Read Tombulu Efesus 2 Bible Online

Efesus 2 - Tombulu bible

Efesus 2

¹ Puunala ni kamu i ma'éman, ni kamu én tanu nimatémo pahpaan a léwo'an wo a singkéla' niou.

²In toro niitu ni kamu é menou-nou mengiit ang kinanaram né tou wia ung kaayahan, ni kamu mahtali-talinga sé roh léwo' mahkawasa witi langit, ni séramo sé roh mahkawasa witu un até né tou zéi'kan mahtali-talinga si Opo Empung.

³Im puuna ni kita péléng é masuat karia néra, ni kita menou-nou mahkiit u lelo léwo' un awakta, mahwangun um paaz un awakta wo ang genang léwo'ta. In toro niitu, ni kita kangkasii én tou sé léwo'zéi' i makailek un upi' makaindé'en ni Opo Empung tanu sé tou walina.

⁴Taan si Opo Empung én totoz lé'os uman taka-takazan niitu é méipapailek-Na karia in totoz rumaraaté ni kita.

⁵Pahpaan a siningkéla'ta, ni kita én tanu nimatémo. Taan ni kita é mémoitou sumaup ni Opo Empung karia ni Kristus. Niitu ém pahpaan uman ung kamang méitambér-Na i ni kamu méipilot im witu un ukuman wana a singkéla'.

⁶Wo pahpaan nimaesa karia ni Kristus Yesus, si Opo Empung tumou sumaup ni kita wo kangkasii mangun ni kita mahperénta witi kasendukan karia ni Kristus Yesus.

⁷Si Opo Empung mangun niitu, wo in tumondong sé tou toro milek u raraatéan-Na un zéi'mo kakuaan wo u lé'os-Na wia ni kita pahpaan nimaesa karia ni Kristus Yesus.

⁸Pahpaan ung kamang méitambér ni Opo Empung, ni kamu méipiloté im witu un ukuman wana a singkéla' mengiité um pa'émanen niou, zéi'kan pahpaan um winangun niou taan méitambér umané ni Opo Empung.

⁹Ni kamu méipiloté im witu un ukuman wana a singkéla' zéi'kan pahpaan um pinaayang niou, wo zéi'kan siapa si tou toro lumooz un touna in esa.

¹⁰Pahpaan ni kita ém winangun ni Opo Empung mengiité si Kristus Yesus, i maayang am wangun a niimeko ni Opo Empung im puuna, wo kita toro menou-nou karia i memangu-mangun a lé'os.

¹¹Niitumo gena-genangen, rengan ni kamu nimatoumé ni kamu én zéi'kan tou Yahudi. Ni kamu ém pahkuan in tou zéi'kan sinunat né tou Yahudi, sé tou sinunat itii u makaizangen néra ém wéwéhan um walulangna i sinunat um winangun né kasuat tou.

¹²In toro niitu ni kamu én zéi'kampé' mata'u tumoro si Kristus, ni kamu zéi'kampé' ipahrékén in tou Israel sé tou ni Opo Empung wo ni kamu én zéi'kan makailek um wéwéténgan witu un taaz ni Opo Empung. Ni kamu sé im wia ung kaayahan én zéi'kan siapa pahéré'an wo ni kamu zéi'kan mata'u si Opo Empung.

¹³Taan ni kamu sé im puuna zou' im wia si Opo Empung, in tarékan é rétémo karia-Na pahpaan un zaha' ni Kristus Yesus u nimangun ni kamu nimaesamo karia-Na.

¹⁴Pahpaan si Kristus uman si nimangun ni kita péléng mahlé'o-lé'osan. Ni Sia si nimangun sé tou Yahudi karia né tou zéi'kan Yahudi nimaesaan karia i nimayoma un tou-Na in esa un tanumokan ing kimemuma u réhén mésel u nimangun ni kita nimatampasan. U réhén mésel itii ém pahéndo-éndoan.

¹⁵ Pahpaan, karia ni Sia nimaté witu u salip, ni Sia nimangun un ukum Torat karia péléng an tinotoz wo am perénta witu zinéi'mo. Wo sé tou Yahudi karia né tou zéi'kan Yahudi maéndo tou wineru sé nimaesa im wia si Kristus wo karia um patéan-Na itii, si Kristus nimangun ni séra toro mahlé'o-lé'osan.

¹⁶ Karia ni Sia nimaté witu u salip, ni Sia nimangun sé tou Yahudi karia né tou zéi'kan Yahudi nimaesaan wo mahlé'o-lé'osan karia ni Opo Empung. Karia in téntu ni séra én zéi'mo makahkoro'.

¹⁷ Si Kristus é niméyé wo mahwoka' u Nuwu' Lé'os tumoro u mahlé'o-lé'osan wia ni kamu in tou zéi'kan Yahudi sé im puuna zou' im wia si Opo Empung karia ni kamu in tou Yahudi sé im puuna rété im wia si Opo Empung.

¹⁸Pahpaan mengiité si Kristus, kita in tou Yahudi karia né tou zéi'kan Yahudi, winukaan lalan i rumété wia si Opo Empung si Ama' karia in tinulung ni Roh Lenas si esa uman.

¹⁹Niitumo, ni kamu én zéi'mo tou wana an tampa walina a méyé wo limepuh umané. Taan ni kamu in tarékan é nimaéndomo tou ni Opo Empung wo nimaéndomo sana awu ni Opo Empung.

²⁰Ni kamu sé ma'éman wia si Kristus Yesus én toro pasuaten karia um walé winangun ni Opo Empung. Sé aatu ni Yesus wo sé nabi sé zimeta'ma um watu to'tolan um walé wo um watu to'tolan itii é si Kristus Yesus.

²¹Ni Siamo si timu'tul péléng am wéténgna um walé itii maéndo walé Lenas ni Opo Empung.

²²Pahpaan nimaesa karia ni Yesus Kristus ni kamu ém pahwangunen i maéndo walé pahento'an ni Roh ni Opo Empung.