Read Tombulu Kolose 2 Bible Online

Kolose 2 - Tombulu bible

Kolose 2

¹Pahpaan kapaazku ni kamu mata'ula, i ni aku én totozo nima'ulit mahpaayang i sumawang ni kamu in jamaat witi Kolose wo sé witi Laodikia, wo wia péléng sé tou zéi'kampé' nimahile-ilekala kariaku.

²Ni aku nimangun un téntu wo un até néra én toro maenté' wo mahesa-esaan pahpaan i mahraa-raatéan. Karia in téntu, ni séra péléng én uli-ulit makatulap wo totoz mata'ula un im puuna zéi'kampé' méipapata'u ni Opo Empung. Un zéi'kampé' méipapata'u itii é si Kristus in esa.

³Mengiité si Kristus ni kita én toro mata'umé péléng ang katulapan wo ang kata'uan ni Opo Empung un im puuna é méikawunipé'.

⁴Niia é méipapata'ukuma, wo zéi'kan siapa im wia ni kamu si toro towoan né tou walina pahpaan a nuwu' eenou néra.

⁵Pahpaan zozo' ni aku zéi'kan mahwali-wali karia niou, taan genangenola i ni aku én tanumokan kimaria ni kamu zozo' ni aku én zou'mé im wia ni kamu. Ni aku kangkasii é mahpaa-paaz in timalingamé i ni kamu é mahesa-esaan wo um pa'émanen niou én enté' im wia si Kristus.

⁶Katuari-katuari, ni kamu é simungkulo si Kristus Yesus, si Mahpiarata. Niitumo ni kamu é léwo'zéi' i menou-nou nimaesa karia-Na.

⁷Um pa'émanen niou é léwo'zéi' in enté' tanu un ahmut ung kai in timeptep witu un tana', menou-nou mahkiit uman ni Sia. Um pa'émanen niou kangkasii é léwo'zéi' ing kaenté'na tanu u mémoituzu' wia ni kamu, wo ni kamu kangkasii én tia' mazéi' i mahkua u makasé.

⁸Mile-ilek, én taa wéwéhan sé maheenou ni kamu karia an tutuzu' néra an zéi'kan siapa torona wo mahlululu uman um pa'émanen niou um wia si Kristus. An tutuzu' néra én zéi'kan mahkiit an tutuzu' ni Kristus, taan mahkiit uman ang kinanaram né nimaopo néra im puuna wo ung kapaaz né roh wia ung kaayahan.

⁹Pahpaan péléng am wia si Opo Empung ém wiamo si Kristus, i ni Sia nimaéndo tou uman.

¹⁰Wo pahpaan i nimaesamo karia ni Kristus, ni kamu ém winéhan ung katou-touan nimawutul. Ni Siamo si tonaas péleng né roh sé mahpeperénta wo sé mahkakawasa.

¹¹Pahpaan nimaesamo karia ni Kristus, ni kamu é sinunat.[1] U sunat itii én zéi'kan u sunat um pahwangunen uman né tou, taan u sunat um pahwangunen ni Kristus, u nimangun ni kamu méipiloté im witu ung kawasa u lelo un awak u mahwangun ni kamu i mahsingkéla'.

¹²Pahpaan i ni kamu sinarani, a singkéla' niou én tanu mémoileweng karia ni Kristus; wo karia i sinarani kangkasii ni kamu é mémoitoumé sumaup wo nimakailek ung katou-touan weru mahwali-wali karia ni Kristus, pahpaan ni kamu é ma'éman ung kawasa ni Opo Empung si timoumé sumaup si Kristus im wia sé nimaté.

¹³Ni kamu kangkasii, im puuna in zéi'kampé' ma'éman én tanu nimatémo pahpaan a siningkéla' wo pahpaan zéi'kan sinunat witu un awak, taan in tarékan ni kamu é méitoumomé sumaup ni Opo Empung karia ni Kristus, kumawusa si Opo Empung i niméhéla ampungan wana a singkéla'ta,

¹⁴wo ziméi'la an utang mémoikapantik a léwo'zéi' im waérenta, a mahindé' wo mukum ni kita pahpaan zéi'kan kawawaanta i maér. Si Opo Empung ziméi'la an utangta i nimakula um pinantikan an utangta itii witu u salip.

¹⁵Karia si Kristus nimaté i sinalip, si Opo Empung éng kimala péléng sé roh léwo' sé mahpeperénta wo sé mahkakawasa, wo nimangun ni séra méipapaiza-izang witu u sinaru né tou lakez pahpaan ni Sia é nimuntungo im wia ni séra.

¹⁶Niitumo, tia' ipahwaya niou sé tou walina i mapahsasala' ni kamu tumoro um pahkanen wo um pahelepen niou, kaapa tumoro an endo wangko' pahlé'osen né tou Yahudi sekez in ta'un, kaapa am pahlé'osen sekez i loloho'en weru, kaapa kangkasii tumoro un endo Sabat né tou Yahudi,

¹⁷péléng niitu én tumuzu' umané a mamuali in tumondong, taan un ulitna péléng niitu é mémoikatuzu'mé wia si Kristus.

¹⁸Tia' ipahwaya niou ung kukulu makailekan niou in zéi'en umana né tou sé mahtowo-towo i meroros un tou néra wo mahongkot wia sé malaekat. Ni séra é mapahlolooz un tou néra im wana am pina'ilek néra un tanu im pahipi-ipin, zozo' niitu én zéi'kan uli-ulit téntu. Ni séra é mahlolooz un tou néra karia am pegena-genangen néra u mahkiit uman ung kapaaz ung kaayahan.

¹⁹Ni séra kangkasii én zéi'mo mahkiit un tutuzu' ni Kristus si tanu ulu im witu un awak, wo un awak é sé tou-Na. Am witu un awak itii ém pahtu'tul-Na wo péléng nimaesa, tanu sé tou-Na in zéi'kan mata'u matampasan. Karia in téntu, kuramo un awak mahtu'amé mengiit ung kapaaz ni Opo Empung, téntumo um pa'émanen niou im wia si Opo Empung éng kaenté'na.

²⁰Ni kamu én tanu nimatémo karia ni Kristus, wo mémoipiloté im witu ung kawasa né roh léwo' wia ung kaayahan, kaa kamu kinawasapé' a léwo'an wia ung kaayahan? Kaa kamu menou-nou mahkiitpé' an tinotoz né wia ung kaayahan, in téntii:

²¹“Tia' mahtion ung kenu”, “Tia' mahpé'an ung kenuma”, “Tia' mahsahiz ung kenu?”

²²Péléng an tinotoz itii én tumoro uman a maléwo' im pahpakén wo mahkiit uman am perénta wo an tutuzu' né tou.

²³Zozo' am pakahragés néra ém pahileken winangun karia ang katulapan néra in esa, tanu u meroros un tou wo mapazéha un awak in esa, taan péléng niitu én zéi'kan siapa torona, akaz uman i mahwuwutul u lelo un awak.