Read Tombulu Galatia 2 Bible Online

Galatia 2 - Tombulu bible

Galatia 2

¹ I mapulu' wo epatna ta'un tumondongé, a ni aku, Paulus, mangé kasiimé witi Yerusalem karia ni Barnabas wo ni Titus.

²Ni aku nimangé wana éng kumiit u méipapata'u ni Opo Empung. Im witu ni aku nimahilekané wo sé tonaas né jamaat wo ni kai én timampasla i simirita. Wia sé tonaas itii, ni aku é nimapata'u u Nuwu' Lé'os tumoro si Yesus u méipahwoka'kumé wia sé tou zéi'kan Yahudi. Karia in téntu, am pinaayangkumomé wo um pahpaayangengku in tarékan ém wéwéhan torona.

³Taan si Titus, si tou Yunani, si mahwali-wali kariaku, ni sia én zéi'kan penutu'en néra im pekisunat mengiit un ukum Torat um pahkiiten né tou Yahudi.

⁴Un tumoro si Titus zéi'kan sinunat é méikakuamé pahpaan im witu ém wéwéhan sé mahkua-kua ma'éman wia si Yesus, taan un ulitna ni séra én towo, ni séra mahtututu' wo si Titus é sunaten. Ni séra é mahwuni-wuni i nimuntepé kimariala ni kai sé uli-ulit ma'émano si Kristus. Ni séra nimangunla an téntu wo séra toro mahilek apa um pahwangunenta i ni kita zéi'mo mahkiit un ukum Torat pahpaan nimaesa karia ni Kristus Yesus. Ni séra é mahtututu' wo kita ikakiit sumaup i mahwangun un ukum Torat. Sa kita ikakiitla, ni kita én tanu pahata-atan un ukum Torat itii.

⁵Taan ni kai én totoz soo ing kumiit ni séra zozo' in tanu uman kauré i mitpita, pahpaan ni kai é soo sa u Nuwu' Lé'os tumoro si Yesus u méituzu' naimo wia ni kamu éng kasemboran karia an tutuzu' zéi'kan ulit pahtuzu' néra.

⁶ Tumoro sé tonaas sé pahsigi-sigi'en né jamaat witi Yerusalem, (wia ni aku, azi niitu apa um pahpaayangen néra, tonaas kaapa sé tou uman im puuna é masuat uman, pahpaan si Opo Empung kangkasii én zéi'kan meméléng tou). Ni séra én zéi'kan nimatu ni aku i mawesla apa uman witu um pahtuzu'ku wia sé tou u Nuwu' Lé'os tumoro si Yesus.

⁷Lumousé niitu, in toro niitu kinata'uan nérala i ni aku é winéhan paayangen i mahwoka' u Nuwu' Lé'os tumoro si Yesus wia sé tou zéi'kan Yahudi, tanu si Petrus im winéhan paayangen i mahwoka' u Nuwu' Lé'os tumoro si Yesus wia sé tou Yahudi.

⁸Pahpaan si Opo Empung si nimangun si Petrus makawawa i maéndo aatu ni Yesus Kristus wia sé tou Yahudi sé sinunat, ni Sia kasii si nimangun ni aku makawawa i maéndo aatu ni Yesus Kristus wia sé tou zéi'kan Yahudi.

⁹I nimilekola ung kamang méitambéré ni Opo Empung wia ni aku, si Yakobus, si Petrus wo si Yohanes sé pahkuan in tonaas ipahpuu-puuna né jamaat, nimaayoala lengen kariaku wo karia ni Barnabas, niitu un tumuzu'mé i ni kai é nimaesaano. Um pinaesaan nai é, ni kai mahwoka' u Nuwu' Lé'os tumoro si Yesus wia sé tou zéi'kan Yahudi wo ni séra é mahwoka u Nuwu' Lé'os tumoro si Yesus wia sé tou Yahudi.

¹⁰Um pahaléien néra uman wia ni kai i mahwéhé genang wia sé tou zéi'kan siapa apa. Niitumo un totoz kapaazku im wangunen.

