Read Tombulu 1 Timutius 4 Bible Online

1 Timutius 4 - Tombulu bible

1 Timutius 4

¹Si Roh Lenas én uli-ulit kimua, im wana an endo in tumondong ém wéwéhan sé tou matumamburi witu um pa'émanen wo kumua in zéi'kan mata'u si Yesus. Ni séra é mahtali-talinga sé roh mahlululu uman ni séra wo mahkiit uman an tutuzu' né sétang,

²an ipahkuamé mengiité sé tou léwo' sé mahtowo i lé'os karia an towo néra. Ung genang lé'os néra én zéi'mo mata'u wisa un ulit wo wisa u simala'.

³Ni séra é mahséro' sé tou in zéi'kan toro kumawéng, wo wéwéhan kasii ang kakanen sinéro' néra im pahkanen. Taan un ulitna péléng ang kakanen ém winangunomé ni Opo Empung in toro kanen. Sa sé tou ma'éman wia si Yesus wo mata'umo an tutuzu' ulit ni Opo Empung kuman niitu, un ipahpuu-puuna éng kumuapé'la u makasé wia si Opo Empung taré séra kuman ang kakanen itii.

⁴Pahpaan péléng am winangun ni Opo Empung ém wangun. Péléng am winangun-Na itii én zéi'kan siapa a sinéro' ing kanen, sa niana kinailekanta karia ing kimua u makasé wia si Opo Empung.

⁵Pahpaan péléng niana ém wineresi karia u Nuwu' ni Opo Empung wo karia am pengaléien.

⁶Timotius, niitu péléng én totoz in ipahtuzu'mula wia sé katuari esa pa'émanen, wo séra zéi'kan kumiit an tutuzu' zéi'kan ulit. Karia in téntu, ni ko é maéndo memamaayang ni Kristus Yesus si lé'os uman. Sa ko mangunla un téntu, um pa'émanennu éng kaenté'na pahpaan rengan im puuna é mahkiit an tutuzu' ulit.

⁷Tia'mo mahrété wia sé tou sé meninirita a sirita mahlululu uman wo zéi'kan siapa torona. Taan naramela un toumu i menou-nou mahragés wia si Opo Empung.

⁸I mahnanaram un awak wo enté' ém wéwéhan un torona taan toyo' uman. Taan i mahnanaram un tou i mahragés wia si Opo Empung ém wéwéhan torona im wana am péléng, pahpaan niitu é mahalimé ung kamang witu ung katou-touan in tarékan wo in tumondong.

⁹Péléng a méikuama itii én ulit wo wangun im pahkiiten.

¹⁰Pahpaano niitu ni kita mahtututu' wo ma'ulit i mahpaayang, pahpaan ni kita niméré' uman wia si Opo Empung si Menou-nou, si nimilot péléng sé tou im witu un ukuman wana a singkéla', sé pahpuu-puuna é sé tou ma'éman wia ni Sia.

¹¹Péléng niana én ipahwoka'la wo ipahtuzu'mula wia sé tou.

¹²Tia' wo wéwéhan sé tou mahgenangla i ni ko én tou roros pahpaan ni ko ém weru tou. Mahtututu'la i maéndo kékéréan wangun né tou ma'éman wia si Opo Empung, wana an ipahkuamu, wana am pemangu-mangunennu, wana a raraatéannu, witu um pa'émanennu wo witu ung katou-touannu un zéi'kan penéro-néro'an né tou.

¹³Karegas ko ma'ento' ni aku i méyé, ni ko é léwo'zéi' sekezé é mahbacama um Pinantik Lenas wia sé tou ma'éman witu i mahsésa wo mahtuzu' ni séra.

¹⁴Tia' kaliu-liuzannu i maké an tatambér méiwéhémo ni Roh Lenas wia ni ko mengiité u méikua ni Opo Empung wia sé penatua, i ni séra zimeta'ma a lengen néra wia ni ko.

¹⁵Wéhanla genang niana péléng, péléng am paayangen itii ém pa'ulitela im pahpaayangen wo um pa'émanennu ung kaenté'na ém pahilekené né tou.

¹⁶Ime-imeken ung katou-touannu wo an tutuzu'mu. Tia' ko mazéi' i mahwangun niana péléng, pahpaan karia in téntu ni ko toro tumulung un toumu wo péléng sé tou mahtalinga an tutuzu'mu, im witu un ukuman ni Opo Empung.