Read Tombulu 2 Korintus 8 Bible Online

2 Korintus 8 - Tombulu bible

2 Korintus 8

¹Katuari-katuari! Ipahkukua nai wia ni kamu ung kamang méitambér ni Opo Empung wia sé jamaat witi Makedonia.

²Ni séra ém pema'wa'en karia an zézéha totoz wutez taan ni séra é mahpaa-paaz, wo zozo' ni séra zéi'kan siapa apa, taan un até néra ém wa'ilan karia ung karipu'an i mahsawang sé tou walina.

³Ipakaulitkuma i ni séra mahwéhé wia sé tou walina é mengiit ung kawawaan néra, lumouspé'tarémé niitu um pahwéhé néra é lumakezpé'mé ung kawawaan néra.

⁴ Witu um paaz néra in esa ni séra menutu' wo mahaléi wia ni kai, sa toro maan ni séra én énéané i ruméwok zoit i sumawang sé jamaat sé witi Yudea.

⁵A méiwéhé néra in isawang é lumouspé'mé um pahéré'en naila. Ni séra é niméhéla ung katou-touan néra kataré-taré wia si Opo Empung, tumondong niitu, ni séra kangkasii niméhé ung katou-touan néra wia ni kai mengiit um paaz ni Opo Empung.

⁶Pahpaano niitu, si Titus pahlusun nai mangé wia ni kamu i sumampet um paayangenna um wangun u méito'tolnama i mahsawang ni kamu mahréwok an zoit sasawang makaz niana nimaréwok.

⁷Niitumo, ni kamu ém wa'ilano im wana am péléng, tanu ang kenu: um pa'émanen niou én enté'mo, tulapo i mahnuwu', lakezo ang kata'uan tumoro si Opo Empung, totoz paaz i mahsawang sé tou walina wo ni kai én totoz ikararaaté niou. Ni kamu in téntu ém wa'ilano, téntu kangkasii ni kamu éng kalousna i mahpaayang am wangun kenu i mahsawang sé tou walina.

⁸Ni aku i mahkuama niitu én zéi'kan mahperénta ni kamu, taan mahwa'wa' uman u raraatéan niou wia sé tou. Niitumo ni aku kimua wia ni kamu, kura sé tou walina i mahtututu' mahsawang sé tou.

⁹Ni kamu é mata'umo ung kamang méitambér ni Yesus Kristus si Mahpiarata wia ni kamu. Ni Sia im wa'ilan, winangun-Na un tou-Na zéi'kan siapa apa pahpaan ni kamu, wo kamu toro mawa'ilan pahpaan winangun-Na un tou-Na in zéi'kan siapa apa.

¹⁰Tumoro niitu, téntii ung genangku um woo wéwéhan torona im wia ni kamu. I nanta'un ni kamu sé kataré nimahréwok an zoit in isawang sé tou susa wo ni kamu kasii én timotozola i mangun niitu.

¹¹In tarékan isampetla am pahwangunen niou itii. Ni kamu i mahwangun niitu mengiit ung genang lé'os niou tanu im puuna wo ung kapaaz niou ipahwéhé é mengiit un toro kawawaan niou.

¹²Pahpaan sa kamu paaz mahwéhé wo mahwéhé mengiit ung kawawaan niou, si Mahpiara ém paaz i sumungkul a méiwéhé niou. Ni Sia én zéi'kan kawisa mahaléi wia ni kamu i mahwéhé un zéi'kan siapa im wia ni kamu.

¹³Ni aku ing kimuama téntu én zéi'kan i mahwuwutez am pengalin niou wo maroraka am pengalin né tou walina, taan wo ung katou-touanta péléng é mahsua-suatan.

¹⁴In tarékan, u méikalakez im wia ni kamu én iawesla wia sé zéi'kampé' awes am pemandungen néra. In tumondong, sa im wia ni kamu ém wéwéhan un zéi'kampé' awes wo im wia ni séra ém wéwéhan u méikalakez, ni séra én toro mawes wia ni kamu. Karia in téntu, ung katou-touan niou é mahsua-suatan.

¹⁵Tanu a méipantik witu um Pinantik Lenas, in téntii, ‘Si tou riméwok lakez, um wia ni sia én zéi'kan kumuwu-kuwu wo si tou riméwok un toyo' uman, um wia ni sia én zéi'kan kaapuan.’

¹⁶Ni aku éng kumuama u makasé wia si Opo Empung, pahpaan un até ni Titus én tanu un até nai in uli-ulit paaz mahsawang ni kamu.

¹⁷Si Titus é niménéla i méiatu nai masumawang ni kamu. Zéi'kan uman i méiatu nai a sia mangé, taan ni sia kangkasii én totoz paaz masumawang ni kamu.

¹⁸Ni kai kasii é nimatuma si katuari esa pa'émanen i mangé karia ni Titus. Si katuarita itii ém pahloozen péléng né jamaat pahpaan um pakahpaayangna i mahwoka' u Nuwu' Lé'os ni Opo Empung.

¹⁹Zéi'kan uman niitu, ni sia kasii én tinotozola né woopira jamaat i mahwali karia nai mahali an zoit isawang wia sé katuarita esa pa'émanen sé witi Yudea. Winangun nai niana péléng, wo si Mahpiara é loozen wo sigi'en wo kasii ikatuzu'mé i ni kai én ulit paaz mahsawang sé tou.

²⁰Ni kai én totoz mile-ilek én taa wéwéhan sé tou mapahsasala' ni kai i mahali an zoit isawang un téntumokala ung kalakez itii.

²¹ Niitumo kapaaz nai mahwangun a lé'os én zéi'kan uman witu u sinaru ni Mahpiara taan maan im witu u sinaru né tou.

²²Karia ni Titus wo si katuari esa pa'émanen, méiatu nai kasii i mangé karia néra zua, si tou ma'éman walina si makapiramo wina'wa' nai, ni sia sekezé é mahsawang sé tou. In tarékan, totoz kapaazna i sumawang ni kamu pahpaan ni kamu én totoz pa'émanenna.

²³Tumoro si Titus, ni sia éng kakariaku wo kapaayangku i mahsawang ni kamu. Tumoro sé zua tou ma'éman sé mahwali wo si Titus, ni séra é méiatu né woopira jamaat i mangé witi Yudea. Pahpaan am pinaayang néra, si Kristus é loozen wo sigi'en.

²⁴Niitumo, ni kamu in jamaat witi Korintus, ipapailekla u raraatéan niou wia ni séra telu. Wo kata'uala né woopira jamaat, i ni séra én uli-ulit ikararaaté niou wo an ipahloo-looz nai tumoro ni kamu én ulit.