¹¹I si Petrus niméyé witi Antiokhia, ni sia éng kinakoro'angkula witu u saru-saru né tou lakez pahpaan ni sia é mahsala'.

¹²Pahpaan puunala sé woopira tou sé méiatumé ni Yakobus i niméyé, si Petrus é mahkan mahwali-wali karia né katuari esa pa'émanen sé zéi'kan tou Yahudi. Taan i nimawitula sé tou méiatumé ni Yakobus, si Petrus zimou'mé im wia sé katuari esa pa'émanen zéi'kan tou Yahudi itii wo soomo kuman mahwali-wali karia néra pahpaan ni sia é maindé' wia sé tou Yahudi sé sinunat sé méiatumé ni Yakobus.

¹³Sé woopira tou Yahudi walina kangkasii éng kimiita um winangunna ni Petrus i mahgau-gau lé'os. Taka-takazan si Barnabas kangkasii é méikakiita ni séra i mahgau-gau lé'os.

¹⁴I niilekula um pahwangunen néra én zéi'kan maéndoan karia ung kaulitan u Nuwu' Lé'os tumoro si Yesus, a si Petrus kakoro'angkula witu saru-sarun néra péléng, “Sa ko in tou Yahudi menou-nou tanu sé tou zéi'kan Yahudi wo zéi'kan mahkiit ang kinanaram né tou Yahudi, kura kahuman ko toro menutu' mangun sé katuari zéi'kan tou Yahudi in toro menou-nou tanu sé tou Yahudi?”

¹⁵Rengan i nimatoumé, ni kai én tou Yahudi wo zéi'kan tou wia sé tahsasana wanua walina a méyé, sé pahkuan mahsingkéla' pahpaan zéi'kan ma'éman wia si Opo Empung.

¹⁶ Kata'uan naimo in zéi'kan siapa tou zozo' in esa si niéndo ulit ni Opo Empung pahpaan mahkiit un ukum Torat. Taan sé niéndo ulit ni Opo Empung é sé ma'éman si Kristus Yesus. Pahpaano niitu, ni kai kangkasii é ma'émano wia si Kristus Yesus, wo ni kai én éndon ulit ni Opo Empung mengiité um pa'émanen nai wia si Kristus Yesus, zéi'kan mengiit un ukum Torat. Pahpaan: “Zéi'kan siapa tou sé niéndo ulit ni Opo Empung pahpaan mahkiit un ukum Torat.”

¹⁷Ni kai én tou Yahudi sé mahtututu' in éndon ulit ni Opo Empung pahpaan nimaesa karia ni Kristus. Taan sa nimangunoma niitu, méikatuzu'mé i ni kai é mahsingkéla'pé', apa si Yesus Kristus si nimangun ni kita i mahwangun a singkéla'? Zéi'kan!

¹⁸Taan sa ni aku mawurima sumaup ing kumiit an tutuzu' witu un ukum Torat in éndon ulit ni Opo Empung, niitu én tanumokan ni aku rumendai sumaup um walé tu'a ung kinayaskumola. Sa ni aku mangunla tanu niitu, ni aku é simala'mola wia si Opo Empung.

¹⁹Pahpaan un ukum Torat én zéi'mo siapa torona im wia ni aku, niitu én tanu un ukum Torat é nimatémo im wia ni aku. Wo ni aku toro menou-nou wia si Opo Empung, ni aku é sinalipo karia ni Kristus.

²⁰In tarékan, zéi'mo ni aku si menou-nou taan si Kristus si menou-nou wo mahkawasa witu ung katou-touangku. Witu ung katou-touangku wia ung kaayahan in tarékan kangkasii, ni aku é menou-nou witu um pa'émanengku wia si Oki' ni Opo Empung, si totoz rimaraatémo ni aku wo niméhémo un tou-Na in esa wia ni aku.

²¹Ni aku én zéi'kan kumua soo im wana ang kamang méitambér ni Opo Empung. Pahpaan sa wéwéhan si tou niéndo ulit pahpaan mahkiit un ukum Torat, ung kalakoan si Kristus nimaté én zéi'kan siapa torona.