Read Tombulu Efesus 4 Bible Online

Efesus 4 - Tombulu bible

Efesus 4

¹Niitumo, ni aku, si binui pahpaan mahwangun a méiatu ni Mahpiara, mahaléi wia ni kamu, wo ni kamu in tou tinawahmo i ma'éman wia si Opo Empung é menou-noula mengiit ung kapaaz ni Opo Empung tanu in taré ma'émanla wia ni Sia.

² Irorosla un até niou, mahelu-eluzan umanla wo meze-ezen. Ipapailekla u raraatéan niou karia i mahsawa-sawangan.

³Mahtututu'la i menou-nou i mahesa-esaan pahpaan si Roh ni Opo Empung si nimangun ni kita nimaesaan wo menou-noula in zéi'kan siapa ikaarét.

⁴Ni kamu é nimaéndomo tanu esa awak, esa Roh wo esa pahéré'an i mangun um paaz ni Opo Empung i ni Sia timawah ni kamu.

⁵Si Mahpiara én esa uman, um pa'émanen én esa uman wo u sasarani én esa uman,

⁶wo si Opo Empung én esa uman si nimaéndo Ama' péléng né tou. Ni Siamo si Opo Empung péléng né tou, si mahpaayang wia péléng sé tou wo si mahkawasa wia péléng sé tou.

⁷Taan im wia ni kita si esa wo si esa é makailek ung kamang tatambér mengiit um paaz ni Kristus.

⁸ Niitumo, witu um Pinantik Lenas méipantik in téntii, I ni Sia nimawénéta mangé witi tampa totoz rakék, ni Sia nimahalima sé kakoro'-Na sé tinionan-Na, Wo ni Sia é méhé an tatambér wia sé tou.

⁹Niitumo i méikua “Ni Sia é nimawénétoma” ung kalakoana ni Sia kangkasii én timumpamoma witi tampa totoz lalem im wia ung kaayahan.

¹⁰Si Kristus si timumpamoma, ni Sia kangkasii si nimawénétoma witi tampa totoz rakék, rumakékpé'mé péléng am witi langit wo Sia merénta péléng am wia ung kaayahan.

¹¹Ni Siamo si timambér wia sé tou i makawawa maéndo aatu-Na, maéndo nabi, wéwéhan sé maéndo mahwoka' u Nuwu' Lé'os, sé maéndo tonaas i mahahkit wo mahtuzu' sé jamaat.

¹²Si Kristus timambér wia ni séra u makawawa i maayang wia sé tou linenas ni Opo Empung, wo séra makawawa i maayang wia si Opo Empung wo toro mahsawa-sawangan i mahenté' um pa'émanen néra in awak ni Kristus,

¹³akaz ni kita péléng nimaesaan pahpaan um pa'émanen wo ung kata'uanta un ulit tumoro si Oki' ni Opo Empung. Ni kita maéndo tou uli-ulit lutu'mo sé kauréna éng kalekepna masuat karia ni Kristus.

¹⁴Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

¹⁵Taan, karia i nimenté' in timion an tutuzu' ulit pahpaan i mahraa-raatéan, ni kita im wana am péléng kauréna éng kalekepna tanu si Kristus, ni Siamo si nimaéndo tanu un Ulu wia ni kita.

¹⁶ Sé jamaat én tanu un awak, ni Siamo si nimimek un awak akaz nimatu'tul wangun, wo un esa wo un esa ém pinasondol karia am wuku. Wo un esa wo un esa wéténgna un awak mahpaayang wangun mengiit um paayangenna, péléng un awak é matua'na wo malutu' wo maenté' pahpaan i mahraa-raatéan tanu ni kita in jamaat maenté' pahpaan i mahraa-raatéan.

¹⁷Pahpaano niitu, ni aku kumuama wo sumésama wia ni kamu karia ung kawasa ni Mahpiara: Tia'mo kamu menou-nou tanu sé tou zéi'kan mata'u si Opo Empung sé megena-genang uman an zéi'kan siapa torona.

¹⁸Ung genang néra é nimarimbengbengo, zéi'kan kata'uan néra kura menou-nou mengiit um paaz ni Opo Empung pahpaan ni séra én zéi'kan mata'u si Opo Empung wo pahpaan ung kaketéhan un até néra.

¹⁹Ni séra én zéi'mo siapa izangna, taka-takazan séra mahkiit uman u lelo un awak néra wo mahsamek mahkiit um paaz néra.

²⁰Taan, zéi'kan téntu um pinahtata'u niou tumoro si Kristus.

²¹Pahpaan ni kamu én timalingamo an tumoro ni Sia wo ni kamu i mahkii-kiit ni Sia én tinuzu'mo karia an tutuzu' ulit tumoro si Yesus Kristus.

²² Niitumo, tumoro ung katou-touan niou im puuna, ni kamu é léwo'zéi' in tumula'u ung katou-touan im puuna itii. Ung katou-touan itii é nimangun uman ni kamu méikaléwo' pahpaan méilulu u lelo léwo' un awak,

²³wo un até wo ung genang niou ém werun ni Roh Lenas.

²⁴ Menou-noula karia ung katou-touan weru u méikiit um paaz ni Opo Empung, ung katou-touan ulit wo linenas ni Opo Empung.

²⁵ Niitumo, tia'mo mahtowo taan mahkua umanla an ulit wia si esa wo si esa pahpaan ni kita péléng é masuat in esaané im witu un awak ni Kristus.

²⁶ Sa kamu maupi', tia'mo pahpaan un upi' niou itii mangun ni kamu sumingkéla'. Tia'mo mengupi-ngupi' makaz si endo i muntep,

²⁷wo tia' si tonaas né sétang wéwéhan témpo i mangun ni kamu sumingkéla'.

²⁸Si maremu', tia'mo sia meremu-remu'pé', taan tawimo sia ma'ulitla i mahpaayang wo mahpaayang uman am wangun wo sia toro sumawang sé tou zéi'kan wutul am pemandungen néra.

²⁹Tia'mo a nunuwu'en saparuni mahondolé im witu u sumahmu. Taan mahnuwu' umané am wangun i sumawang sé tou walina i ni séra memandung a sasawang, wo sé tou timalingama u méipahnuwu'muma é makailek ung kamang.

³⁰Tia'mo mahwangun un até ni Roh ni Opo Empung i rumara pahpaan si Roh ni Opo Empung si tumuzu'mé i ni kamu én anu ni Opo Empung makaz witu un endo kaakazan ung kaayahan i si Opo Empung méhé ung katou-touan makaz ing kauré-uré.

³¹Péléng a merara un até, a raranguan, an upi', a mengoro-ngoro' wo mahkua an zéi'kan ulit tumoro sé tou walina én zéi'enola im wia ni kamu, téntu kangkasii péléng a léwo'an én izou-zou' im wia ni kamu.

³² Taan mahtututu'la i mahwangun a lé'os si esa im wia sé walina, mahraa-raatéan wo mahampu-ampungan tanu si Opo Empung niméhé ampungan mengiit um winangun ni Kristus.