Read Tombulu Galatia 6 Bible Online

Galatia 6 - Tombulu bible

Galatia 6

¹Katuari-katuari, sa im wia ni kamu ém wéwéhan sé kinata'uan i mahmuali u singkéla', ni kamu sé mahkiit um paaz ni Roh Lenas é léwo'zéi' mahkit si tou itii witu u lalan kaulitan. Wangunela niitu karia in eluz uman wo mile-ilek én taa un toumu in esa ikakiit i mahsingkéla' tanu si tou itii.

²Mahsawa-sawangala i mengali am pengalin! Sa ni kamu nimangunola niana, ni kamu é mahtali-talinga um perénta ni Kristus.

³Pahpaan sa si tou mahgenangla i ni sia é lumousé sé tou walina, taan ndéén zéi'kan, ni sia é mahtowomo witu un touna in esa.

⁴Wa'wa'ela um pahwangunen ni esa wo ni esa; sa um pahwangunenna wangun, ni sia én toro mahpaa-paaz. Taan um pahwangunennu én tia' pahloo-loozmu lumousé am pahwangunen né tou walina.

⁵Pahpaan si esa wo si esa é mengali am wua'na wana am winangunna in esa.

⁶Si tou si nimakailek an tutuzu' tumoro u Nuwu' ni Opo Empung, péléng am wangun ang kinailekannamé é léwo'zéi' im pahwéténgla wia si niméhémé an tutuzu' tumoro u Nuwu' ni Opo Empung itii.

⁷Tia' kamu ikalulu! Si Opo Empung én zéi'kan mata'u pahléléongan. Apa u méikeroz ni tou, niitu kangkasii u maupu'enna.

⁸Pahpaan séi si mahkiit uman u lelo un awakna i mahwangun a léwo', ni sia é makailek um patéan pahpaan u lelo un awakna i mahwangun a léwo', taan sé mahkiit um paaz ni Roh Lenas, ni sia é makailek ung katou-touan makaz ing kauré-uré un ipahwéhémé ni Roh Lenas itii.

⁹Tia' maseso' i mahwangun a lé'os, pahpaan sa kita zéi'kan maseso' mahwangun niitu, i méikaayomola witu un oras tinotoz ni Opo Empung, ni Sia é méhé am wangun wia ni kita. Niitu é masuat wo si timanem i mupu' u méitanemna.

¹⁰Niitumo, im wéwéhampé' un oras wia ni kita, méyémo kita mangun a lé'os wia péléng sé tou, sé ipahpuu-puuna é sé katuarita esa pa'émanen.

¹¹Ilekenomé, ung katua'na um pakahpantikku karia u lengenku in esa wana a méipantikku wia ni kamu.

¹²Sé tou Yahudi sé paaz mapahlolooz un tou néra wana an toro pahileken né tou, ni séramo sé mahtututu' mahlusu ni kamu i sunaten. Ung kalakoan néra i nimangun niitu, wo séra zéi'kan makailek an zézéha i ma'éman si Kristus nimaté sinalip.

¹³Pahpaan sé sinunato itii, ni séra kangkasii én zéi'kan makawawa ing kumiit péléng a méipantik wana un ukum Torat. Taan kapaaz néra, ni kamu é sunaten wo séra mahloo-looz i milek ni kamu mahkiit a méipantik wana un ukum Torat.

¹⁴Taan um pahloo-loozku én zéi'kan un touku, si pahloo-loozku é si Yesus Kristus Mahpiarata si nimaté sinalip. Pahpaan si Yesus Kristus Mahpiarata nimaté sinalip, niitumo, am pahileken né tou wia ung kaayahan kenu im wéwéhan torona én zéi'mo siapa torona im wia ni aku. Wo ni aku én tanumokan i nimatémo im wia ung kaayahan kenu.

¹⁵Pahpaan sinunat kaapa zéi'kan sinunat én zéi'kan siapa torona, taan um wéwéhan torona éng katou-touan weru um wia si Opo Empung a méyé.

¹⁶Im wia péléng sé tou sé menou-nou karia ung katou-touan weru kenu, mengalé-ngaléi uman u mahlé'o-lé'osan wo u raraatéan ni Opo Empung én iwéhémé wia ni séra wo wia sé tou Israel sé anu ni Opo Empung.

¹⁷Rengan in tarékan, tia' wo wéwéhampé' si tou mahsususa ni aku, pahpaan im witu un awakku ém wéwéhan am walulang i ni aku pinahzézéhamé, un tumuzu'mé i ni aku én anu ni Yesus.

¹⁸Katuari-katuari! Mengalé-ngaléi uman ung kamang tatambér ni Yesus Kristus Mahpiarata é menaté-natér si roh niou. Amin.