Read Tombulu 2 Korintus 6 Bible Online

2 Korintus 6 - Tombulu bible

2 Korintus 6

¹Ni kai éng kapaayang ni Opo Empung, niitumo ni kai sumésama wia ni kamu, tia' ung kamang méitambér ni Opo Empung ung kinailekan niouo én zéi'kan siapa torona.

² Pahpaan witu um Pinantik Lenas si Opo Empung éng kimua in téntii, “Im witu un oras kapaaz-Ku, ni Aku én timalinga ni ko, wo im witu un endo ni Aku i milot sé tou im witu un ukuman wana a singkéla', ni Aku é sumawang ni ko.” Totoz wéhanla genang, in tarékano un oras kapaaz-Ku. In tarékano un endo si Opo Empung i milot sé tou im witu un ukuman wana a singkéla'.

³Ni kai mahtututu' i mahpaayang uman am wangun, wo am pahpaayangen nai zéi'kan maéndo tanu watu pahkasangkilan né tou, wo zéi'kan siapa si mapahsasala' am pinaayang nai.

⁴Taan, im wana am péléng, ni kai é mapailek i mahpaayang uman u méiatu ni Opo Empung. Niitu méipapailek nai i ni kai ezen im wana: an zézéha, am pengalin wo ang kasusaan,

⁵ im pahwélwélen, im binui wo pahléndongan né tou lakez, i ma'ulit mahpaayang, in zéi'kan mahtekel wo in zéi'kan mahkan.

⁶Ni kai nimangun niitu karia ung genang weresi wo ung katulapan, ung kaezenan wo u lé'os uman wia sé tou. Ni kai kasii é mahéré' uman wia si Roh Lenas wo uli-ulit rumaraaté.

⁷Ni kai é mahtuzu' uman an ulit karia ung kawasa ni Opo Empung. Un ulit pahwangunen nai niitu masuat wo u nimaéndo ipahkoro' i mahsaru sé tou kaapa ing kumelung un tou nai.

⁸Ni kai ém pahsigi'en taan kasii pahséro'an, pahloozen taan kasii ipahsalou, pahkuan in tantowo taan un ulitna én zéi'kan tantowo.

⁹Ni kai éng kata'uan, taan pahwangunen tanu an zéi'kan kata'uan. Ni kai én tawimo maté taan menou-nou. Ni kai ém pahzézéhan taan zéi'kan maté.

¹⁰Ni kai sekezé é mahpaa-paaz zozo' i rumara un até. Ni kai én zéi'kan siapa apa, taan nimangun sé tou lakez nimawa'ilan. Ni kai ém pahileken in zéi'kan siapa apa, taan péléng am péléng ém wia ni kai.

¹¹É tou Korintus! Ni kai nimakaulitola i mahkua wia ni kamu, ni kamu én totoz karaaté nai.

¹²Ni kamu én totoz karaaté nai, taan ni kai én zéi'kan tahlous karaaté niou.

¹³Ni aku i mahnuwu' wia ni kamu én tanu a mahnuwu' wia sé oki'ku in esa. Téntii un ikuakuma: Iraraatémé ni kai tanu ni kai i rumaraaté ni kamu.

¹⁴Ni kamu i ma'éman wia si Yesus én tia' mahkari-karia wo sé tou zéi'kan ma'éman. Pahpaan, zéi'kan siapa u masuat im witu un ulit wo u léwo', kaapa zéi'kan mamuali un ayah mahwali-wali karia u rimbengbeng.

¹⁵Wéwéhan wé u masuat um wia si Kristus wo um wia si Belial, si tonaas né sétang? Téntu kangkasii, apa u masuat wia sé tou ma'éman wia si Kristus wo sé tou zéi'kan ma'éman wia si Kristus?

¹⁶ Apa u masuat um witu um Walé ni Opo Empung wo um witu um walé né opo-opo? Ni kita i ma'éman ém Walé ni Opo Empung. Niitu én tanu u méipantik witu um Pinantik Lenas, in téntii, “Ni Aku é mamento' karia néra, wo menou-nou karia néra, wo ni Aku é maéndo Opo Empung néra, wo ni séra é maéndo tou-Ku.

¹⁷ Pahpaano niitu, Mondolé ni kamu im witu un unez né tou zéi'kan ma'éman, wo tumampasé im wia ni séra, Nuwu' ni Opo Empung. Wo tia' kamu memua-muali a singkéla' u mangun ni kamu i makati'tiren, wo kamu sungkuleng-Ku.

¹⁸ Wo ni Aku é maéndo Ama' niou, ni kamu é maéndo koki'-Ku tuama wo koki'-Ku wéwéné. Niitu u Nuwu' ni Mahpiara, ni Sia si kimawasa péléng am péléng.”