Read Tombulu Efesus 3 Bible Online

Efesus 3 - Tombulu bible

Efesus 3

¹Pahpaano niitu, ni aku Paulus ém binui pahpaan mahwoka' u Nuwu' Lé'os tumoro si Kristus Yesus wo ung kawangunan niou in tou zéi'kan Yahudi.

²Tantumo ni kamu én timalingamo um paayangen méiwéhé ni Opo Empung wia ni aku in tumulung ni kamu mapata'u tumoro ung kamang méitambér ni Opo Empung.

³Si Opo Empung é nimapata'umo wia ni aku ang ginenang-Na a méikawunipé', tanu a méipantikumo witu um pinantikku potot kenu.

⁴ Um pinantik kenu im baca nioua én toro kata'uan niou ung kinatulapangkumola u méikawunipé' tumoro si Kristus,

⁵un im puuna én zéi'kan méipahkua-kuala wia sé tou taan in tarékan é méikuamo ni Roh ni Opo Empung wia sé aatu wo wia sé nabi-Na, sé linenas ni Opo Empung.

⁶Ung kenu u méikawunipé' itii: Péléng sé tou ma'éman u Nuwu' Lé'os tumoro si Kristus Yesus, ni séra in tou Yahudi kaapa zéi'kan tou Yahudi é makailek um wéwéténgan im wana a méitaaz ni Opo Empung wia sé tou-Na. Ni kita péléng é maéndo esa awak wo makailek u mémoitaaz ni Opo Empung wia sé nimaesa karia ni Kristus Yesus.

⁷Ung kenumo u Nuwu' Lé'os un iwoka'ku wia ni kamu. Si Opo Empung timambér ung kamang wia ni aku i ni aku mahwoka' u Nuwu' Lé'os itii. Ung kamang itii éng kinailekangku mengiité ung kawasa-Na u mahpaayang witu un atéku.

⁸Wia ni aku, si totoz roros im wia péléng sé tou linenas ni Opo Empung én tinambéran ung kamang i mahwoka' wia sé tou zéi'kan Yahudi u Nuwu' Lé'os tumoro ung kamang totoz lakez ni Kristus un zéi'kan maapu.

⁹Ni aku kasii én tinambéran ung kamang i mapata'u wia péléng sé tou ung ginenang ni Opo Empung u méikawunipé' itii. Pahpaan ung ginenang itii é méiwuni ni Opo Empung rengan ung kaayahan im winangun-Na, si nimangun péléng am péléng.

¹⁰Wo mengiité sé jamaat, si Opo Empung in tarékan toro mapata'u ang ginenang-Na tumoro péléng ang katulapan-Na wia sé mahperénta wo sé mahkawasa witi kasendukan.

¹¹Si Opo Empung nimangun niitu mengiit ung ginenang-Na u makaz ing kauré-uré, um winangun-Nama mengiité si Kristus Yesus Mahpiarata.

¹²Pahpaan ni kita nimaesamo karia ni Kristus wo kita ma'émano wia ni Sia, niitumo ni kita ém wéwéhano lalan i rumété wia si Opo Empung wo zéi'mo maindé' i rumété wia ni Sia.

¹³Niitumo, pahaléiengku wia ni kamu in tia' ni kamu zéi'mo siapa pahéré'an in timalingama ni aku nimazéha pahpaan mahwoka' u Nuwu' Lé'os tumoro si Yesus wia ni kamu. Pahpaan an zézéha pinendankumé itii é mangun ni kamu toro mahloo-looz karia ni Yesus Kristus.

¹⁴Niitumo, ni aku éng kimuruz karia nimongkot i mengaléi wia si Ama'.

¹⁵Ni Siamo si Ama'ta péléng im witi kasendukan wo wia ung kaayahan.

¹⁶Ni aku mengaléi wia si Opo Empung si wa'ilan wo pahloozen wo pahsigi'en i menté' un até niou karia ung kawasa ni Roh-Na.

¹⁷Pahpaan ni kamu ma'éman wia si Kristus, si Kristus é mento' witu un até niou wo u mahraa-raatéan é maéndo to'tolan wo kimawasa ung katou-touan niou.

¹⁸Ni aku mengaléi, wo ni kamu karia péléng né tou linenas ni Opo Empung toro makatulap ung kalempaz wo ung kalambo' wo ung karakék wo ung kararem u raraatéan ni Kristus.

¹⁹Wo ni kamu kasii toro mendan u raraatéan itii u limangkoi péléng ang kata'uan né tou. Ni aku mengaléi, wo ni kamu malekep wana péléng am péléng tanu si Opo Empung.

²⁰Karia ung kawasa-Na un uli-ulit mahpaayang witu un touta, si Opo Empung én toro mangun totoz lumakezpé'mé am pahaléienta wo ang ginenangta.

²¹U looz wo u sigi' né jamaat ém wia uman si Opo Empung mengiité si Kristus Yesus makaz im pahpuyunan wo makaz ing kauré-uré! Amin.