Read Tombulu 2 Tesalonika 2 Bible Online

2 Tesalonika 2 - Tombulu bible

2 Tesalonika 2

¹ Katuari-katuari, tumoro kura si Yesus Kristus Mahpiarata i méyé sumaup wo kura kasii Sia i ruméwok ni kita i mahwali-wali karia-Na én téntii um pahaléien nai wia ni kamu:

²Tia' kamu rewek malinganga wo paharétan in tumalingala sé tou i mahkua un endo si Yesus i méyé sumaup é méikaayomola, zozo' u nuwu' itii ém woo méipapata'umé ni Roh Lenas, kaapa niitu én tutuzu' uman, kaapa wéwéhan sé mahkua niitu é méipantik witu un esaané im wana am pinantik nai.

³Zozo' ing kura, tia' kamu towoan umanla né tou! Pahpaan puunala un endo i si Yesus méyé sumaup, ang kenu a léwo'zéi' i mamualipé'la: Lakez sé tou tumamburi im wia si Opo Empung wo si tou totoz léwo' é mapailek un touna wo ni sia én tinotozo i léwo'en.

⁴ Ni sia é masumaru si Opo Empung wo mahlooz un touna rumakékpé'mé sé pahsigi-sigi'en kaapa sé pahongko-ongkotan né tou in Opo Empung néra. Lumousé niitu, ni sia é marumumez witi untep um Walé ni Opo Empung wo mapakua witu u saru-sarun né tou i ni sia én Opo Empung.

⁵Kinaliuzan niouola itu wé, i ni aku memali-malipé' karia niou, niitu péléng é méipengua-nguakumo wia ni kamu?

⁶In tarékan éng kata'uan niouo apa u nimokal si tou totoz léwo' itii. Niitumo, ni sia é mapailek un touna witumokan un oras tinotoz ni Opo Empung.

⁷Si tou totoz léwo' itii é mahpaayango karia i mahwuni-wuni, taan wéwéhampé' u nimokal ni sia. Taan sa u nimokal ni sia niéndomoma,

⁸ in toro niitumokan taré si tou totoz léwo' itii mapailek un touna. Taan i si Yesus Mahpiara méyé sumaup, ni Sia é sumengo umana si tou totoz léwo' itii i munu' ni sia wo karia ung kawangko'an ung kawasa-Na, ni Sia é luméwo' si tou totoz léwo' itii.

⁹ Si tou totoz léwo' itii i méyé ém pahpaan um pinaayang ni tonaas né sétang. Ni sia é mangun a mahwangun sé tou mahkusingsing, an zéi'kan kakuaan wo a makakompo'en towo.

¹⁰Si tou léwo' itii é maké a léwo' in tumowo wia sé tou maléwo'en. Ni séra é maléwo'en pahpaan soo tumalinga un tutuzu' ulit tumoro si Yesus un toro milot ni séra im witu un ukuman wana a singkéla'.

¹¹Niitumo si Opo Empung niméhémé ung kawasa u nimangun ni séra ikalulu, taka-takazan ni séra é ma'éman an zéi'kan ulit.

¹²Si Opo Empung nimangun niitu, wo péléng sé tou sé zéi'kan ma'éman an tutuzu' ulit tumoro si Yesus wo paaz a léwo'an én ukumen.

¹³Katuari-katuari ikararaaté ni Opo Empung! Ni kai sekezé é léwo'zéi' ing kumua u makasé wia si Opo Empung pahpaan ni kamu. Pahpaan rengan im puuna ni kamu ém pinéléng-Namo in ipilot im witu un ukuman wana a singkéla', mengiité um pinaayang ni Roh-Na si nimangun ni kamu lenas wo mengiité um pa'émanen niou wana an tutuzu' ulit am wia ni Sia a méyé.

¹⁴Pahpaano niitu, si Opo Empung én timawahmo ni kamu mengiité u Nuwu' Lé'os tumoro si Yesus u mémoipahwoka' nai wia ni kamu, wo ni kamu toro makailek u sigi' wo looz ni Yesus Kristus, si Mahpiarata.

¹⁵Niitumo katuari-katuari, menté-enté'la i rimendai wo tionala lé'os an tutuzu' mémoituzu' nai wia ni kamu, a méikua nai kaapa wana a méipantik nai.

¹⁶Mengalé-ngaléi uman si Yesus Kristus Mahpiarata wo si Opo Empung Ama'ta, si rimaraatémola ni kita wo nimenté'mola un atéta makaz ing kauré-uré wo nimangunola ni kita ezen i ma'ento' am wangun mengiité ung kamang tatambér-Na,

¹⁷menté' un até niou wo mangun ni kamu makawawa im wana péléng am paayangen wo wana a nunuwu'en wangun.