Read Tombulu 1 Tesalonika 5 Bible Online

1 Tesalonika 5 - Tombulu bible

1 Tesalonika 5

¹Katuari-katuari, zéi'kan totoz ipantik naima wia ni kamu sawisa un orasna si Yesus Mahpiara i méyé sumaup.

² Pahpaan uli-ulit kata'uan niou, ni Sia i méyé sumaup én tanu si maremu' méyé im wengi.

³Wéwéhan un orasna sé tou ing kumua in téntii, ‘Ung katou-touanta én ena' wo zéi'kan siapa ikaindé'.’ Taan kumompo'mé ni séra é mendan u meléwo' tanumokan si wéwéné mahawa-awak, si kumompo'mé é mahpendano u rumara in tumoumo si oki'na. Zozo' in esa zéi'kan siapa si tinalez.

⁴Taan ni kamu, katuari-katuari, ni kamu én zéi'kan menou-nou witu ung karimbengbengan, taka-takazan i méyé un endo itii, ni kamu én zéi'kan mengompo' tanu si tou rinemu'an,

⁵pahpaan ni kamu péléng é menou-nou witu un ayah wo menou-nou in endo. Ni kita én zéi'kan menou-nou im wengi kaapa menou-nou witu ung karimbengbengan.

⁶Pahpaano niitu, ni kita én zéi'kan toro meneke-nekel uman tanu sé tou walina. Ni kita én totoz i mile-ilek wo tuméga-tégam.

⁷Pahpaan sé timekel én timekel im wengi wo sé tewelen én tewelen im wengi.

⁸ Taan ni kita sé menou-nou in endo é léwo'zéi' tuméga-tégam. Wangunela um pa'émanenta wia si Yesus wo u raraatéanta wia sé katuari esa pa'émanen maéndo tanu ung karai uaséi ing kimelung um wezwezta wo um pahéré'anta i ni kita én ipilot im witu un ukuman wana a singkéla', maéndo tanu um porong ing kumelung un ulu.

⁹Ni kita pinéléng ni Opo Empung én zéi'kan in ukumen, taan in ipilot im witu un ukuman wana a singkéla' mengiité si Yesus Kristus Mahpiarata.

¹⁰Si Yesus nimatémo pahpaan ni kita, wo zozo' ni kita nimatémo kaapa menou-noupé', ni kita én toro menou-nou karia-Na.

¹¹Pahpaano niitu, ni kamu si esa wo sé walina é léwo'zéi' mahsésésaala wo maheenté'ala un até, tanu am pahwangunen niou makaz in tarékan.

¹²Katuari-katuari, pahaléien nai wia ni kamu, wo ni kamu mahsigi'la sé tou sé nimahtututu'mola mahpaayang im wia ni kamu. Ni séra mahahkit wo mahsésa wia ni kamu, wo menou-nou nimaesa karia ni Mahpiara.

¹³Uli-ulit im pahsigi'ela wo iraraatéla séra pahpaan am pinaayang néra i mahsawang ni kamu. Menou-noula karia i mahlé'o-lé'osan si esa wo sé walina.

¹⁴Katuari-katuari, pahaléien nai kasii wia ni kamu im pahnuwu'ala lé'os sé tou soo maayang, enté'ela un até né tou maindé', pahsawangala sé tou wangun i sawangan wo mezenla im wia péléng sé tou.

¹⁵Ile-ileken én taa wéwéhan sé tou mahwaér a léwo'an karia a léwo'an, taan mahtututu'la i mahwangun a lé'os si esa wo sé walina wo wia péléng sé tou.

¹⁶Tia' kamu mazéi' i mahpaa-paaz.

¹⁷Tia' mazéi' i mahmengaléi.

¹⁸Mahkuala u makasé wia si Opo Empung im wana am péléng, pahpaan niitumo ung kapaaz-Na wia ni kamu in tou sé menou-nou nimaesa karia ni Kristus Yesus.

¹⁹Tia' pahapé-apé'an niou um pahpaayangen ni Roh ni Opo Empung.

²⁰Tia' iperoros niou a méikua ni Opo Empung mengiité sé nabi.

²¹Péléng am péleng én totoz im pahtata'ula, wo pahkiitela am wangun.

²²Zumou'la im wana péléng a léwo'an.

²³Mengalé-ngaléi uman si Opo Empung méhémé ung kaluasan witu un até wo mangun péléng un tou niou malenas. Mengalé-ngaléi uman kasii si Opo Empung é mahtéiz si roh, ung genang wo un awak niou, wo kamu lekep wo zéi'kan siapa u sinala' i si Yesus Kristus, Mahpiarata méyé sumaup.

²⁴Si Opo Empung si timawahmo ni kamu é mangun péléng niitu pahpaan ni Sia én zéi'kan maliuz im wana a méitaaz-Na.

²⁵Katuari-katuari, ipengaléipé'mé kai.

²⁶Ipapaayopé'la u sigi' nai wia péléng sé katuari esa pa'émanen karia i mahayoan lengen.[2]

²⁷Totoz im pahaléiengku wia ni kamu karia ung kawasa ni Mahpiara, wo um pinantik kenu én ibacama wia péléng sé katuari esa pa'émanen.

²⁸Mengalé-ngaléi uman ung kamang tatambér ni Yesus Kristus, Mahpiarata é menaté-natér ni kamu.