Read Tombulu 1 Tesalonika 3 Bible Online

1 Tesalonika 3 - Tombulu bible

1 Tesalonika 3

¹ U lelo nai wia ni kamu én zéi'mo kaezenan. Niitumo ni aku wo si Silas én timotozla i mamento' witi Atena.

²An iatu naima si Timotius i mangé wia ni kamu. Ni sia éng katuarita esa pa'émanen wo kapaayang nai i mahpaayang wia si Opo Empung i mahwoka' u Nuwu' Lé'os tumoro si Kristus. Ni sia méiatu naima i mamenté' un até niou wo sumésa wia ni kamu, wo kaenté'na um pa'émanen niou.

³Karia in téntu, ni kamu én zéi'kan mazéi' i ma'éman wia si Yesus zozo' in zézéha. Ni kamu in esa é mata'umo sa sé tou ma'éman wia si Yesus én tinotozo i mengali an zézéha itii.

⁴Pahpaan, i ni kai memali-malipé' karia niou, mémoipahkua naila wia ni kamu, i ni kita é mazézéha. In tarékan, tanu ung kata'uan niouo i niitu én uli-ulit nimamualimo.

⁵Pahpaano niitu, ni aku nimatuma si Timotius i mangé wia ni kamu, pahpaan ni aku én zéi'mo makaezen i mahtata'u um pa'émanen niou. Kaarétku én taa kamu nienouola ni tonaas né sétang makaz ni kamu zéi'mo ma'éman wia si Yesus. Sa mamuali téntu, am pinaayang nai im puuna én zéi'kan siapa torona.

⁶ In tarékan si Timotius é nimawurimomé im witi Tesalonika, ni sia é simirita u sirita makapaazen tumoro ni kamu u nimangun ni kai i mahpaa-paaz. Méikuana tumoro um pa'émanen niou wo u mahraa-raatéan niou. Méikuana kasii, sekez ni kamu ikagenangla ni kai, ni kamu é mahpaa-paaz wo paaz i mahilekan sumaup karia nai, tanu ni kai kangkasii ém paaz i mahilekan karia niou.

⁷Niitumo katuari-katuari, zozo' ni kai ém wana ang kasusaan wo pahzézéhan né tou, taan ni kai é mahpaa-paaz pahpaan timalingala i ni kamu én zéi'kan mazéi' i ma'éman wia si Yesus.

⁸In tarékan, kata'u-ta'uan nai ung katou-touan nai én uli-ulit wéwéhan torona, pahpaan um pa'émanen niou én enté' i nimaesa karia ni Mahpiara.

⁹Apapé' un ikua naima wia si Opo Empung ing kumua u makasé wia ni Sia pahpaan péléng u mahpaa-paaz, um pahpendanen nai tumoro ni kamu witu u sinaru-Na?

¹⁰Endo wengi ni kai é ma'ulit i mengaléi wo kai toro mahilekan sumaup karia niou wo toro tumuzu' wia ni kamu i lumekep an zéi'kampé' lekep witu um pa'émanen niou.

¹¹Mengalé-ngaléi uman si Opo Empung si Ama'ta wo si Yesus Mahpiarata é méhémé lalan, wo kai toro mahilekan sumaup karia niou.

¹²Mengalé-ngaléi uman si Mahpiara é mangun ni kamu kalousna i mahraa-raatéan wo kasii kalousna i rumaraaté sé tou walina, tanu u raraatéan nai wia ni kamu.

¹³Mengalé-ngaléi uman, si Opo Empung Ama'ta é menté' un até niou, wo ni kamu zéi'kan siapa pahséro'an wo lenas im witu u sinaru-Na, i si Yesus si Mahpiarata mémahwali-wali karia péléng sé tou linenas-Na.