé tanu um pinantikan u mahlooz ni kai, pahpaan am pinaayang nai én toro kata'uan wo pahileken né tou wana am wangun am pahwangunen niou itii. Wo niitu é mémoikapantik witu un até nai makaz péléng sé tou én toro maca wo mata'u niitu.

³ Ung katou-touan niou am wangun itii ém wua'na am pinaayang nai, un tanumokan pinantik ni Kristus. I nimantik niitu én zéi'kan karia un tinta, taan karia ni Roh ni Opo Empung si menou-nou. Zéi'kan méipantik wana am watu taan witu un até né tou.

⁴Ni kai éng kumuama in téntu, pahpaan um pa'émanen nai wia si Opo Empung mengiité si Yesus Kristus.

⁵Ni kai én zéi'kan toro kumua i ni kai é makawawa maayang niana mengesa-ngesa. Taan si Opo Empung si niméhé ung ketez wia ni kai makaz ni kai makawawa i maayang am paayangen itii.

⁶ Ni Sia si nimangun ni kai makawawa i maéndo tou maayang a méiatu-Na i mahwoka' um pinataazan weru wia sé tou. Um pinataazan weru itii ém pahpaayangen ni Roh Lenas. Um pinataazan weru itii én zéi'kan am pinantik witu ung kitap Torat. Pahpaan a méipantik witu ung kitap Torat é mahwali sé tou witu um patéan, taan si Roh Lenas é mahwali ni kita witu ung katou-touan.

⁷ Un ukum Torat u mahwali ni kita witu um patéan é méipantik witu um watu. Maan in téntu, in oras um pinataazan itii méiwéhé éng karia ung kawangko'an ni Opo Empung. Im witu un oras um pinataazan itii i méiwéhé, nimangun ung gio ni Musa i mahsena', makaz sé tou Israel zéi'kan mata'u milek ung giona. Zozo' u sena' itii én zéi'kan nimauréma. Sa un ukum Torat u mahwali witu um patéan ém wangko'mo,

⁸tantumo u lumouspé'mé niitu é ung kawangko'an um pinataazan weru um pahpaayangen ni Roh Lenas u mahwali ni kita i maéndo ulit.

⁹Pahpaan, sa un ukum Torat u mahwali sé tou witu un ukuman ém wangko', tantumo um pinataazan weru u mangun sé tou nimaéndo ulit é lumouspé'mé ung kawangko'anna.

¹⁰Un ulitna, un ukum Torat um pahgenangela wangko' im puuna én zéi'mo wangko' sa pasuaten wo ung kawangko'an um pinataazan weru in tarékan.

¹¹Pahpaan, sa ung kawangko'an un ukum Torat un zéi'kan mauréma itii én totoz wangko', tantumo ung kawangko'an um pinataazan weru u makaz ing kauré-uré é lumouspé'mé niitu.

¹²Pahpaan ni kai niméré' witu um pinataazan weru um wia si Opo Empung, niitumo ni kai én zéi'kan maindé' i mahwoka' u Nuwu' Lé'os tumoro si Yesus wia sé tou.

¹³ Ni kai én zéi'kan tanu si Musa, ung giona éng kinemkemanna u roko' wo sé tou Israel zéi'kan milek u sena' mahzéi'ma im witu ung giona.

¹⁴Taan sé tou Israel im puuna, um pakahgena-genang néra éng kinaapé'ampé', niitu é masuat wo un ulu néra én tanu niapé'ampé' karia u roko'. Makaz in tarékan sa séra maca am witu ung kitap Torat, niitu én zéi'kan katulapan néra, un téntu masuat wo ung genang néra éng kinaapé'ampé'. Wo sa séra ma'émano wia si Kristus, niitu taré uli-ulit katulapan néra.

¹⁵Lumouspé'tarémé niitu makaz in endo kenu, sekez séra maca am witu ung kitap Torat pinantik ni Musa, wéwéhan u nimapé' um pakahgena-genang néra makaz in zéi'kan katulapan néra am binaca nérama itii, niitu masuat wo un gio néra é niapé'ampé' karia u roko'.

¹⁶Taan sa wéwéhan si tumula'ula a singkéla'na a ma'éman wia si Mahpiara, um pakahgena-genangna ung kinaapé'ampé' é mawuka.

¹⁷Pahpaan si Mahpiara é si Roh Lenas. Sa si Roh ni Mahpiara ém witu un até ni tou, si tou itii é mahkiitokan ung kapaaz ni Mahpiara, ni sia én zéi'mo ata im wana a singkéla'.

¹⁸Ni kita péléng sé ma'éman, zéi'mo siapa u nimapé' um pakahgena-genangta. Niitumo, ni kita én toro milek ung kawangko'an ni Mahpiara, ni kita én tanu u lélénoan u sumena'ma ung kawangko'an ni Mahpiara. Si Mahpiara sekezé é mahweru ung katou-touanta makaz ni kita kauréna éng kasena'na i mahsena'ma u sena' ni Mahpiara. Ni Sia si nimangun ni kita nimaténtu, ni Siamo si Roh Lenas.