Read Tombulu 2 Timutius 4 Bible Online

2 Timutius 4 - Tombulu bible

2 Timutius 4

¹Si Kristus Yesus é méyé sumaup wia ung kaayahan in tumotoz ulit kaapa zéi'kan am pahwangunen né tou sé menou-noupé' wo sé nimatémo wo ni Sia éng kumawasa ing Kolano. Pahpaano niitu, totoz im pahaléiengkuma wia ni ko witu u sinaru ni Opo Empung wo ni Kristus Yesus:

²Ipahwoka'la u Nuwu' ni Opo Empung, zozo' in endo wangun kaapa endo léwo', ni ko é mimekla i mangé mahwoka' u Nuwu' ni Opo Empung. Ipapata'ula ang kasumalaan, pahséro'ela wo pahsésaala sé tou karia péléng ung kaezenan wo an tutuzu' ulit.

³Pahpaan un orasna é méyé i sé tou soomo an tutuzu' ulit. Ni séra ruméwok sé méster mengiit um paaz néra ing kumua ang kapaaz néra in talingan.

⁴Ni séra é soomo tumalinga an tutuzu' ulit, taan paaz uman tumalinga a sirita zéi'kan ulit.

⁵Zozo' in téntu, ni ko é léwo'zéi' i mahime-imek un toumu wo ezen im wana an zézéha, ipahwoka'la u Nuwu' Lé'os, wo paayangela a léwo'zéi' im paayangennu wia si Opo Empung.

⁶Tumoro ni aku, un endo ni aku i maté én zéi'mo uré. Un zaha'ku én tanu un anggor un ipahsaroi i maéndo raragés wia si Opo Empung.

⁷Ni aku én uli-ulit simapetola um pahlolowaan karia im wangun wo méikaayomola witu un akazna. Ni aku kasii én zéi'kan mazéi' i ma'éman wia si Kristus Yesus makaz ing kamurian.

⁸In tarékan ung kukulu iwéhé wia ni aku é niimeko ni Opo Empung, pahpaan ni aku é nimangunola an ulit witu u sinaru-Na. Ni Sia én zéi'kan mahsanaweka i mahtotoz ulit kaapa zéi'kan am pahwangunen né tou. Zéi'kan uman ni aku si makailek niitu, taan maan péléng sé ma'ento' si Yesus i mawurimé sumaup.

⁹Mahtututu'mé wo reweké i méyé wia ni aku,

¹⁰ pahpaan si Demas ém paaz uman am wia ung kaayahan kenu wo timula'umoma ni aku. Ni sia é nimangémo witi Tesalonika. Si Kreskes é nimangémo witi Galatia wo si Titus é nimangémo witi Dalmatia.

¹¹ Akazokan si Lukas si mahento' kariaku. Niitumo, sungkulena si Markus wo iwalimé wia'i, pahpaan ni sia én totoz pemandungengku i sumawang ni aku wana am paayangengku.

¹²Si Tikhikus é mémoiatukuma mangé witi Efesus.

¹³ Sa ko méyémo wia'i, pahalimpé'mé ung karai papasu'angku u méitula'ukumé witi walé ni Karpus witi Troas. Pahalin kangkasiimé am pinantikku, wo totoz tia' kaliu-liuzan a méipantik wana ang kawal.

¹⁴ Si Aleksander, si memamaayang an tambaga itii é nimangunola an totoz léwo' wia ni aku. Taan si Opo Empungokan si maér wia ni sia mengiit am pinahwangunnamé wia ni aku.

¹⁵Ni ko kangkasii é léwo'zéi' in tuméga-tégam im wia ni sia, pahpaan ni sia én totoz mahtututu' i mahsaru an tutuzu'ta.

¹⁶Ing kataré ni aku i mahkelung un touku im witi pahtotozan, zéi'kan siapa zozo' in esa si kimaria ni aku, péléng ni séra én timula'uma ni aku. Mengalé-ngaléi uman si Opo Empung én zéi'kan mapahsasala' ni séra pahpaan um winangun néra itii.

¹⁷Taan si Mahpiara én timatér wo nimenté' ni aku makaz u Nuwu' Lé'os toro ipakawoka'ku wo talingana péléng né tou zéi'kan Yahudi. Karia in téntu, ni aku é méikapiloté im witu um patéan tanumokan méikapiloté witu u sumah ni singa.

¹⁸Si Yesus Mahpiara é milot ni aku im wana ang genang léwo' né tou wia ni aku. Ni Sia é milot ni aku wo mahwali ni aku i muntep witu ung Kakolanoan-Na witi kasendukan. U sigi wo looz wia uman ni Sia makaz ing kauré-uré! Amin.

¹⁹ Ipapaayopé'la u sigi'ku wia si Priska wo si Akwila wo wia sé sana awu ni Onesiforus.

²⁰ Si Erastus é mahento' witi Korintus wo si Trofimus si karegas i saki é méitula'ukumé witi Miletus.

²¹Mahtututu'mé méyé wia'i in zéi'kampé' oras un zaté. Si Ebulus, si Pudes, si Linus, si Klaudia wo péléng sé katuari esa pa'émanen é mapaayoma u sigi' néra wia ni ko.

²²Si Yesus Mahpiara é menaté-natér ni ko. Mengalé-ngaléi uman ung kamang tatambér-Na é menaté-natér ni kamu!