Read Tombulu 2 Timutius 3 Bible Online

2 Timutius 3 - Tombulu bible

2 Timutius 3

¹Kata'uannula, im wana an endo kamurian é lakez ang kasusaan.

²Sé tou é mahgenang uman un touna in esa wo nimaéndo ata an zoit. Ni séra i mahnuwu' é mahrakék un tou néra wo loozan, mahkua a léwo'an tumoro si kasuat tou wo mahsasarumokan sé tu'a, soo kumua u makasé wo zéi'mo pandung witu um pa'émanen,

³zéi'mo rumaraaté si kasuat tou, soo u mahlé'o-lé'osan, mahtawuruk si kasuat tou, zéi'mo makaezen un upi', totoz léwo' wo kasii mazi'zis am wangun.

⁴Ni séra ém paaz mahayo sé kakaria wia sé kakoro', potot pakahgena-genang, mahwangu-wangun mata'u, mahkiit uman u lelo léwo' un awak in esa wo zéi'kan mahkiit um paaz ni Opo Empung.

⁵Ni séra ém pahileken i mahragés wia si Opo Empung taan un ulitna ni séra é mahkélong ung kawasa ni Opo Empung itii. Ma'katla im wia sé tou itii!

⁶Pahpaan im wia ni séra ém wéwéhan sé mahwuni-wuni i mahangé wana am walé né tou walina wo mahenou sé wéwéné zéi'kan enté' sé lakez singkéla' wo kinawasa a lelo néra in esa.

⁷Sé wéwéné itii sekezé é mekituzu', taan ni séra én zéi'kan kawisa wo makatulap wisa un tutuzu' ulit.

⁸ Tanu si Yanes wo si Yambres mahsaru si Musa im puuna, téntu kangkasii sé tou itii i mahsaru ung kaulitan. Am pakahgena-genang néra é léwo'mo wo um pa'émanen néra én zéi'mo ulit.

⁹Taan am wua'na am pahwangunen néra itii én zéi'kan mauréma, pahpaan tanumo si Yanes wo si Yambres, ung kalemouan néra é makata'uan péléng né tou.

¹⁰Taan ni ko éng kimiitola an tutuzu'ku, kura um pahwangunengku, wo um paayongku, um pa'émanengku, ung kaezenangku, u raraatéangku wo kura aku mahtututu' i mahpaayang zozo' in zézéha.

¹¹ Kata'uannumo an zézéha wo ang kapendisan am pinendankumé i ni aku witi Antiokhia, witi Ikonium wo witi Listra. Péléng an zézéha itii ém pinendankumomé, taan ni aku é méipilotomé ni Mahpiara im wana péléng an zézéha itii.

¹²Ulit im peléng sé tou sé paaz mahragés mengiité u ngaran ni Kristus Yesus é mazézéhan,

¹³taan sé tou léwo' wo tantowo kahuman éng kalousna i mahwangun a léwo'an, ni séra mahlulu sé tou wo ilulu né tou walina.

¹⁴Taan, ni ko é léwo'zéi' i mahkiitla an tutuzu' ulit a mémoituzu' wia ni ko wo un totozo pa'émanennu, wo tia' kaliuzannu si timuzu' niitu wia ni ko.

¹⁵Gena-genangen, rengané ing koki' ni ko é mata'umo um Pinantik Lenas un toro méhé wia ni ko ang katulapan wo mangun ni ko in ipilot im witu un ukuman wana a singkéla' mengiité um pa'émanennu wia si Kristus Yesus.

¹⁶Péléng am witu um Pinantik Lenas é méituzu' ni Opo Empung. Wo am pinantik itii ém wéwéhan torona: in tumuzu', i mapata'u ang kasumalaan, i suméro' sé tou wo in tumuzu' sé tou kura i menou-nou ulit witu u sinaru ni Opo Empung.

¹⁷Karia in téntu, um Pinantik Lenas é mangun sé tou ni Opo Empung makawawa i maayang péléng am paayangen wangun.