Read Tombulu Efesus 1 Bible Online

Efesus 1 - Tombulu bible

Efesus 1

¹ Um pinantik kenu ém wia ni aku Paulus a mangé, si witu um paaz ni Opo Empung tinawah i maéndo aatu ni Kristus Yesus. Um pinantik kenu én iwéhé wia sé tou linenas ni Opo Empung witi Efesus sé ma'émano wo mahtali-talinga wia si Kristus Yesus.

²Ung kamang tatambér wo ung kaluasan witu un até, um wia si Opo Empung Ama'ta wo um wia si Yesus Kristus Mahpiara é menaté-natér ni kamu.

³Loozela si Opo Empung, si Ama' ni Yesus Kristus Mahpiarata si timambéré wia ni kita péléng ang kamang witi kasendukan mengiité si Roh Lenas pahpaan nimaesa karia ni Yesus Kristus.

⁴Pahpaan si Opo Empung é niméléngo ni kita puunala ung kaayahan kenu im winangun mengiité um pinaesaanta karia ni Yesus Kristus, wo kita lenasen ni Opo Empung wo zéi'kan siapa um pahséro'an witu u sinaru-Na.

⁵Rengan im puuna, ni Sia é rumaraaté ni kita wo niméléngo ni kita i maéndo oki'-Na mengiité si Yesus Kristus, niitumo ung kapaaz-Na wo u mahwangun ni Sia mahpaa-paaz.

⁶Niitumo, ni Sia ém pahloozen pahpaan ung kamang méitambér-Na én totoz wangko'. Niitu méiwéhé-Na wia ni kita mengiité si Yesus Kristus si Oki'-Na si ikararaaté-Na.

⁷ Pahpaan mengiité si Yesus ni kita én tinubus im wana a singkéla' karia un zaha'-Na. Ni kita winéhan un ampungan im wana a singkéla' mengiit ung kamang méitambér-Na an totoz lakez.

⁸Ang kamang méitambér é méiwéhé-Namé malake-lakez karia péléng ang katulapan wo ang kata'uan-Na.

⁹Si Opo Empung nimapata'umo ung ginenang-Na u méikawunipé' wia ni kita. Ung ginenang-Na rengané im puuna mengiit um paaz-Na én tinotoz-Na i lekepen mengiité si Kristus.

¹⁰Ung ginenang ni Opo Empung itii é mangun péléng am witi kasendukan wo am wia ung kaayahan maesa wia si Kristus, wo si Kristus é maéndo Tonaas péléng am péléng i méikaayomola witu un orasna.

¹¹Si Opo Empung nimangun péléng am péléng mengiit um paaz-Na wo un tinotoz-Namo in esa. Rengané ung kaayahan zéi'kampé' winangun, ni Sia én timotozo ni kita sé kapaaz-Na i maéndo tou-Na pahpaan nimaesa karia ni Kristus.

¹²Karia in téntu, ni kita sé im puuna niméré' uman wia si Kristus é lumooz ni Sia pahpaan ung kawangko'an-Na.

¹³Téntu kangkasii ni kamu é nimaéndomo tou ni Opo Empung i ni kamu timalingamola u nuwu' kaulitan um wia si Opo Empung a méyé, niitumo u Nuwu' Lé'os u nimilot ni kamu im witu un ukuman wana a singkéla'. I ni kamu nima'émanola u Nuwu' Lé'os itii, si Opo Empung é niméhémé si Roh Lenas wia ni kamu un tumuzu'mé i ni kamu én tou-Na, mengiit u mémoitaaz-Na.

¹⁴Si Roh Lenas itiimo si nimenté', i ni kita é makailek u mémoitaaz ni Opo Empung wia sé tou-Na. Si Roh Lenas itiimo si nimangun ni kita ma'éman i si Opo Empung é milot sé tou-Na im witu un ukuman wana a singkéla' i lumooz ung kawangko'an-Na.

¹⁵Niitumo, in tinalingakumola ni kamu ma'éman wia si Yesus Mahpiara wo u raraatéan niou wia péléng sé tou linenas ni Opo Empung,

¹⁶ni aku én zéi'kan mazéi' i mapaayo u makasé wia si Opo Empung pahpaan ni kamu. Sekez ni aku i mengaléi, ni kamu én ipahpengaléiku.

¹⁷Ni aku mahaléi wia si Opo Empung si Ama' ni Yesus Kristus Mahpiarata, si pahloozen wo pahsigi'en itii i méhémé wia ni kamu si Roh-Na, si nimangun ni kamu matulap wo si Roh si matumuzu' tumoro si Opo Empung, wo ni kamu karia in ulit mata'u tumoro ni Sia.

¹⁸Ni aku kasii é mengaléi wia si Opo Empung, wo ung genang niou é mawuka wo toro makatulap um pahéré'an niou wia si Opo Empung si timawah ni kamu. Wo ni kamu kangkasii én toro mata'u kalakez ung kamang totoz wangun u niimeko ni Opo Empung wia sé tou linenas-Na,

¹⁹wo kamu toro mata'u ung kawasa-Na én totoz wangko' wia ni kita sé ma'éman. Ung kawasa itii éng kaenté'an ni Opo Empung un totoz wangko'

²⁰ um pinaké-Na in timoumé sumaup si Kristus im wia sé nimaté. Wo ung kawasa itii kasii u nimangun si Kristus rimumez witu ung kakan ni Opo Empung witi kasendukan.

²¹Ung kawasa ni Kristus itii é lumouspé'mé sé pemerénta, lumouspé'mé ung kawasa wia ung kaayahan, lumouspé'mé sé tonaas, lumouspé'mé sé tuang wo séi uman sé pahsigi-sigi'en, séra i menou-nou in tarékan kaapa sé mamenou-nou in tumondong.

²² Péléng am péléng ém winanguno ni Opo Empung ing kawasan ni Kristus wo nimayo si Kristus wia sé jamaat i maéndo tonaas néra.

²³Sé jamaat én awak ni Kristus. Si Kristus nimangun sé jamaat-Na nimalekep im wana péléng am péléng.