Read Tombulu 2 Timutius 1 Bible Online

2 Timutius 1 - Tombulu bible

2 Timutius 1

¹Um pinantik kenu ém wia ni aku Paulus a mangé, si witu um paaz ni Opo Empung tinawah i maéndo aatu ni Kristus Yesus i mahwoka' un taaz-Na, i sé tou ma'éman si Kristus Yesus é mamenou-nou makaz ing kauré-uré.

²Um pinantik kenu én iwéhé wia si Timotius, si tanumokan oki'ku ikararaatéku. Mengalé-ngaléi uman ung kamang tatambér, u raraatéan wo ung kaluasan witu un até, um wia si Opo Empung si Ama' wo si Kristus Yesus Mahpiarata é menaté-natér ni ko.

³Ni aku éng kumua makasé wia si Opo Empung si pahpaayangangku karia ung genang weresi, tanu um pinahwanguné né nimaopoku. Sekez ni aku mengaléi in endo kaapa im wengi, ni ko ém pegena-genangengku.

⁴Sa aku ikagenanga u lué'mu i ni kita matampasano, ni aku é malelo i mahilekan sumaup kariamu wo u mahpaa-paazku malekepa.

⁵ Kagenangangkula i ni ko én uli-ulit ma'éman wia si Kristus tanu um pa'émanen ing kataré-taré ni nénému Lois wo ni ina'mu Eunike. Wo totoz kata'uangku sa um pa'émanennu én tanu um pa'émanen néra.

⁶Pahpaano niitu, ni aku é mapagenanga wia ni ko im wuaya-wuayan un tatambér ni Opo Empung um wiamo ni ko, ung kinailekannu i ni aku zimeta'la u lengenku wia ni ko.

⁷Pahpaan si Opo Empung én zéi'kan niméhémé wia ni kita si roh iindé'en, taan si roh si mahwangun ni kita in enté', rumaraaté si kasuat tou wo toro mahime-imek un tou.

⁸Niitumo, tia'mo maizang i mahkua an tinalinga wo niilekmu tumoro si Mahpiarata. Téntu kangkasii, tia'mo maizang tumoro ni aku im binui pahpaan ni Sia. Taantaré, karia ung ketez méiwéhémé ni Opo Empung, ni ko kangkasii é mazézéhala pahpaan mahkua u Nuwu' Lé'os tumoro ni Sia.

⁹Ni Siamo si nimilot ni kita im witu un ukuman wana a singkéla' wo timawah ni kita menou-nou in tou linenas-Na, zéi'kan mengiit am pahwangunenta, taan mengiit ung ginenang-Na wo ung kamang méitambér-Na, u mémoiwéhé wia ni kita mengiité si Kristus Yesus puunala ung kaayahan kenu im winangun.

¹⁰In tarékan si Opo Empung nimapailekomé niitu karia i niméhémé si Kristus Yesus si nimilot sé tou im witu un ukuman wana a singkéla'. Ni Sia éng kimalamoma ung kawasa um patéan wo niméhémé ung katou-touan makaz ing kauré-uré wia ni kita mengiité u Nuwu' Lé'os itii.

¹¹ U Nuwu' Lé'os itiimo u nimangun ni aku tinotoz ni Opo Empung maéndo mahwoka', maéndo aatu wo méster.

¹²Pahpaano niitu, ni aku mengali péléng an zézéha kenu. Taan ni aku én zéi'kan maizang, pahpaan kata'uangku séi si pa'émanengku wo totoz ing kata'uangku, ni Sia é mahkawasa i mahtéiz am pahpaayangengku u mémoitarawésa-Na wia ni aku, makaz witu un endo kaakazan ung kaayahan.

¹³Pahkiitela lumé'o-lé'os péléng an tutuzu' mémoituzu'ku wia ni ko. An tutuzu' itii ém wangunela kékéréan an tutuzu' kaulitan. Wo pahwangunela niitu karia um pa'émanen wo u raraatéan pahpaan i nimaesamo karia ni Kristus Yesus.

¹⁴Wo karia u sasawang ni Roh Lenas si menou-nou witu un atéta, téi-téizan a sangkum totoz wangun a mémoiwéhé wia ni ko.

¹⁵Kata'uannu im péléng sé tou witi Asia Oki' én timula'umo ni aku, karia kangkasii si Figelus wo si Hermogenes.

¹⁶Mengalé-ngaléi uman si Mahpiara mapaileké u raraatéan-Na wia sé sana awu ni Onesiforus, pahpaan ni séra é makalakezo nimenté' un atéku. Ni sia kasii én zéi'kan maizang i mahileké ni aku im witi bui.

¹⁷Im witi Roma, ni sia é nimahtututu' menéro ni aku makaz i nimahilekan kariaku.

¹⁸Ni kopé' si totoz mata'u taan ni aku, ung kalakez um pinaayangna im witi Efesus. Mengalé-ngaléi uman si Mahpiara é rumaraatémé ni sia im witu un endo si Opo Empung métumotoz ulit kaapa zéi'kan um pahwangunen né tou.