Read Tombulu Galatia 1 Bible Online

Galatia 1 - Tombulu bible

Galatia 1

¹Um pinantik kenu ém wia ni aku Paulus a mangé. Ni aku én aatu ni Yesus Kristus, zéi'kan pahpaan méiatu né tou kaapa pahpaan tinotoz ni tou, taan pahpaan si Yesus Kristus wo si Opo Empung, si Ama', si timoumomé sumaup si Yesus im wia sé nimaté.

²Um pinantik kenu kasii ém wia péléng sé katuari esa pa'émanen sé memali-mali kariaku wia'i a mangé, iwéhé wia sé jamaat witi Galatia.

³Mengalé-ngaléi uman, ung kamang tatambér wo ung kaluasan witu un até, um wia si Opo Empung, si Ama'ta wo um wia si Yesus Kristus Mahpiara é menaté-natér ni kamu.

⁴Karia um paaz ni Opo Empung si Ama'ta, si Yesus Kristus nimayo un tou-Na in tumubus ni kita im wana a singkéla' pahwangunenta wo milot ni kita im wia ung kaayahan léwo' kenu in tarékan.

⁵Wia si Opo Empung uman u sigi' wo looz makaz ing kauré-uré! Amin.

⁶Ni aku én totoz mengompo' pahpaan ni kamu sé tinawah ni Opo Empung karia ung kamang méitambér ni Kristus én tahlous rewek timamburimé wia si Opo Empung, ang kumiit u nuwu' lé'os tumoro si Yesus un zéi'kan masuat karia un ipahwoka'ku.

⁷Un ulitna, u nuwu' lé'os walina tumoro si Yesus itii én zéi'kan ulit Nuwu' Lé'os tumoro si Yesus. Wéwéhan uman sé tou mahlilinganga ni kamu wo sé mahsasawel u Nuwu' Lé'os tumoro si Yesus Kristus karia u nuwu' lé'os tumoro si Yesus un zéi'kan ulit.

⁸Zozo' im wia ni kai kaapa si malaekat witi kasendukan si mahwoka' wia ni kamu u nuwu' lé'os walina un zéi'kan masuat karia u Nuwu' Lé'os tumoro si Yesus u méipahwoka' nai wia ni kamu, ni sia é makailek un epa' ni Opo Empung.

⁹Tanu u méikua nai im puunala, in tarékan én ikuakupé'ma sumaup: Sa wéwéhan si mahwoka' wia ni kamu u nuwu' lé'os walina tumoro si Yesus, un zéi'kan kasuat u Nuwu' Lé'os tumoro si Yesus ung kinailekan niouo, ni sia é makailek un epa' ni Opo Empung.

¹⁰Niitumo in tarékan, apa sé tou wé sé wangunengku i mahpaa-paaz kaapa si Opo Empung? Kaapa, apa um pahpenérongku é mangun sé tou mahpaa-paaz? Sa ni aku mahtututu'pé' i mangun uman sé tou mahpaa-paaz, ni aku én zéi'mo ata ni Kristus.

¹¹Katuari-katuari, totoz ing kata'uan nioula, u Nuwu' Lé'os tumoro si Yesus un ipahwoka'ku wia ni kamu én zéi'kan u nuwu' lé'os tumoro si Yesus um wia sé tou a méyé.

¹²U Nuwu' Lé'os tumoro si Yesus itii én zéi'kan kinailekangku wia sé tou wo zéi'kan sé tou sé timuzu' niitu wia ni aku, taan si Yesus Kristus in esa si nimapata'u a méikawunipé' itii wia ni aku.

¹³ Tantumo ni kamu én timalingamo tumoro ung katou-touangku im puuna, i mahkiitpé' an tinotoz um pa'émanen né tou Yahudi. In toro niitu ni aku én zéi'kan kumana' i mahzézéha sé jamaat ni Opo Empung wo mahtututu' i mahzézéi' ni séra.

¹⁴ Tumoro u mahkiit an tinotoz um pa'émanen né tou Yahudi, ni aku é lumousé sé kakaria karenganku sé lakez im wia sé tahsasana wanuaku. Ni aku én uli-ulit mahkiit ang kinanaram né nimaopoku.

¹⁵ Taan si Opo Empung é niméléngo ni aku rengané im pahawa-awakempé' ni ina'ku wo tinawah-Na ni aku pahpaan ung kamang méitambér-Na,

¹⁶ni Sia nimapata'u a méikawunipé' tumoro si Oki'-Na wia ni aku wo ni aku mahwoka' u Nuwu' Lé'os tumoro si Oki'-Na itii wia sé tou zéi'kan Yahudi. In toro niitu ni aku én zéi'kan rengan i nimahaléi a sésésa né tou walina i sumawangé ni aku makatulap u Nuwu' Lé'os tumoro si Yesus itii.

¹⁷Ni aku kasii én zéi'kan nimangé witi Yerusalem i mahaléi a sésésa né nimaéndomola aatu ni Yesus Kristus puunala ni aku. Ni aku é nimangé uman taré witi tana' Arab, im witu mokan a ni aku mawurimé sumaup witi Damsyik.

¹⁸ Teluna ta'un tumondong niitu a ni aku mangé witi Yerusalem i mahilekan karia ni Kefas.[1] Ni aku i nimahento'mé witi waléna é mapulu' wo limana endo.

¹⁹In toro niitu, sé aatu walina ni Yesus Kristus én zéi'kan nimahilekané kariaku, akaz uman si Yakobus si katuari ni Yesus Mahpiara si nimahilekané kariaku.

²⁰Witu u sinaru ni Opo Empung ni aku én uli-ulit kumuama: Péléng a méipantikuma wia ni kamu kenu én ulit wo ni aku én zéi'kan mahtowo.

²¹Tumondong niitu a ni aku mangé wana an tana' witi Siria wo witi Kilikia.

²²Taan sé jamaat ni Yesus Kristus sé witi Yudea én zéi'kampé' nimahile-ilekala kariaku.

²³Un tinalinga néra um pahkuan né tou é, “Si tou si im puuna mahzézéha ni kai, in tarékan ni sia é mahwoka' um pa'émanen un im puuna ém pahzézéi'enna.”

²⁴A séra mahlooz wo mahsigi' si Opo Empung pahpaan um winangun ni Opo Empung wia ni aku.