Read Tombulu Filipi 2 Bible Online

Filipi 2 - Tombulu bible

Filipi 2

¹Katuari-katuari, pahpaan im wia ni kamu sé nimaesamo karia ni Kristus ém wéwéhano ang kaenté'an, u maheenté'an un até pahpaan u raraatéan ni Kristus, kinawasamo ni Roh Lenas wo ni Sia mahahkit ni kamu taka-takazan ni kamu én esa genang si esa wo si esa wo mahraa-raatéan,

²niitumo, mahtututu'la i mangun ni aku mahpaa-paaz karia ang kenu: Ni kamu é menou-noula karia i mahlé'o-lé'osan, mahraa-raatéan si esa wo si esa, esa genang wo nimaesaan.

³Tia' menéro-néro uman um pemandungen in esa kaapa menéro-néro a lolooz an zéi'kan siapa torona. Tawimo in irorosla un tou niou wo pahgenangela i sé tou walinapé' sé ipahpuu-puuna taan un tou in esa.

⁴Wo si esa wo si esa én tia' uman mahgenang am pemandungenna in esa, taan pahgenangen kangkasiila am pemandungen né tou walina.

⁵Mahtututu'la wo ung genang niou én tanu ung genang ni Kristus Yesus.

⁶Ung katou-touan ni Yesus é masuat karia ung katou-touan ni Opo Empung, taan zozo' in téntu, zéi'kan pahgenangen-Nala ung katou-touan-Na un tanu niitu in anu-Na in esa u léwo'zéi' in tio-tionan-Na,

⁷taan péléng niitu é méitula'u-Namé a maéndo tou uman tanu si ata.

⁸Ni Sia in tou uman, méiroros-Na un tou-Na wo mahtali-talinga wia si Opo Empung makaz i nimaté, ni Sia é nimaté witi salip.

⁹Niitumo, ni Sia én totoz ipahraké-rakék ni Opo Empung, wo si Opo Empung niméhé u ngaran wia ni Sia u lumouspé'mé péléng a ngaran walina,

¹⁰ wo witu u ngaran ni Yesus, péléng sé witi langit wo sé wia ung kaayahan wo sé witu u lalem un tana', un tampa né nimatémo éng kumuruz i mahongkot wia ni Sia,

¹¹wo péléng sé tou é makaulit wo kumua, “Si Yesus Kristus é Mahpiara,” karia in téntu si Opo Empung si Ama' é maloozen wo masigi'en.

¹²Katuari-katuari ikararaatéku, ni kamu sekezé é mahtali-talinga wia si Opo Empung. Pahwangunela niitu zéi'kan uman i ni aku mahwali-wali karia niou taan kasii i ni aku zéi'kan mahwali-wali karia niou. Ung katou-touan niou ém wangunela tanu ung katou-touan né tou sé méipiloto ni Opo Empung im witu un ukuman wana a singkéla'. Pahwangunela niitu karia i mahtali-talinga wo mahsigi' si Opo Empung.

¹³Si Opo Empung si mahpaayang witu un até niou i mangun ni kamu ing kumiit wo maayang ang kapaaz-Na.

¹⁴Pahpaayangela péléng am péléng karia in zéi'kan menembu-nembut wo mahéndo-éndoan.

¹⁵Karia i mahwangun an téntu, ni kamu é mapailek i ni kamu én oki' ni Opo Empung sé zéi'kan siapa sinala' im wia sé tou léwo' wo méikalulu. Karia menou-nou im weresi wo zéi'kan siapa a sinala', ni kamu maéndo sena' wia ni séra, tanu u sena' né tototi'en i mahsena' wia ung kaayahan.

¹⁶Ni kamu én tumio-tion witu u Nuwu' ni Opo Empung u mahwéhémé ung katou-touan. Karia in téntu, im witu un endo si Yesus Kristus i mawurimé sumaup, ni aku én toro mahpaa-paaz. Ni aku én toro mahpaa-paaz pahpaan um pinaayangku wo um pahtututu'engku ém wéwéhan torona.

¹⁷Zozo' ni aku ém woo ukumen i maté wo un zaha'ku én isaroi witu um wawo né tatamun kineriz niou in iragés wia si Opo Empung, taan ni aku én zéi'kan mazéi' i mahpaa-paaz tumoro niitu wo ni aku kasii é mahpaa-paaz karia niou péléng.

¹⁸Téntu kangkasii ni kamu, mahpaa-paazla tanu niitu wo mahpaa-paazola kariaku.

¹⁹Mengalé-ngaléi uman si Yesus Mahpiara é méhémé lalan, wo ni aku rengan i matuma si Timotius i mangé wia ni kamu. Karia in téntu un atéku én toro maluasa in tumalingamé u sirita tumoro ni kamu.

²⁰Pahpaan zéi'mo siapa si kapaayangku si esa genang wo nimata'uano kariaku tanu si Timotius. Ni kai zua én totoz mahwéhé genang wana am wangun wo am wéwéhan torona wia ni kamu.

²¹Pahpaan sé tou walina é mahpenéro uman um pemandungen néra in esa, zéi'kan um pemandungen ni Kristus Yesus.

²²Taan ni kamu nimileko un ulitna si Timotius. Pahpaan ni sia é nimapaileko i ni sia én toro pa'émanen wo uli-ulit mahpaayang i mahsawang ni aku i mahwoka' u Nuwu' Lé'os tumoro si Yesus, tanumokan si koki' mahsawang si ama'na.

²³Ni sia si pahéré'engkula in iatukuma mawurima wia ni kamu witi Filipi, sa kinata'uangkumola u mamuali wia ni aku im wia'i. In toro niitumo un endo lé'osku i matuma ni sia mawurima wia ni kamu.

²⁴Taan totoz pa'émanengku i si Mahpiara é sumawang ni aku wo ni aku zéi'mo uré é mangémo wia ni kamu.

²⁵Si Epafroditus, si katuari esa pa'émanen, si méiatu nioué i mésumawang maayang kariaku im wana am pemandungengku, ni sia si pahgenangengkula wangun i mawurima sumaup wia ni kamu. Ni sia éng kapaayangku wo nimahtututu'momé i mahpaayang kariaku.

²⁶Pahpaan ni sia én totoz lumelo ni kamu péléng wo un aténa é nimasusa pahpaan ing kinata'uan niouoma i ni sia é saki, niitumo pahgenangengkula ni sia é léwo'zéi' in iwurikuma wia ni kamu.

²⁷Ni sia én ulit saki wo tawimo maté, taan si Opo Empung é rumaraaté ni sia. U raraatéan ni Opo Empung én zéi'kan uman wia ni sia taan kangkasii wia ni aku, wo un atéku zéi'kan tahlous rumara.

²⁸Niitumo kapaazku matuma ni sia i rewek mawurima sumaup wia ni kamu, wo sa kamu milekla ni sia, ni kamu én toro mahpaa-paaz wo ni aku kasii é maluasa.

²⁹Niitumo, sungkulela sia karia i mahpaa-paaz pahpaan ni sia éng katuari esa pa'émanen wo pahsigi'ela sé tou tanu ni sia.

³⁰Pahpaan ni sia ém woanokan a maté i mahpaayang wia si Kristus, wo ni sia én zéi'mo mahgenang un touna i mahwuwutul am pemandungengku an zéi'kan mata'u wangunen niou, pahpaan ni kamu én zou'ma im wia ni aku.