Read Tombulu 1 Tesalonika 2 Bible Online

1 Tesalonika 2 - Tombulu bible

1 Tesalonika 2

¹Katuari-katuari! Kata'uan niouo, i ni kai niméyéma wia ni kamu ém wéwéhan torona.

² Kata'uan niouo kasii, puunala kai i niméyé wia an Tesalonika, ni kai é zinézéhamé wo pinahséro'ané im witi Filipi. Taan zozo' lakez sé tou mahsaru ni kai, si Opo Empungta é simawang ni kai akaz ni kai zéi'kan maindé' i mahwoka' u Nuwu' Lé'os-Na im wia ni kamu.

³Ni kai i mahsésama én zéi'kan i mahlululu ni kamu, zéi'kan karia ang genang léwo' wo kasii zéi'kan in tumowo wia sé kasuat tou.

⁴Taan si Opo Empung niméhé um paayangen wia ni kai i mahwoka' u Nuwu' Lé'os tumoro si Yesus, pahpaan pahgenangen-Nala i ni kai ém wangun i maayang niitu. Niitumo ni kai i mahnuwu'ma én zéi'kan i mangun un até né tou mahpaa-paaz, taan i mangun un até ni Opo Empung mahpaa-paaz. Ni Sia si mahtata'u un até nai.

⁵Pahpaan kata'uan niou i ni kai én zéi'kan kawisa i mahenou ni kamu karia a nunuwu'en tariis uman im pahtalingan wo zéi'kan kawisa i mahtuzu' ni kamu i menéro ung kauntungan karia i mahwuni-wuni. Si Opo Empung si mata'u péléng niitu.

⁶Ni kai kasii én zéi'kan kawisa i menéro u lolooz né tou, im wia ni kamu kaapa im wia sé tou walina. Un ulitna, in aatu ni Yesus Kristus, ni kai én toro mahaléi apa uman wia ni kamu, taan ni kai é soo un téntu.

⁷Ni kai én totoz lé'os wo rumaraaté ni kamu i memali-mali karia niou, masuat wo si ina' i mahurus wo mahtéiz sé oki'na.

⁸Ni kai é rumaraaté ni kamu, niitumo ni kai én zéi'kan uman paaz i mahwoka' u Nuwu' Lé'os ni Opo Empung wia ni kamu, taan ung katou-touan nai kangkasii én iwéhé nai wia ni kamu pahpaan ni kamu én totoz ikararaaté nai.

⁹Katuari-katuari, kagenangan nioupé'la kura kai in totoz mahtututu' wo ma'ulit i mahpaayang. Endo wo wengi ni kai mahpaayang i mahwuwutul am pemandungen nai. Karia in téntu, ni kai én zéi'kan maéndo pengalin niou i mahtuzu' u Nuwu' Lé'os ni Opo Empung wia ni kamu.

¹⁰Ni kamu, téntu kangkasii si Opo Empung é mata'u i ni kai é menou-nou karia un até weresi, zéi'kan mahsanaweka wo zéi'kan penuwu-nuwu'en né tou i menou-nou mahwali-wali karia niou, sé ma'émano.

¹¹Kata'uan niou um pahwangunen nai wia ni kamu é masuat wo um pahwangunen ni ama' im wia sé oki'na. Ni kai é mahsésa wo mahenté' an até niou si esa wo si esa

¹²wo totoz mahaléi wia ni kamu i menou-nou mengiit um paaz ni Opo Empung. Ni Siamo si Opo Empung si timawah ni kamu i muntep witu ung Kakolanoan-Na wo witu ung kawangko'an-Na.

¹³Wéwéhan kasii u nimangun ni kai zéi'kan kumana' i mahkua u makasé wia si Opo Empung, pahpaan i ni kai mahwoka'mé u Nuwu' ni Opo Empung wia ni kamu, ni kamu é simungkul u Nuwu' itii zéi'kan tanu u nuwu' um wia si tou a méyé, taan u Nuwu' um wia si Opo Empung a méyé. U Nuwu' itii én uli-ulit wia si Opo Empung a méyé, ung karegas i mahpaayang wia ni kamu in tou ma'éman.

¹⁴ Katuari-katuari! Am pinendan nioué ém pinendano kangkasiimé né jamaat ni Opo Empung witi Yudea sé nimaéndo anu ni Kristus Yesus. Ni kamu pinahzézéhamé né kawanua nioukan tanu am pinendané né jamaat ni Opo Empung witi Yudea im pinahzézéhamé né tou Yahudi.

¹⁵ Sé tou Yahudi itii sé nimunu'mo si Yesus Mahpiara wo sé nabi wo zimézéhamo ni kai. Ni séra én zéi'kan pandung um paaz ni Opo Empung wo péléng sé tou éng kakoro' néra.

¹⁶Ni kai ém pahapé-apé'an néra i mahwoka' u Nuwu' ni Opo Empung u milot sé tou zéi'kan Yahudi im witu un ukuman wana a singkéla'. Karia in téntu sé tou Yahudi é mengawe-ngawes a singkéla' néra makaz i malekep[1] wo in tarékan un upi' ni Opo Empung én timoromo ni séra.

¹⁷Katuari-katuari, ni kai é nimatampasané karia niou zozo' in zéi'kan mauréma. Zozo' ni kamu zéi'kan pahilekengkuma pahpaan nimazou'an taan un atéta én zéi'kan nimazou'an. Ni kai én totoz lumelo ni kamu taka-takazan ni kai uli-ulit nimahtututu'mola i mahilekan karia niou.

¹⁸Ni kai én totozo paaz i mangé wia ni kamu. Ni aku in esa Paulus ém woo makapiramo i mahaangémé wia ni kamu, taan pahraungen umanla ni tonaas né sétang akaz ni kai zéi'kampé' méikaangémé wia ni kamu.

¹⁹Pahpaan sa zéi'kan ni kamu, séipé' taré sé pahéré'an nai wo mangun ni kai mahpaa-paaz wo ipahloo-looz nai witu u sinaru ni Yesus, si Mahpiarata, i ni Sia méyé sumaup?

²⁰Totoz ulit, ni kamumo sé ipahloo-looz nai wo mahwangun ni kai i mahpaa-paaz.