Read Tombulu 2 Tesalonika 3 Bible Online

2 Tesalonika 3 - Tombulu bible

2 Tesalonika 3

¹Ing kamurian katuari-katuari, pahaléien nai wia ni kamu im pahpengaléila kai. Ipengaléi nioula, wo u Nuwu' ni Mahpiara rewek ikawoka'ma wo sungkulen karia i mahpaa-paaz wo pahsigi'en, tanu u nimamualimo wia ni kamu.

²Ipengaléi kasiila wo kai ikapiloté im wia sé tou mahkayo' wo sé tou léwo', pahpaan zéi'kan péléng sé tou é ma'éman u Nuwu' ni Mahpiara itii.

³Taan si Mahpiara én zéi'kan maliuz wana a méitaaz-Na. Ni Sia é menté' an até niou wo kumelung ni kamu im wia si léwo'.

⁴Totoz pa'émanen nai wia si Mahpiara un tumoro ni kamu, i ni kamu é mahwangun a méipahtuzu' nai wo zéi'kan mazéi' i mahwangun a méituzu' nai itii.

⁵Mengalé-ngaléi uman ni kamu ém penawa-nawangané ni Mahpiara, wo ni kamu kalousna ma'éman i si Opo Empung é rumaraaté ni kamu, wo ni kamu ezen i ma'éman tanu ung kaezenan ni Kristus im pahzézéhan.

⁶Katuari-katuari, pahaléien nai wia ni kamu witu ung ngaran ni Yesus Kristus Mahpiara, wo ni kamu zumou'mé im wia sé katuari esa pa'émanen sé soo maayang wo zéi'kan mahkiit an tutuzu' méipahtuzu' naimo wia ni kamu.

⁷Pahpaan kata'uan niouo i ni kamu é léwo'zéi' mahkéréla witu ung katou-touan nai. I memali-malipé' karia niou, ni kai én zéi'kan kawisa soo maayang.

⁸Ni kai kasii én zéi'kan kawisa kimanla an tikohon anu né tou walina wo zéi'kan winaér. Taan ni kai én totoz mahtututu' i mahpaayang endo wengi, wo ni kai zéi'kan maéndo pengalin im wia ni kamu.

⁹Ni kai mahwangun an téntu zéi'kan pahpaan ni kai én zéi'kan siapa u léwo'zéi' ing kailekan naimé im wia ni kamu, taan ni kai mahtututu' i mahpaayang, wo toro maéndo kékéréan niou.

¹⁰Im puuna i ni kai memali-malipé' karia niou, ni kai é niméhémoma um perénta wia ni kamu: Sa si tou soo maayang, ni sia én zéi'kan toro kuman.

¹¹Ni kai mahkua téntu pahpaan tinalinga naila sa im wia ni kamu ém wéwéhan sé tou soo maayang wo soo mawendu. Ni séra ém paaz uman mahsembo-sembor wana ang katou-touan né tou walina.

¹²Wia sé tou tanu ni séra, ni kai é mapagenanga wo sumésama karia ung kawasa ni Yesus Kristus Mahpiara, wo séra menou-nou karia im wangun wo maayangla i makailek an tikohon.

¹³Wo ni kamu katuari-katuari, tia' maseso' i mahwangun a lé'os.

¹⁴Sa wéwéhan tou soo kumiit a méipantik nai witu um pinantik kenu, na'uala si tou itii wo tia' mahkari-karia ni sia wo sia maizangla.

¹⁵Taan, ni sia én tia' pahgenangen nioula ing kakoro'. Tawimo sia pahsésaan nioula ing katuarita esa pa'émanen.

¹⁶Si Opo Empung si mahwéhémé ung kaluasan witu un até é meméhé-méhémé ung kaluasan witu un até niou im wana am péléng. Mengalé-ngaléi uman ni Sia sekezé é menaté-natér ni kamu péléng.

¹⁷U sigi'ku, Paulus. Ni aku in esa si nimantik ang kenu. Im wana péléng am pinantikku, ung kenumo un tumuzu'mé i niia ém pinantik karia u lengenku in esa.

¹⁸Ung kamang tatambér ni Yesus Kristus Mahpiarata, menaté-natér ni kamu péléng.